Nitin Baibal Relnak

LUKA 1:2

Cu an ṭialmi cu a hramthawk lio i an mit in a rak hmumi hna nih an kan chimhmi le hi bia a rak chimtu hna nih an rak chimning khan a si.

LUKA 1:5

Herod kha Judea Siangpahrang a si lioah, Abijah tlangbawi phu chungah aa telmi tlangbawi pakhat a min Zekhariah an timi kha a rak um. A nupi min cu Elizabeth a si i amah zong cu tlangbawi hrinthlak a si ve.

LUKA 1:6

An pahnih in Pathian hmaiah nuncan ṭha in a nung i Bawipa nawlbia vialte le phunglam vialte tlamtling tein a zulmi an si.

LUKA 1:7

Elizabeth cu a cin caah fa pakhat hmanh an ngei lo. An pahnih in an tar ngaingai cang.

LUKA 1:11

A sinah Bawipa vancungmi pakhat a rung lang i rimhmui an khanghnak biakṭheng orhlei kamah khan a dir.

LUKA 1:13

Sihmanhsehlaw vancungmi nih cun a thawh i, "Zekhariah, na thinphang hlah! Pathian nih na thlacamnak kha a theih i na nupi Elizabeth nih fapa an hrinpiak lai. A min ah Johan na sak lai.

LUKA 1:15

Zeicahtiah amah cu Bawipa hmaiah mi ngan a si lai. Zu siseh, zureu siseh, zeihmanh a ding lai lo. A chuahka hrimhrim in Thiang Thlarau in a khat lai;

LUKA 1:16

Israel mi mi tampi kha Bawipa an Pathian sinah a kirpi ṭhan hna lai.

LUKA 1:17

Amah cu Pathian thlahmi lamkaltu a si lai i profet Elijah bantukin a fekmi le a ṭhawngmi a si lai. Pale hna le fale hna kha hmunkhat ah a fonh ṭhan hna lai i nawl a ngai lomi hna kha miding mi hna ruahnak lam leiah a hruai ṭhan hna lai. Bawipa mi hna cu Bawipa ca i aa tlakmi minung si awkah a rak timh hna lai," tiah a ti.

LUKA 1:18

Zekhariah nih vancungmi cu a thawh i, "Cucu a si kho lai tiah zeitindah ka zumh khawh lai? Zeicahtiah kei cu ka tar cang i ka nupi zong a tar ve fawn," tiah a ti.

LUKA 1:20

Ka bia cu na ka zum lo, asinain a caan a phak tikah cun a tling ṭhiamṭhiam te ko lai. Na zumh lo caah holh kho loin na um lai i kan chimhmi thil kha a tlin ni a phak hlantiang bia pakhat hmanh na chim kho lai lo," tiah a ti.

LUKA 1:63

Zekhariah nih cun caṭialnak catlap a hal hna i, "A min cu Johan a si," tiah a ṭial.

LUKA 1:64

Cu cangka cun Zekhariah cu a holh kho ṭhan i Pathian kha a hun thangṭhat.

LUKA 1:28

Vancungmi kha a sinah cun a ra i. "Na cungah daihnak um ko seh. Bawipa cu na sinah a um i thluachuahnak tam piin an pek," tiah a ti.

LUKA 1:31

Nau na pawi lai i fapa na hrin lai i a min ah Jesuh na sak lai.

LUKA 1:32

Amah cu milian mingan a si lai i Cungnung Bik Pathian fapa tiah ti a si lai. Amah a hringsortu Siangpahrang David bawiṭhutdan kha Pathian nih amah cu a pek i

LUKA 1:33

Jakob tefa hna siangpahrang zungzal in a si lai, a pennak cu zeitikhmanh ah a dong lai lo," tiah a ti.

LUKA 1:35

Vancungmi nih cun a leh i, "Thiang Thlarau kha na cungah a phan lai i Pathian ṭhawnnak cu na cungah aa fu lai. Hi ruangah hin a thiangmi fa cu Pathian Fapa tiah ti a si lai.

LUKA 1:38

Mary nih a thawh i, "Kei cu Bawipa salnu ka si ko, na chim bang cun ka cungah si ko seh," tiah a ti i vancungmi nih cun a kaltak.

LUKA 1:41

Elizabeth nih Mary i a vun chawnhnak bia kha a theih tikah a paw chung i a fate cu a rak cawl. Elizabeth cu Thiang Thlarau in a khat i,

LUKA 1:42

aw thangpi in, "Nangmah cu nu vialte lakah thluachuak bik nu na si. Na hrin laimi na fa zong hi fa thluachuak a si.

LUKA 1:44

Na ka biakchawnhnak ka theih cangka khan pei ka chung i ka fate cu lunglawmhnak in aa hlawh len cu.

LUKA 1:45

Bawipa bia na sinah a rami kha a tling taktak lai ti zumh cu na caah lunglawmh awk a va si hringhran dah," tiah a ti.

LUKA 1:46

Mary nih aa thawh i: "Thanh tuah, ka lungthin, Bawipa lianhngannak cu.

LUKA 1:47

I lawm tuah, ka nunnak, Bawipa na khamhtu cungah;

LUKA 1:48

A salnu hi hi tluk minauta ka si nain a ka philh lo. Nihin thawk in hmailei ah cun mi vialte nih thluachuaknu an ka ti lai;

LUKA 1:49

Bawipa, a ṭhawngmi Pathian nih ka cungah khuaruahhar tuk in rian a ṭuan. A min cu a thiang;

LUKA 1:50

Amah a ṭihmi vialte kha chan khat hnu chan khat in a zaangfah hna.

LUKA 1:52

Siangpahrang ṭhawngṭhawng kha an bawiṭhutdan cungin a ṭhumh hna i Minauta kha a cawi hna.

LUKA 1:67

A pa Zekhariah cu Thiang Thlarau in a khat i, Pathian bia kha a chim:

LUKA 1:69

Kan caah a ṭhawngmi Khamhtu kha a chuahter cang. Amah cu a sal David tefa kha a si.

LUKA 1:74

Kan ral hna kut chungin luatter awkah le Amah cu ṭihnak um loin a rian kan ṭuan nakhnga, Kan pu Abraham sinah chiatser in bia aa kam i

LUKA 1:75

cucu kan nunchung vialte, amah hmaiah thianghlim le ding tein kan um nakhnga caah a si.

LUKA 1:76

Nang, ka fa, nangmah hi Cungnung Bik Pathian profet tiah ti na si lai; Amah lam kha rak sersiam chung awkah Bawipa hmaiah cun na rak kal chung lai.

LUKA 1:77

A mi hna kha, nan sual ngaihthiam nan si thawngin khamhnak nan hmu lai, tiah na chimh hna lai.

LUKA 1:78

Zeicahtiah, kan Pathian cu zaangfah thiammi le minunnem a si: Khamhnak khuaceu ṭha cu kan cungah a tlunter lai i

LUKA 1:79

Thihnak thladem mui lak i a ummi hna kha vancung in a vun ceuh hna lai; Kannih cu daihnak lam ah a kan hruai lai," tiah a ti.

LUKA 2:4

Josef cu Galilee ram i Nazareth khua in Judea ram i Bethlehem khua an timi, Siangpahrang David chuahnak khua ah khan a kal. Josef kha khika i a kalnak cu amah kha David hrinsor a si caah a si.

LUKA 2:6

Khika i an um lioah khan a hrin caan kha a phan, fapate kha a hrin i cucu a fater a si.

LUKA 2:7

Puan in a zual i caw rawl einak kuang chungah khan a thlim — riahnak khualbuk ah khan an caah hmun a um lo.

LUKA 2:8

Cuka hrawngah cun, an tuurun a zohkhenh i ramlak i a riakmi tuukhal hna kha an um.

LUKA 2:9

Bawipa vancungmi cu an sinah a lang i Bawipa sunparnak cu an velchum in a ceu. Annih cu an thin a phang tuk hringhran,

LUKA 2:10

sihmanhsehlaw vancungmi nih cun a thawh hna i, "Nan thinphang hlah u; zeicahtiah nan sin i ka ratnak cu nan ca i thawngṭha he a si, cu thawngṭha nih cun mi vialte sinah lunglawmhnak a tlunter lai.

LUKA 2:11

Tu zan hrimhrim ah hin David khua chungah nan Khamhtu kha a chuak cang — Khrih Bawipa cu!

LUKA 2:12

Cun hihi nan ca i hmelchunhnak cu a si lai: ngakchiate pakhat kha puan in an zual i caw rawl einak kuang chung i an thlim kha nan va hmuh lai," tiah a ti.

LUKA 2:16

Cucaah khulrang in an kal i Mary le Josef cu an va ton hna i ngakchiate cu caw rawl einak kuang chung i a rak ih ko kha an va hmuh.

LUKA 2:17

Tuukhal pawl nih ngakchia cu an hmuh tikah amah kong i vancungmi nih a chimmi kha an chimh hna

LUKA 2:18

Tuukhal pawl nih an chimmi a theimi paoh cu an khuaruah a har dih.

LUKA 2:20

Tuukhal pawl cu an kir i an va hmuhmi le an theihmi ruangah khan Pathian cu an thangṭhat; vancungmi nih a chimh hna bantukte khan a si taktak ko.

LUKA 2:13

Cu cangka cun vancung ralkapbu nganpi cu vancungmi sinah khan an rung lang i Pathian kha hla in an thangṭhat:

LUKA 2:14

"A sang bik van ah khin Pathian cu sunparnak hmu ko seh, Cun a dawtmi hna umnak vawlei ah hin remnak um ko seh," tiah an ti.

LUKA 2:23

Bawipa nawlbia chungah cun, Nan fater, pa a simi hna paoh kha Bawipa sinah nan pekchanh hna lai, tiah aa ṭial.

LUKA 2:25

Jerusalem khua ah khan mipa pakhat, a min Simeon a simi a rak um. Amah cu miṭha le Pathian a ṭihmi kha a si i Israel khamhnak ding a rak hngakmi kha a si. Thiang Thlarau nih khan a umpi i

LUKA 2:26

Thiang Thlarau nih cun Bawipa biakamhmi Messiah na hmuh hlanah cun na thi lai lo, tiah a ti.

LUKA 2:27

Thlarau nih a hruainak thawngin Simeon cu Biakinn chungah cun a lut. Ngakchia Jesuh cu a nu le a pa nih, phung nih tuah awk a si tiah a tining in, Biakinn chungah an run luhpi tikah,

LUKA 2:28

Simeon nih cun a rak pom i Pathian cu a thangṭhat i:

LUKA 2:29

"Nihin ah hin, maw Bawipa, nangmah nih na salpa cu dai tein ka rian na ka limter cang, Atu cu nangmah na biakamnak kha a tling cang.

LUKA 2:31

Zeicahtiah miphun vialte zohchih in khamhnak ding na rak timhmi cu ka mit hrimhrim in ka hmuh cang;

LUKA 2:32

Cucu Jentail mi hna caah na lam a langhtertu a simi ceunak le na mi Israel mi hna ca i sunparnak cu a si," tiah a ti.

LUKA 2:34

Simeon nih cun thluachuahnak a pek hna i a nu Mary kha a thawh i, "Hi ngakchia cu Pathian nih Israel mi lakah mi tampi an rawk nakhnga le khamh an si nakhnga caah a thimmi a si. Amah hi Pathian sinin a rami hmelchunhnak, mi tampi nih an doh laimi a si i

LUKA 2:35

an dohnak thawng cun mi tampi an lungthin chunglei kha a lang lai. Cun ngaihchiatnak nih vainam bantukin na lungthin kha a chunh lai," a ti.

LUKA 2:40

Ngakchia cu a hung ṭhang i a hung ṭhawng; fimnak in a khat i Pathian thluachuahnak kha a cungah a um.

LUKA 2:46

A ni thumnak ni ah Biakinn chungah khan an va hmuh i cawnpiaktu Judah mi hna sinah khan a rak ṭhu i an bia kha a rak ngai i bia a rak hal len ve ko hna.

LUKA 2:49

Annih cu "Zeicahdah nan ka kawl? Ka Pa inn ah ka um awk a si ti kha nan hngal lo maw?" tiah a ti hna.

LUKA 2:52

Cun Jesuh cu pum lei in siseh, fimnak lei in siseh, a hung ṭhang i Pathian hmai le minung hmaiah mithmai ṭha a hmu.

LUKA 3:2

Annas le Kaiafas cu tlangbawi ngan an si. Cu caan lioah cun Zekhariah fapa Johan sinah ramcar chungah khan Pathian bia cu a phan.

LUKA 3:3

Cucaah Jordan tiva hrawn hrawngah khan Johan cu aa chawk i, "Nan nun ṭhin u law tipilnak ing u. Cun Pathian nih nan sualnak an ngaihthiam hna lai," a ti hna i

LUKA 3:7

Johan sinah khan mi cu a bubu in tipil in awkah khan an hung chuak lulhmalh. A rak thawh hna i, "Rul hna, Pathian thinhunnak a ra liomi sin cun nan luat kho lai tiah aho nih dah aan chimh hna?

LUKA 3:8

Nan nun nan ṭhinh cu nan thil timi ah khan langhter u. 'Abraham pei a kan hringsortu cu a si tiah,' ti len hlah u. Pathian nih cun a duh ahcun hi lung hi a lak hna lai i Abraham tefa ah cun a ser khawh ko hna.

LUKA 3:9

Thingkung cu hau awkah a hram ah hreitlung kha chiah a si cang; thei ṭha a tlai lomi kung paoh cu hau an si lai i mei chungah paih an si lai," tiah a ti.

LUKA 3:10

Mizapi nih cun an thawh i. "A si kun ahcun zeidah kan tuah kun lai?" an ti.

LUKA 3:11

Anih nih, "Angki pahnih a ngeimi nih a ngei lomi kha pakhat ṭhen seh, cun rawl a ngeimi nih a ngei lomi kha hrawm seh," a ti.

LUKA 3:4

Profet Isaiah nih a cauk chungah a rak ṭial bang khan a hung si. A ṭialmi cu hitin a si:

LUKA 3:5

A kuarhnak hmun vialte kha rak chilh hna u law Tlang sang le fing bo kip kha rak rawnhter hna u; Lam aa ngerhmi kha rak dinter hna u, Lam bingbo vialte kha rak tlorhnalh hna u;

LUKA 3:6

Cun minung phun paohpaoh nih Pathian khamhnak kha an hmuh lai,' a ti," tiah aa ṭialmi kha a hung tling.

LUKA 3:15

Mizapi cu an i ruahchannak kha a hung ṭhang i Johan hi aho ko dah a si hnga, amah hi Messiah cu a si sual hnga maw, tiah an ruat lengmang.

LUKA 3:16

Cucaah Johan nih cun an dihlak in a thawh hna i, "Kei nih cun tiin tipilnak kan pek hna, sihmanhsehlaw keimah nakin a ngan deuh ngaingaimi a ra lio. A kedan hri phoihtu hmanh ah kei cu kaa tlak lo. Amah nih cun Thiang Thlarau le mei in tipilnak an pek hna lai.

LUKA 3:17

Amah nih cun a ṭalawn kha aa put i rawl kha a zah hna lai; a fang ṭha cu buk chungah a rawn hna lai, sihmanhsehlaw a hi cu a mit lomi mei chungah a khangh hna lai," tiah a ti.

LUKA 3:21

Mi dang vialte kha tipil a pek dih hna in Jesuh zong kha tipil cu a pek ve. Thla a cam lioah khan van cu aa hung i

LUKA 3:22

Thiang Thlarau cu a pum in ṭhuro bantukin a cungah cun a rung ṭum. Cun vancung in aw pakhat a rung thang i, "Nangmah cu kan dawtmi ka fapa na si. Na cungah ka lung a tling," tiah a ti.

LUKA 4:1

Jesuh cu Thiang Thlarau he khat in Jordan tiva khan a ra kir i Thlarau nih ramcar chungah khan a kalpi.

LUKA 4:2

Khika ah Khuachia nih ni sawm li chung a rak tukforh. Cu chung vialte cu rawl a ei lo caah cu caan a dih tikah a rawl a ṭam ngaingai.

LUKA 4:4

Jesuh nih cun a leh i, "Cathiang nih pei, 'Minung nunnak hi rawl lawngin a si lo,' a ti cu," tiah a ti.

LUKA 4:6

Khuachia nih cun a thawh i, "Hi lianhngannak vialte le hi chawva vialte hi kan pek lai. A dihlak hin keimah pek ka si cang i ka duhmi paoh ka pek khawh hna.

LUKA 4:7

Cucaah ka hmaiah na khuk i bil law hi vialte hi na ta an si dih ko lai," tiah a ti.

LUKA 4:8

Jesuh nih, "Cathiang nih pei, 'Bawipa na Pathian cu na biak lai i amah rian lawng kha na ṭuan lai,' a ti cu," tiah a leh.

LUKA 4:12

Jesuh nih aa thawh i, "Cathiang nih pei, 'Bawipa na Pathian cu va hneksak hlah,' a ti ve kha," tiah a leh.

LUKA 4:13

Khuachia nih Jesuh cu a phunphun in a tukforh dih hnuah caan tlawmpal chung cu a kaltak.

LUKA 3:38

Kainan cu Enosh fapa a si, Enosh cu Seth fapa a si, Seth cu Adam fapa a si, Adam cu Pathian fapa a si.

LUKA 4:18

"Bawipa Thlarau cu ka cungah a um. Sifakmi hna sin i Thawngṭha chim awkah chiti a ka thuh i Saltangmi hna sin i luatnak thanh awkah a ka thlah. Mitcaw mi hna sin i khuahmuh ṭhannak pek awk le Hremmi hna luatter dingah a ka thlah,

LUKA 4:19

Bawipa nih a mi hna a khamh hna lai ding kum cu va thanh awkah a ka thlah!" tiah aa ṭialnak hmun kha a rel.

LUKA 4:21

Annih cu a thawh hna i, "Hika Cathiang cang hi, nannih nih ka rel tikah nan theih bantukin nihin ni ah hin a tling cang," tiah a ti.

LUKA 4:25

Cucaah ka bia hi ngai hmanh u. Elijah chan i kum thum le a cheu khua a khen i Israel ram chung dihlak ah pam a tlun ah khan, cu ram chungah nuhmei tampi an rak um taktak ko,

LUKA 4:26

sihmanhsehlaw cu hna sinah cun Elijah kha thlah si loin Sidon ram Zarefath khua nuhmei sin tu ah khan thlah a si deuh.

LUKA 4:27

Profet Elisha chan ah Israel ram ah thinghmuimi tampi an rak um ko, sihmanhsehlaw Siria mi Naaman dah ti lo cu ahohmanh damtermi an um lo," tiah a ti.

LUKA 4:33

Cuka pumhnak inn ah cun khuachia thlarau a ngeimi pa pakhat a rak um; fak piin a au i,

LUKA 4:34

"Nazareth khuami Jesuh, zeidah na kan duhnak a si? Kanmah hrawh awkah maw hika ah hin na rat? Nangmah cu aho na si kha kan hngalh ko — Pathian lamkaltu a thiangmi na si ko," tiah a ti.

LUKA 4:35

Jesuh nih thlarau cu, "Dai tein um law, mipa chung khan chuak," tiah a ti. Khuachia nih cun mipa cu an dihlak hmaika ah khan a thluk i a cungah zeihmanh ṭhat lonak tuah loin a kaltak.

LUKA 4:37

Cun Jesuh kong cu cu ram chung khuazakip ah khan a thang.

LUKA 4:42

Khuadei kate ah Jesuh cu khuachung khan a chuak i hmunking ah a kal. Sihmanhsehlaw mizapi nih khan an kawl i a umnak an va phak tikah khan, kan kaltak ti hlah, tiah an hnek.

LUKA 4:43

Sihmanhsehlaw a thawh hna i, "Pathian Pennak kong Thawngṭha kha khua dang zongah ka chim hrimhrim awk a si, cu chim ah cun pei Pathian nih a ka thlah cu," tiah a ti.

LUKA 5:4

Bia a chim dih in Simon cu a thawh i, "Ti thuhnak leiah khin na lawng hi hei thawn deuh law nangmah le na hawile nih khan nan sur khan nga kha chep hna u," tiah a ti.

LUKA 5:5

Simon nih cun, "Bawipa, zan khuadei kan vorh ṭualmal ko nain zeihmanh kan tlai lo. Sihmanhsehlaw ti ko u, na ti ahcun sur cu kan cheh rih ko lai," tiah a ti.

LUKA 5:6

Sur cu an vun cheh hna i nga cu tam tuk hringhran an tlaih hna caah an sur cu tleh dih hnek aa zal.

LUKA 5:8

Simon Peter nih cucu a hmuh tikah Jesuh hmaiah cun a khuk aa bil i, "Bawipa, ka kaltak ko, kei cu misual ka si," tiah a ti.

LUKA 5:10

Simon hawile hna Jeim le Johan, Zebedi fapa hna zong kha, cu bantuk ṭhiamṭhiam cun an um. Jesuh nih Simon cu a thawh i, "Na thinphang hlah, atu thawk in mi na tlai cang hna lai," tiah a ti.

LUKA 5:11

Lawng cu tikam ah an hnuh i zeizong vialte kha an kaltak i Jesuh kha an zulh.

LUKA 5:28

Levi cu a tho i, zeizong vialte kha a kaltak i a zulh.

LUKA 5:12

Voi khat cu khua pakhat ah hin Jesuh cu a um i cuka ah cun thinghmui zawtnak nih a tuam in a tuammipa pakhat a rak um. Jesuh kha a hmuh tikah a hmaiah khan a bawk i, "Bawipa, na duh ahcun na ka thianter khawh," tiah a nawl.

LUKA 5:13

Jesuh nih cun a kut a hei samh i a hei tawngh. "Damter kan duh, thiang ko," tiah a ti. Chikkhatte ah thinghmui zawtnak nih cun a kaltak.

LUKA 5:16

Hnathiannak hmun ah khan a kaltak tawn hna i khika ah khan thla a va cam tawn.

LUKA 5:17

Ni khat cu Jesuh nih a cawnpiak hna lioah khan Farasi mi tlawmpal hna le Phungbia cawnpiaktu saya hna, Galilee ram le Judea ram khuazakip in le Jerusalem khua in a rami hna kha a pawngah cun an ṭhu. A zawmi damternak ding caah khan Bawipa ṭhawnnak cu Jesuh sinah khan a um.

LUKA 5:18

Mi tlawmpal nih khin a zengmipa pakhat kha a ihkhun in an hun zawnh i an ra. Inn chungah khan vun luhpi i Jesuh hmaika i vun chiah kha an i tim.

LUKA 5:19

Sihmanhsehlaw mi an tam tuk caah zei ti hmanh in an luhpi kho lo. Cucaah inncung ah an kaipi i inn cihmi lungtlap kha an ṭhial hna hnuah a ihkhun cun mizapi laifang ah cun Jesuh hmaika ah khan an vun thlak.

LUKA 5:20

Jesuh nih zeitluk in dah an zumh ti kha a hmuh tikah mipa cu a thawh i, "Ka kawi, na sualnak cu ngaihthiam na si cang," tiah a ti.

LUKA 5:21

Cu tikah Phungbia cawnpiaktu saya hna le Farasi mi hna cu anmah le anmah kha, "Pathian a thangchiatmi pa hi ahodah a si? Ahohmanh nih sual thlahpiak khawh a si ṭung lo, Pathian lawng nih pei thlahpiak khawh a si ko cu," tiah an i ceih.

LUKA 5:23

'Na sualnak cu ngaihthiam na si cang,' ti maw a fawi deuh, 'Tho law kal tuah,' ti dah a fawi deuh?

LUKA 5:24

Cucaah vawlei cungah hin Mi Fapa nih sual ngaihthiam khawhnak nawl a ngei ti kha nannih sinah ka langhter lai," tiah a ti hna. Cucaah mizengpa cu a thawh i, "Tho law na ihkhun kha i cawi law inn ah va ṭin," tiah a ti.

LUKA 5:25

Cun an hmaika ah cun hmakhatte ah a tho i a ihnak ihkhun cu aa cawi i Pathian thangṭhat pah in inn ah a ṭin.

LUKA 5:26

An dihlak in an khuaruah a har ko. Ṭihnak in an khat i Pathian cu an thangṭhat i, "Nihin i kan hmuhmi thil cu khuaruahhar an va si dah!" tiah an ti.

LUKA 5:29

A hnuah Levi nih khan a inn ah cun Jesuh kha rawl danghnak nganpi a tuahpiak i ngunkhuai khawltu tampi hna le midang hna kha an sinah cun an ṭhu.

LUKA 5:30

Cun Farasi mi tlawmpal hna le anmah bu chung um a simi Phungbia cawnpiaktu saya hna kha Jesuh zultu sinah cun an zai i, "Zeicahdah ngunkhuai khawltu hna le misual mi hna he rawl nan ei ṭi?" an ti.

LUKA 5:31

Jesuh nih a thawh hna i, "A dammi nih sibawi an herh lo, a zawmi lawnglawng nih an herh.

LUKA 5:32

Sualnak kan ngei lo tiah aa ruatmi hna kha i ngaihchih u ti awkah ka ra lo, misual mi tu kha, i ngaichih u tiin kawh awkah ka ra," tiah a ti.

LUKA 5:34

Jesuh nih a leh hna i, "Nupi ṭhit rawl danghnak ah, nupi ṭhitupa cu an sin i a um chungah khan sawmmi hna cu rawl ulhter awk a si, tiah nan ruat maw? Nan ruat hrimhrim lai lo.

LUKA 5:35

Sihmanhsehlaw nupi ṭhitupa an sin in a chuah caan kha a phan ko lai i cu tikah cun rawl cu an ul te ko lai," tiah a ti.

LUKA 5:39

Cun mitsur hang a hlunmi din hnuah ahohmanh nih a thar kha an duh lo. 'A hlun kha a thar nakin a thaw deuh,' an ti," tiah a ti.

LUKA 6:9

Cun Jesuh nih annih cu a thawh hna i. "Bia kan hal hna: kan Phung nih sabbath ni ah zei tuah dah a kan onh? Ṭhatnak tuah maw ṭhat lonak tuah dah? Mi nunnak khamh maw mi nunnak hrawh dah?" tiah a ti.

LUKA 6:10

Annih cu a mit in a zoh duahmah hna i, cu hnuah mipa kha a thawh i, "Na kut kha samh," tiah a ti. A kut cu a samh i a dam.

LUKA 6:12

Cu caan lioah cun ni khat cu tlang cungah thlacam awkah a kal i zan khuadei Pathian sinah thla a cam.

LUKA 6:13

Khua a dei tikah a zultu kha a kawh hna i hleihnih a thim hna i lamkaltu tiah a ti hna.

LUKA 6:17

Tlang cung cun an sinah a rung ṭum hnuah Jesuh cu hmunrawn pakhat ah a zultu mi tampi hna sinah khan a dir. Cuka ah cun mi tampi an um i cu hna cu Judea ram khuazakip le Jerusalem khua le rilikam khua a simi Tair le Sidon khua in a rami an si;

LUKA 6:18

annih an ratnak cu a bia theih duh le an zawtnak damnak hmuh duh ah a si. Thlarau ṭhalo nih awlok a chonhmi hna zong kha an ra i a damter hna.

LUKA 6:19

A chungin ṭhawnnak kha a chuah caah mi nih cun an dihlak in amah tawngh kha an i zuam i an dihlak in a damter hna.

LUKA 6:20

Jesuh nih a zultu kha a zoh hna i a thawh hna i, "Nannih sifakmi hna i lawm u, Pathian Pennak cu nanmah ta a si.

LUKA 6:21

Nannih atu i rawl a ṭammi hna i lawm u, Nan paw a khim lai. Nannih atu i a ṭapmi hna i lawm u, Nan ni lai.

LUKA 6:22

Mi Fapa ruangah mi nih an in huat hna i an in hlawt hna i an in serhsat hna i miṭhalo an in ti hna tikah i lawm ko u.

LUKA 6:23

Cu ni ah cun i lawm u law a lam in lam u, zeicahtiah nan caah vancung ah laksawng nganpi chiahpiak nan si. Cu bantuk te cun pei an pupa hna nih khan profet hna kha an rak tuah hna cu.

LUKA 6:26

Mi vialte nih, an in chimthiam hna tikah nan caah ngaihchia a va si dah; zeicahtiah cuti te cun pei an pupa hna nih khan nal profet kha an rak ti hna cu," a ti.

LUKA 6:27

"Nannih ka bia a theimi hna, nan ral kha va daw hna u, an huatu hna cungah khan ṭhatnak va tuah u,

LUKA 6:28

chiat an serhtu hna kha thla va campiak hna u.

LUKA 6:29

Mi pakhatkhat nih na bel ah an bengh ahcun khattelei bel zong i chit rih; pakhatkhat nih na angkileng an chuh ahcun na angki chungnawh zong va pe rih.

LUKA 6:30

Thil zeimaw an halmi paohpaoh kha va pe hna, cun mi pakhatkhat nih na ta a simi kha aa lak ahcun va hal ṭhan ti hlah.

LUKA 6:31

Ka tuahpiak hna seh ti na duhmi kha mi va tuahpiak hna.

LUKA 6:32

"Nangmah an dawmi lawng kha na dawt hna ahcun zeicahdah thluachuah hmuh cu naa ruah? Misual mi hmanh nih anmah a dawtu hna cu an dawt ve ko ṭung hna.

LUKA 6:33-34

Cun na cung i ṭhatnak a tuahmi cung lawng i ṭhatnak na tuah ve ahcun, zeicahdah thluachuah hmuh cu naa ruahchan? Misual mi hna zong nih misual vemi hna sinah khan an cawihmi hna zat hmuh ṭhan dingah cun an coih ve ko ṭung hna.

LUKA 6:35

Cuticun nan tuah awk a si lo. Nan ral kha daw hna u, an cungah khan ṭhatnak tuah u, chaw kha mi va cawih hna u law ka hmuh ṭhan lai, tiah ruahchannak ngei hlah u. Laksawng tampi nan hmuh lai i Cung Nung Bik Pathian fa nan si lai, zeicahtiah amah cu miṭhalo mi hna le lawmh hmanh a duh lomi hna cung hmanh ah a ṭha.

LUKA 6:36

Nan Pa cu mi zaangfah thiam a si bantukin nannih zong mi zaangfah thiammi si ve u," tiah a ti.

LUKA 6:37

"Midang kha va soi hna hlah u law nannih zong Pathian nih an soi ve hna lai lo; midang kha sual va phaw hna hlah u law nannih zong Pathian nih sual an phaw ve hna lai lo; midang kha an sualnak va ngaithiam hna u law nannih zong Pathian nih nan sualnak an ngaihthiam ve hna lai.

LUKA 6:38

Midang kha thil va ṭhen hna u, nannih zong Pathian nih an ṭhenh ve hna lai: liam thluahmah in, nan i chap khawh chungin, nan zawi khawh le khawh loin nan kut chungah an thlet hna lai. Midang ca i nan hmanmi tahnak rel kha Pathian nih nanmah ca zongah a hman ve lai," tiah a ti.

LUKA 6:41

"Na mit chung i a ummi thingtan kha ruat ṭung loin zeicahdah na unau mit i mithnawm pelte a ummi cu zoh na duh?

LUKA 6:42

Na mit chung i a ummi thingtan cu hmu ṭung loin zeitindah na unaupa cu, "Ka nau, na mithnawm kha in cawihpiakning," na ti khawh? Mi depde. Na mit chung i thingtan kha chuah hmasa law pei na unau hna mit chung i a ummi mithnawm hme tete cu na hmuh khawh lai i na cawih khawh lai cu," tiah a ti.

LUKA 6:43

"A ngan a dammi thingkung nih thei chia a tlai lo, thingkung ṭhalo zong nih thei ṭha a tlai ve lo.

LUKA 6:45

Miṭha nih a lung chung i thil ṭha a khonmi chung khan ṭhatnak a chuahter; miṭhalo nih a lung chung i thil ṭhalo a khonmi chung khan chiatnak a chuahter. Zeicahtiah mi nih a kaa in a chimmi hi a lung chung i a khatmi kha a si," tiah a ti.

LUKA 6:46

"Zeicahdah nannih nih, 'Bawipa, Bawipa,' nan ka ti len ko i kan chimhmi hna cu nan tuah ṭung lo?

LUKA 6:47

Ka sinah a ra i ka bia a ngai i a zulmi cu zei he dah aa lawh ti kha kan hmuhsak hna lai.

LUKA 6:48

Amah cu inn a sami bantuk a si: thuk piin a cawh i a hram kha lungpi cungah a bunh. Tiva cu a hung lian i inn cu a hun den, sihmanhsehlaw fek tein sak a rak si caah a hninh in a hnin kho lo.

LUKA 6:49

Sihmanhsehlaw ka bia a thei i a zul ṭung lomi cu a hram ṭha tein ser hmasa loin inn a sa menmi bantuk a si; tilian nih cu inn cu a hun den tikah chikkhatte ah a pur i a tlu ruangmang ko," a ti.