Nitin Baibal Relnak

MATTHAI 13:11

Annih cu a leh hna i, "Vancung Pennak kong biathli hngalhnak cu nannih cu pek nan si cang, sihmanhsehlaw hi hna cu pek an si lo.

MATTHAI 13:12

Zeicahtiah a ngeimi cu hawi hleihvuanh awk a ngeih tiangin chap chin a si lai i a ngei lomi cu a ngeihmi hnihchunte hmanh kha lakpiak a si lai.

MATTHAI 13:16

"Nannih tu cu, nan van a va ṭha thiam dah. Nan mit nih a hmuh i nan hna nih a theih.

MATTHAI 13:17

Hihi philh hlah u: Nan hmuhmi le nan theihmi hi profet tampi hna le Pathian mi tampi hna nih hmuh le theih an duh na in an hmuh khawh lomi le an theih khawh lomi a si," tiah a ti hna.

MATTHAI 13:19

Lam hril i a tlami thlaici cu Vancung Pennak kong kha a theih cu a thei i a sullam a hngal ṭung lo mi kha an si. An chung i tuhmi thlaici cu Mi Ṭhalopa nih khan a chuah dih.

MATTHAI 13:20

Lung tamnak hmun i a tlami thlaici cu Vancung Pennak kha a theih cangka i lungtho ngaiin a cohlangmi kha an si.

MATTHAI 13:21

Sihmanhsehlaw an chungah hram a thlak lo caah saupi an rau lo. Cu kong i harnak le hremnak an hun ton tikah an i ngol zau.

MATTHAI 13:22

Hling lak i a tlami thlaici cu Vancung Pennak kong kha a theih cu a thei i sihmanhsehlaw hi vawlei cung khuasak tintuknak kong i lungretheihnak le chaw le va duhnak nih cu bia cu a thah i thei a tlai lomi hna kha an si.

MATTHAI 13:23

Cun vawlei ṭhatnak hmun i a tlami thlaici cu Vancung Pennak kong kha a thei i a sullam zong a hngalmi kha an si. Thei kha an tlai i a cheu cu a let za khat in, a cheu cu a let sawm ruk in, a cheu cu a let sawm thum in an karh," tiah a ti.

MATTHAI 13:31

Jesuh nih tahchunhnak bia a dang pakhat a chimh ṭhan hna. "Vancung Pennak cu mipa nih aa lak i a lo i a tuhmi anṭam ci bantuk a si.

MATTHAI 13:32

Thlaici vialte lakah a hme bik a si, sihmanhsehlaw a ṭhan tikah anhringso kung vialte lakah a ngan bik a si. Thingkung ah a hung cang i a nge ah khan va zong nih bu an ser," tiah a ti.

MATTHAI 13:33

Jesuh nih tahchunhnak bia a dang a chimh hna. "Vancung Pennak cu thilnu he aa lo. Cu thilnu cu nu pakhat nih aa lak i changvut rel khat chungah a phulhmi nih cun changvut cu a ning piin a thawhter," tiah a ti.

MATTHAI 13:37

Jesuh nih cun a leh hna i, "Thlaici ṭha a tuhtu cu Mi Fapa hi a si,

MATTHAI 13:38

lo cu vawlei hi a si; thlaici ṭha cu Vancung Pennak chung i a ummi hi an si; belh cu Mi Ṭhalopa minung kha an si.

MATTHAI 13:39

Cun belh a tuhtu kan ral kha Khuachia a si. Rawl ṭuan caan hi, chan dongh caan a si i rawl ṭuantu hna cu vancungmi hi an si.

MATTHAI 13:41

Mi Fapa nih hin vancungmi kha a thlah hna lai i a Pennak chung i ṭhat lonak a tuahtu vialte hna le mi a sualtertu vialte hna kha an pumh hna lai i

MATTHAI 13:42

meiphu chungah an paih hna lai, cuka ah cun an ṭap lai i an hacang an rial lai.

MATTHAI 13:43

Cun Pathian mi hna cu an Pa Pennak chungah ni bangin an ceu lai. Cucaah hna nan ngeih ahcun, thei ko u," tiah a ti.

MATTHAI 13:44

"Vancung pennak cu lo chung i thuhmi rothil bantuk a si. Mi pakhatkhat nih a vaa hmuh sual tikah a khuh ṭhan ta tawn. A lung aa lawmh tuk caah a ngeihmi thil vialte kha a zuarh hna i a va kal ṭhan i a lo ning in a va cawk," tiah a ti.

MATTHAI 13:45

"Vancung Pennak cu lungvar a ṭha phun a kawlmipa bantuk a si fawn.

MATTHAI 13:46

A ṭha ngaingaimi kha a hmuh tikah a kal i a ngeihmi thil vialte kha a zuar i cu lungvar cu a cawk."

MATTHAI 13:47

"Vancung Pennak cu rili chung i chehmi sur, nga phun zakip a tlaitu bantuk a si.

MATTHAI 13:48

A khah tikah ngatlaitu hna nih cun tikam ah an hnuh i an ṭhu i nga kha an ṭhen hna: a ṭhami cu an bawm chungah an sanh hna i a ṭha lomi cu an hlonh hna.

MATTHAI 13:49

Chan donghnak ah cun cu bantuk cun a si lai: vancungmi kha an kal lai i miṭha mi hna lak khan miṭhalo mi kha an khawmh hna lai i

MATTHAI 13:50

meiphu chungah an paih hna lai. Cuka ah cun an ṭap lai i an hacang an rial lai," tiah a ti.

MATTHAI 13:52

Cucaah a thawh hna i, "Phungbia cawnpiaktu saya, Vancung Pennak kong cawnpiaknak a cohlangmi cu, inn ngeitu, a thil khonnak chungin thil thar he thil hlun he a chuah lengmangtu bantuk a si," tiah a ti.

MATTHAI 13:57

cuticun an hlawt. Jesuh nih cun a thawh hna i, "Profet cu amah khua le a chungkhat hna sin ti lo ahcun, hmun dang ah cun upatnak hmu loin a um lo hen pei," tiah a ti hna.

MATTHAI 13:58

Zumhnak an ngeih lo caah khika ah cun khuaruahharnak tampi a tuah lo.

MATTHAI 14:13

Cu thawng cu Jesuh nih a theih tikah cuka cun lawng in hmunking ah amah lawng tein a kal. Cu thawng cu mizapi nih khan an theih i an khua cio khan Jesuh cu an ke in an fuh.

MATTHAI 14:14

Jesuh cu lawng chung khan a hung chuak i mizapi kha a hmuh hna tikah a zaang an fak ngaingai. Cucaah cun an mizaw hna kha a damter hna.

MATTHAI 14:16

Jesuh nih cun, "An kal a herh lai lo, nanmah nih ei awk zeilo pe hna u," tiah a leh hna.

MATTHAI 14:17

"Kan ngeihmi cu changreu hlum nga le nga pahnih lawng pei a si ko cu," an ti.

MATTHAI 14:19

Mi cu ram cungah khan a ṭhutter hna i changreu hlum nga le nga pahnih cu aa lak i van a cau i Pathian kha a thangṭhat. Changreu kha a cheu hna i a zultu kha a pek hna i a zultu hna nih khan mizapi cu an phawt hna.

MATTHAI 14:20

An dihlak in an ei i an khim dih. Cun a zultu hna nih khan a ṭilṭawt rel hleihnih an char.

MATTHAI 14:25

Cun khuangter hrawngah khin Jesuh cu an sin leiah cun a ke in ti cung cun a ra.

MATTHAI 14:27

Jesuh nih cun hmakhatte ah a hei chawnh hna i, "Nan thinphang hlah u. Keimah pei ka si ko cu. Hnangam in um ko u," tiah a ti hna.

MATTHAI 14:28

Cun Peter nih khan a hun chawnh i, "Bawipa, nangmah na si taktak ahcun, na sinah ka ke in ti cungin ka ratter tuah," tiah a ti.

MATTHAI 14:29

Jesuh nih cun, "Ra ngat," tiah a ti. Cucaah Peter cu lawng cun a vung ṭum i ti cungah cun a ke in Jesuh leiah cun a kal.

MATTHAI 14:30

Sihmanhsehlaw thlitu a fah zia kha a vun hmuh tikah a thin a phang i ti chungah cun a pil cuahmah i, "Bawipa, ka khamh tuah," tiah a au.

MATTHAI 14:31

Hmakhatte ah Jesuh nih a hei banh i a tlaih i, "Na zumhnak a va hme hringhran dah! Zeicahdah lungawṭawm in na um?" tiah a ti.

MATTHAI 14:32

An pahnih in lawng chungah cun an lut i thlitu kha a dai.

MATTHAI 14:33

Lawng chung i a ummi a zultu hna nih khan Jesuh cu an biak i, "Nangmah cu Pathian Fapa na si hrimhrim," tiah an ti.

MATTHAI 14:36

A zawmi cu na puan tlang tal kha tawnghter ko hna, tiah an nawl i a tawngmi paoh cu an dam dih.

MATTHAI 15:2

"Zeicahdah na zultu hna nih kan pupa phung an buar? Rawl ei lai ah a phung bantukin an kut an i ṭawl lo," an ti.

MATTHAI 15:3

Jesuh nih cun a thawh ve hna i, "A si ahcun zeicahdah nannih zong nih Pathian nawlbia kha nan buar ve i nanmah cawnpiaknak lawng kha nan zulh kun?

MATTHAI 15:7

Nannih mihrokhrawl hna. Nan kong Isaiah nih a rak chimmi hi a hmaan hringhran ko.

MATTHAI 15:8

Hi mi hna nih hin an kaa lawngin an ka upat, sihmanhsehlaw an lungthin taktak cun an ka hlat ngaingai, tiah Pathian nih a ti.

MATTHAI 15:11

Mi cu a kaa chung i a lutmi nih a thurter lo, sihmanhsehlaw a kaa chungin a chuakmi tu nih hin a thurter," a ti hna.

MATTHAI 15:17

Nan hngal kho lo maw? Mi kaa chung i a lutmi thil paoh cu a paw ah a lan i a lengah a chuak ṭhan ko.

MATTHAI 15:18

Sihmanhsehlaw kaa chungin a chuakmi thil cu lung chungin a chuakmi thil an si i cu hna nih cun mi cu an thurter.

MATTHAI 15:19

Zeicahtiah lai a nawntertu, nu le pa sualnak a tuahtertu, thil ṭhalo dangdang a tuahtertu, a firtertu, lih a chimtertu, mi a congoihtertu ruahnak ṭhalo vialte cu a lung chungin a hung chuakmi an si.

MATTHAI 15:22

Cuka ram i a ummi Kanaan minu pakhat cu a sinah a ra i, "David Fapa, ka zaangfah tuah. Ka fanu cu khuavang nih a tuah i awlokchong in a um ko," tiah fak piin a au.

MATTHAI 15:24

Cun Jesuh nih cun a vun leh i, "Israel mi lak i a tlaumi tuu hna sin lawngah pei thlah ka si ko cu," tiah a ti.

MATTHAI 15:25

Cu tikah minu cu a ra i a hmaiah khuk bil in a kun i, "Bawipa, ka bawm ko," tiah a ti.

MATTHAI 15:26

Jesuh nih cun, "Ngakchia rawl cu i lak riangmang i uico pek cu a hmaan lo," tiah a leh ṭhan.

MATTHAI 15:27

Minu nih cun, "Cucu a si taktak ko, bawipa; sihmanhsehlaw bawi cabuai cungin a tlami rawl ṭilṭawt cu uico nih an ei ve tawn ko hen pei," tiah a leh.

MATTHAI 15:28

Cucaah Jesuh nih cun, "Nangmah cu zumhnak ṭhawng ngaingai a ngeimi na si. Na duhmi cu kan tuahpiak ko lai," tiah a ti. Cu caan hrimhrim ah cun a fanu cu a rak dam.

MATTHAI 15:30

Mi tampi a sinah cun an ra i kebei le mitcaw le kutzeng le a holh kho lomi hna le mizaw dang tampi kha an ratpi hna i a kehram ah khan an chiah hna i a damter hna.

MATTHAI 15:31

A holh kho lomi an holh khawh le a zengmi an dam le kebeimi an kal khawh le mitcawmi nih khua an hmuh ṭhan kha an hmuh hna tikah, mizapi cu an khuaruah a har i Israel Pathian kha an thangṭhat.

MATTHAI 15:32

Jesuh nih a zultu kha a auh hna i, "Hi mi hna hi kan sinah ni thum an um cang i atu cu rawl ei awk an ngei ti lo i ka zaang an fak ngaingai. Rawl loin annih tlunter cu ka duh lo, lampi ah an va buhri sual lai," tiah a ti.

MATTHAI 15:34

Jesuh nih cun, "Changreu zeizat dah nan ngeih?" tiah a hal hna i, "Hlum sarih le nga hme tete tlawmte," tiah an leh.

MATTHAI 15:36

Cun changreu hlum sarih le nga kha aa lak hna i Pathian sinah thla a cam i a cheu hna i a zultu kha a pek hna i a zultu nih mizapi kha an pek hna.

MATTHAI 15:37

An dihlak in an ei i an i khim. A zultu pawl nih khan a ṭilṭawt sei sarih an khawmh.

MATTHAI 16:13

Jesuh cu Sisaria Filipi khua pawng ram ah khan a va kal i a zultu hna cu, "Mi nih Mi Fapa hi aho a si, an ka ti dah?" tiah a hal hna.

MATTHAI 16:14

Annih nih, "A cheu nih Tipil petu Johan a si, an in ti. A cheu nih, Elijah a si, an in ti, a cheu nih Jeremiah maw profet pakhatkhat dik a si, an in ti," tiah an leh.

MATTHAI 16:15

Cun a thawh hna i, "Nannih tah, aho a si nan ka ti dah?" tiah a hal hna.

MATTHAI 16:16

Simon Peter nih a leh i, "A Nungmi Pathian Fapa, Messiah kha na si," tiah a ti.

MATTHAI 16:17

Jesuh nih cun, "Johan fapa Simon, mi vanṭha ngaingai na si! Zeicahtiah hi biatak cu minung sinin na hngalhmi a si lo i vancung i a ummi ka Pa nih an pekmi a si.

MATTHAI 16:18

Cucaah cun nang cu lung tum, Peter, na si, kan ti. Cun hi lungpi cungah hin ka Khrihfabu hram ka bunh lai i cucu thihnak hmanh nih a tei kho lai lo.

MATTHAI 16:19

Vancung Pennak hunnak tawhfung cu kan pek lai i vawlei cung i na hrenhmi cu vancung zongah hrenh a si lai i vawlei cung i na awnhmi cu vancung zongah awnh a si lai," tiah a ti.

MATTHAI 16:21

Cu caan thawk cun Jesuh nih a zultu hna cu, "Jerusalem ah ka kal lai i upa hna le tlangbawi ngan upa pawl hna le Phungbia cawnpiaktu saya hna nih harnak tampi an ka pek lai. An ka thah lai i ni thum ni ah nunter ṭhan ka si lai," tiah fiang tein a chimh hna.

MATTHAI 16:23

Jesuh cu a hun i mer i Peter cu, "Satan, ka sinah um hlah. Na ruahnak hi Pathian ruahnak si loin minung ruahnak a si caah ka caah dawntu na si," tiah a ti.

MATTHAI 16:24

Cun Jesuh nih a zultu cu a thawh hna i, "Ahohmanh nih zulh nan ka duh ahcun, nanmah le nanmah nan i philh i nan vailamtahnak nan i put i nan ka zulh a herh.

MATTHAI 16:26

Mi nih hin vawlei pumpi hi co hmanh seh law, a nunnak a sungh ṭung ahcun zeital a miak hnga maw? A miak lai lo. A nunnak kha zeihmanh in a caw ṭhan kho lai lo.

MATTHAI 16:27

Mi Fapa hi ka Pa sunparnak in tuan ah ka vancungmi hna he ka ra lai i mi vialte kha an rian ṭuan ning cio in laksawng ka pek hna lai.

MATTHAI 16:28

Hihi philh hlah u. Mi Fapa cu Siangpahrang bantukin ka rat nan ka hmuh hlan cu a thi lo dingmi hika ah hin nan um," tiah a ti hna.

MATTHAI 17:2

An hmaiah cun a mui kha aa thleng i a hmai cu ni bangin a ceu i a hnipuan cu ceu bantukin an rang.

MATTHAI 17:3

Cun a zultu pathum hna nih cun Jesuh cu Moses le Elijah he bia an i ruah kha an hmuh.

MATTHAI 17:5

Cu ti i bia a chim lioah cun a ceumi minmei nih a run zelh hna i minmei chung cun aw nih, "Hi pa hi ka dawtmi ka Fapa, ka lung a ka tong ngaingaimi a si, amah bia kha ngai u," tiah a ti.

MATTHAI 17:6

A zultu pawl nih aw kha an theih tikah an thin a phang tuk i vawlei ah an bawk.

MATTHAI 17:8

Cucaah van lei kha an hun zoh i Jesuh lawnglawng kha an hmuh.

MATTHAI 17:10

Cun a zultu pawl nih Jesuh cu, "Zeicahdah Phungbia cawnpiaktu saya pawl nih, Elijah cu a rat hmasa awk a si, an ti?" tiah an hal.

MATTHAI 17:11

Jesuh nih cun, "Elijah cu a ra hmasa taktak i zeizong vialte kha timhtuah hram a thawk taktak.

MATTHAI 17:12

Sihmanhsehlaw hihi kan chimh hna: Elijah cu a ra ko cang, sihmanhsehlaw mi nih an hngal lo i an duhduh in an tuah. Cu bantuk ṭhiamṭhiam in Mi Fapa zong hi an ka serhsat ve lai." tiah a ti hna.

MATTHAI 17:13

Khi tikah a zultu pawl nih cun, a kan chimhmi hi tipil petu Johan kong a si, ti kha an hngalh.

MATTHAI 17:15

"Bawipa, ka fapa hi ka zaangfahpiak tuah. Amah cu mitlu a si i a tluk tikah hin mei chung le ti chung zongah a tlu tawn.

MATTHAI 17:16

Na zultu pawl sinah ka ratpi nain an damter kho lo," tiah a ti.

MATTHAI 17:18

Jesuh nih khuachia cu, chuak, a ti i a chuak i cu caan thawk te cun ngakchiapa cu a dam colh.

MATTHAI 17:20

Jesuh nih cun, "Nan zumhnak a zat lo caah a si. Hihi va philh hlah u: Anṭam ci tiate hmanh zumhnak nan ngeih ahcun, hi tlang hi, 'I thawn,' ti u law aa thawn ko lai. Zei paohpaoh kha nan tuah khawh ko lai.

MATTHAI 17:21

Sihmanhsehlaw hi bantuk cu thlacamnak le rawl ulhnak lawng nih a ṭhawl khawh; zei dang nih cun a ṭhawl kho lo," tiah a ti.

MATTHAI 17:24

Jesuh le a zultu hna kha Kapernaum khua i an rat tikah biakinn ngunkhuai khawltu pawl nih khan Peter cu, "Nan sayapa nih biakinn ngunkhuai a pe bal maw?" tiah an hal.

MATTHAI 17:25

Peter nih cun, "A pek ko," tiah a leh hna. Peter cu inn chung i a vung luh ah khan Jesuh nih cun a rak hlehkanh i, "Simon, zeitindah na ruah? Aho nih dah vawlei cung siangpahrang hna hi ram dang thil luh man le ngunkhuai an pek tawn hna? Cuka ram mi hna nih cun maw ramdangmi nih dah?" tiah a hal.

MATTHAI 17:27

Sihmanhsehlaw hi mi hna hi an thinhunter ka duh lo. Cucaah rili ah va kal law sio va thla, na sio hmasa bikmi nga kha a ka va keu law a ka chungah cun kan pahnih ca i a za ding tangka na hmuh lai; cun va kal law biakinn ngunkhuai cu va pe hna," tiah a ti.

MATTHAI 18:1

Cu caan ah cun a zultu hna kha Jesuh sinah khan an ra i, "Vancung Pennak ah ahodah a ngan bik?" tiah an hal.

MATTHAI 18:3

"Nannih cu nan i thlen i ngakchia bantuk ah nan i can lo ahcun Vancung Pennak chungah nan lut bal lai lo.

MATTHAI 18:4

Vancung Pennak chung i a ngan bik cu mi toiah aa dor i hi ngakchia bantuk ah aa cangmi cu a si.

MATTHAI 18:5

Cun ngakchia hi bantuk pakhatkhat kha ka min in nan conglawmh hna ahcun, keimah nan ka conglawmh a si."

MATTHAI 18:10

"Hi ngakchia tete hi pakhat hmanh zawmhtaih hna hlah u. Annih a vengtu hna an vancungmi kha vancung khua ah ka Pa hmaika ah an um zungzal ko.

MATTHAI 18:11

Mi Fapa cu a tlaumi khamh awkah ka ra.

MATTHAI 18:13

A hmuh tikah sawm kua le pakua a tlau bal lomi cung nakkhan hi tuu pakhat cungah hin aa lawm deuh.

MATTHAI 18:14

Cu bantukte cun, vancung khua i a ummi nan Pa nih, hi ngakchia tete pakhatte hmanh hi tlauter a duh hna lo.

MATTHAI 18:15

"Na unau pakhatkhat nih na cungah sualnak a tuah ahcun, amah sinah cun va kal law a sualnak cu va chim. Sihmanhsehlaw, a thli tein nanmah pahnih lawng theih in na va tuah lai. Na bia a ngaih ahcun, na unau ah na lak khawh ṭhan a si.

MATTHAI 18:17

Sihmanhsehlaw an bia zong kha a ngaih hlei lo ahcun, cu thil cu Khrihfabu kha na chimh hna lai. Cun Khrihfabu bia kha a ngaih duh ṭhiamṭhiam lo ahcun, lawkihmi maw, ngunkhuai khawltu maw, cu bantuk mi ah cun va zoh.

MATTHAI 18:18

"Cucaah nan dihlak in kan chimh hna: vawlei cungah nan khapmi thil paoh cu vancung zongah khap a si lai i vawlei cungah nan onhmi thil paoh cu vancung zongah awnh a si lai.

MATTHAI 18:19

Cun hi zong hi kan chimh hna: hi vawlei cungah hin, nan halmi thil kong ah, pahnih nan lung aa khah ahcun, nan halmi thil cu vancung i a ummi ka Pa nih an pek hna lai.

MATTHAI 18:20

Zeicahtiah ka min in pahnih pathum nan i pumhnak ah kei zong nan sinah ka um ve," tiah a ti.

MATTHAI 18:22

Jesuh nih cun, "Sihlah, voi sarih si loin voi sawm sarih voi sarih,

MATTHAI 18:23

zeicahtiah Vancung Pennak cu hi bantuk hi a si: Siangpahrang pakhat nih a sal hna rian ṭuanning kha zoh aa tim.

MATTHAI 18:24

Aa thawk kate ah khin a salpa pakhat cu a sinah an ratpi i cu sal nih cun tangka talen thong hra a bat.

MATTHAI 18:26

Cu salpa cu a bawipa hmaiah cun a khuk aa bil i, 'Zaangfahnak tein ka ngang rih tuah. Cham dih kan zuam ko lai,' tiah a nawl.

MATTHAI 18:27

A bawipa nih a zaangfah i cucaah a leiba cu a ngaihthiam i a kalter.

MATTHAI 18:28

"Mipa cu a va chuak i a sal hawi pakhat, tangka tlawmte a rak batu kha a va fuh. Amah cu a tlaih i a or in a dih i, 'Na ka batmi kha ka cham dih,' tiah a ti.

MATTHAI 18:29

A sal hawi nih cun a khuk aa bil i, 'Ka ngang rih sawh. Cham dih kan zuam lai,' tiah a nawl.

MATTHAI 18:30

Sihmanhsehlaw a duh lo. Thong ah khan a leiba a cham dih hlantiang a thlak.

MATTHAI 18:32

Cucaah an bawipa nih kha sal kha a kawh i, 'Sal ṭhalo, na ka nawl caah na ka batmi vialte kan ngaihthiam dih.

MATTHAI 18:33

Na cung i zaangfahnak ka ngeih bantukin pei na sal hawi cungah na ngeih ve awk a si cu,' tiah a ti.

MATTHAI 18:34

An bawipa cu a thin a hung ngaingai i a salpa cu a leiba a lim khawh dih hlantiang thong ah a thlak.

MATTHAI 18:35

"Nannih nih nan u nan nau kha nan lungchung taktak in nan ngaihthiam hna lo ahcun cu bantuk cun vancung khua i a ummi ka Pa nih nannih zong cu an tuah ve hna lai," tiah a ti hna.

MATTHAI 19:2

Mi tampi nih an zulh i a damter hna.

MATTHAI 19:3

Farasi mi tlawmpal kha a sinah cun an ra i amah kha bia in foih an duh caah, "Pa nih a nupi maknak caah kan Phung nih a awnhmi lam zeital a um maw?" tiah an hal.

MATTHAI 19:4

Jesuh nih cun, "A hramthawk in Pathian nih nu le pa in a ser hna,

MATTHAI 19:5

'cucaah pa nih a nu le a pa kha a kaltak hna lai i a nupi he an i fon lai i cu hna pahnih cu pum khat an si lai, tiah Sertu nih cun a ti,' timi Cathiang chung ṭialmi kha nan rel bal lo maw?

MATTHAI 19:6

Cucaah pahnih an si ti lo i pakhat an si cang. Pathian nih a fonhmi hna cu ahohmanh nih ṭhen hna hlah seh," tiah a ti.

MATTHAI 19:9

Cucaah hihi kan chimh hna: Ahohmanh nih a nupi kha, zumh awktlak loin a um ti ṭung lo ahcun, a mak i nu dang a ṭhit ahcun, nu le pa sualnak a tuah a si," a ti.

MATTHAI 19:11

Jesuh nih cun, "Hi cawnpiaknak hi a mi kip caah a si lo, Pathian nih a thimmi hna ca lawngah a si.

MATTHAI 19:12

Mi nih nupi an ngeih khawh lonak sullam a dangdang a um cio: a cheu cu an i chuahpimi a si, a cheu cu mi nih cuticun an sermi an si; cun a cheu cu Vancung Pennak ruang hrimhrim i nupi ngei loin a ummi an si. Hi cawnpiaknak a zul khomi nih cun cuticun zul ko hna seh," a ti.

MATTHAI 19:16

Voi khat ah mipa pakhat cu Jesuh sinah khan a ra i, "Saya, zungzal nunnak co awkah thil ṭha zeidah ka tuah awk a si?" tiah a hal.

MATTHAI 19:17

Jesuh nih cun, "Zeicahdah 'zei thil ṭha dah,' timi cu na ka hal? A ṭhami cu pakhat lawng pei a um ko cu. Nunnak chung i luh na duh ahcun nawlbia kha tah na zulh ko hna," tiah a leh.

MATTHAI 19:20

"Hi nawlbia cu ka zulh dih cang hna. Zeidah zulh awk ka herh rih?" tiah a ti.

MATTHAI 19:21

Jesuh nih cun a thawh i, "Mi tling si na duh ahcun, va kal law na ngeihmi thil vialte kha va zuar hna; cun tangka na hmuhmi cu misifak kha va pe hna; cuticun vancung khua ah chawva na ngei lai, cun ra law rak ka zul," tiah a ti.

MATTHAI 19:22

Cu bia cu tlangval nih khan a theih tikah ngaihchia in a kal, zeicahtiah amah cu mirum ngaingai a si.

MATTHAI 19:24

Vun nolh ṭhan rih ko ning law, kalauk ca i ṭhim kaa chung luh kha mirum mi ca i Pathian Pennak chung luh nakin a fawi deuh," tiah a ti.

MATTHAI 19:25

Cu bia cu a zultu hna nih khan an theih tikah an khuaruah a har i, "Ahodah khamhnak a hmu kho kun lai?" an ti.

MATTHAI 19:26

Jesuh nih dengteo in a vun zoh hna i, "Hihi minung caah cun a si kho lo, sihmanhsehlaw Pathian caah cun zeizong vialte hi a si kho ko," tiah a leh hna.

MATTHAI 19:27

Cun Peter nih khan a hun i thawh i, "Zeizong vialte kha kan kaltak i nangmah kha kan in zulh. Zeidah kan comi a si lai?" tiah a hal.

MATTHAI 19:28

Jesuh nih cun, "Chan Thar chungah Mi Fapa hi ka bawi ṭhutdan cung i ka ṭhut tikah nannih a ka zultu hleihnih hna zong hi Israel mi phun hleihnih kha an biaceihpiak awkah bawi ṭhutdan cungah nan ṭhu ve lai.

MATTHAI 19:29

Cun keimah ruangah a inn siseh, a lo siseh, a u siseh, a nau siseh, a farle si hna seh, a pa siseh, a nu siseh, a fale si hna seh, a kaltakmi hna cu a let za khat in a hmuh ṭhan lai i zungzal nunnak kha pek a si lai.

MATTHAI 19:30

Sihmanhsehlaw atu i hmasa bik a simi tampi hi hmanung bik an si lai i atu i hmanung bik a simi tampi hi hmasa bik an si lai," tiah a ti.

MATTHAI 20:1

"Vancung Pennak cu mitsur dum a ngei i zingkate in a dum chung i rianṭuantu ding kawl awkah aa thawhmipa he aa lo.

MATTHAI 20:2

Ni khat ah hawi nih an hmuh cio tawnmi ngun tangka phar khat kan phalh hna lai, tiah a ti hna i mitsur dum chungah cun rianṭuan awkah khan a thlah hna.

MATTHAI 20:8

"Zanlei a hung si tikah dum ngeitu nih cun a dum uktu kha a kawh i, 'Rian ṭuantu kha au hna law an ṭuan man kha pe cio hna, hmanung bik i fialmi kha a hmasa bik ah pe hna law hmasa bik i fial mi kha hmanung bik ah pe hna,' tiah a ti.

MATTHAI 20:12

An i thawh i, 'A hmanung bik i na fialmi hna tham cu suimilam pakhat lawng pei an ṭuan ko cu, kannih cu chun nitlak pei ni lin lakah kan ṭuan cu, asinain kanmah na kan pek zat ṭhiamṭhiam na pek ve ko hna,' an ti.

MATTHAI 20:13

Cun annih lak i pakhat cu dum ngeitu nih khan a thawh i, 'Ka kawi, kan hleng hna lo. Hawi hmuh cio tawnmi ngun tangka phar khat hmu dingin pei nan hna a tlak ve ko kha.

MATTHAI 20:14

Cucaah nan tangka cu i lak u law inn ah va ṭin ko u. A hmanung bik i ka fialmi hna nanmah zat pek ve cu keimah nawl pei a si ko cu.

MATTHAI 20:16

Cuticun a hmanung bik kha a hmasa bik an si lai i a hmasa bik kha a hmanung bik an si lai," tiah Jesuh nih a ti.

MATTHAI 20:26

Sihmanhsehlaw nannih cu cuticun nan si awk a si lai lo. Nan lak i pakhat khat nih ngan a duh ahcun nan sinum a si awk a si.

MATTHAI 20:27

Ahohmanh pakhatnak si a duhmi cu nan sal a si awk a si.

MATTHAI 20:28

Cuticun pei Mi Fapa hi a si cu, rian ṭuanpiak dingah ka rat ṭung lo, mi tampi an rian ṭuanpiak awk le annih tlanhnak ca i ka nunnak pek awkah pei ka rat cu," tiah a ti hna.

MATTHAI 20:29

Jeriko khua in an i thawh ah khan Jesuh cu mi tampi nih an zulh.

MATTHAI 20:31

Mizapi nih cun an sik hna i dai u, tiah an ti hna. Sihmanhsehlaw thang chinchin in, "Maw David Fapa, kan zaangfah tuah, bawipa," tiah an au.

MATTHAI 20:32

Jesuh cu a dir i a kawh hna i, "Zeidah kan tuahpiak seh, ti nan ka duh?" tiah a hal hna.

MATTHAI 20:33

"Bawipa, kan mit hung kan damter law kan duh," tiah an leh.

MATTHAI 20:34

Jesuh nih a zaangfah hna i an mit cu a tawnghpiak hna i hmakhatte ah khua an hmu kho. Cun amah cu an zulh.