Nitin Baibal Relnak

LAMKALTU 23:9

An aukhuan cu a thang deuh lengmang i Phungbia cawnpiaktu saya cheukhat, Farasi mi pawl a simi kha an dir i fak piin an al hna i, "Hi pa hi a palhnak zeihmanh kan hmu kho lo. Thlarau nih maw vancungmi nih dik a chawnh taktak ko lai," an ti.

LAMKALTU 23:11

Cu zan ah Bawipa cu Paul pawngah khan a dir i, "Na lung ṭhul hlah. Jerusalem khua ah keimah tehte na sinak kha na chim cang, cu bantuk ṭhiamṭhiam in Rom khua zongah na tuah hrimhrim lai," tiah a ti.

LAMKALTU 23:12

A thaizing ah Judah mi a cheukhat kha hmunkhat ah an i tong i khua an khang. Paul kan thah hlanah cun rawl zong kan ei lai lo, ti zong kan ding lai lo, tiah biakamnak an tuah.

LAMKALTU 23:16

Sihmanhsehlaw cu an khuakhanmi cu Paul far fapa nih a theih i cucaah ralhruang chungah khan a va lut i Paul kha a chimh.

LAMKALTU 24:1

Ni nga hnuah Tlangbawi Ngan Ananias cu upa tlawmpal le sihni Tertullas he Sisaria ah khan an kal. Mangki bawi Feliks hmaiah khan an chuak i Paul sual an phawtnak bia cu an chim.

LAMKALTU 24:5

Hi pa hi hnahnawhnak a tuah lengmangtu, mi ṭihnung a si tiah kan hmuh; vawleicung khuazakip ah Judah mi hna lakah khan hnahnawhnak a thawhter lengmang i amah hi mibu bu khat Nazareth khuami mibu timi a hruitu hna a si.

LAMKALTU 24:10

Mangki bawipa nih khan Paul cu bia chim ve tuah tiah a kut a hei zaoh i Paul nih cun, "Nangmah cu hi miphun hna cungah kum tampi biaceihtu na si cang ti kha ka hngalh i cucaah nangmah hmai i humhaknak bia chim hi ka saduhthah ngaingaimi a si.

LAMKALTU 24:11

Nangmah nih na hngalh khawh ko bantukin, Jerusalem khua i Pathian biak awkah ka hung kal cu ni hleihnih nakin a tam rih lo.

LAMKALTU 24:14

Hi bel hi ka tuah tiah nangmah hmaiah ka ti khawh: Kei cu Lam thar a zulmi ka si (annih nih cun bu thar tiah an ti) i cu ti ning cun kan pupa hna Pathian cu ka biak; zeicahtiah Moses Phungbia chung i aa ṭialmi vialte le profet hna cauk chung i aa ṭialmi vialte kha ka zumh i Pathian i bochan in

LAMKALTU 24:15

hi sual a ka phawtu hna zong nih an i ruahchan vemi, minung hi mi ṭha he mi ṭhalo he thihnak in kan tho ṭhan dih lai, ti hi kaa ruahchanmi a si ve.

LAMKALTU 24:16

Cucaah Pathian hmai le minung hmaiah chiaṭha thleidannak thiang ka ngeih khawh nakhnga kaa zuam khawh chungin kaa zuam.

LAMKALTU 24:17

"Jerusalem khua in kum tam nawn ka chuah hnuah, ka mi hna cu tangka tlawmpal va pek awk le raithawinak va tuah awkah cuka ah cun ka hung kal.

LAMKALTU 24:19

Sihmanhsehlaw cuka ah cun Asia ram in a rami Judah mi tlawmpal bel an um; annih nih sualphawt awk an ka ngeih a si ahcun bia chimtu dingah anmah cu pei zung ah hin ra chuah awk an si cu.

LAMKALTU 24:21

an hmai i ka dir lio i ka chimmi cu hi bel hi a si: Mithi hna cu nunnak ah an tho ṭhan lai, ti ka zumh ruangah nannih nih nihin ah hin taza nan ka cuai hih, ka ti hna," tiah a ti.

LAMKALTU 24:22

Cu Lam kong fiang tein a hngalmi Feliks nih cun an bia cu a donghter i, "Nan bia cu ralkapbu haotu Lisias a rat tikah ka khiah te lai," tiah a ti hna.

LAMKALTU 24:24

Ni tlawmpal hnuah khin Feliks cu a nupi Drusilla he an ra; a nupi cu Judah mi a si. Paul cu ra seh tiah an hei cah i Paul nih Khrih Jesuh zumhnak kong a chimmi kha a ngaih.

LAMKALTU 24:25

Sihmanhsehlaw Paul nih ṭhatnak kong tehna, mah le mah i sumnak kong tehna, a ra lai dingmi Biaceihnak Ni kong tehna a vun chim tikah Feliks cu a thin a phang i, "Atu cu va kal ko rih; caan ka ngeih tikah kan auh ṭhan te lai," tiah a ti.

LAMKALTU 24:27

Kum hnih a luan tikah Feliks cu Porsias Festas nih a hun thlen. Feliks nih Judah mi nih ka duh hna seh ti kha a duh caah Paul kha thong chungah khan a chiahtak.

LAMKALTU 25:1

Cu peng chungah Festas cu a ra phak hnu ni thum ah Sisaria in Jerusalem khua ah a kal.

LAMKALTU 25:2

Cuka ah cun tlangbawi upa pawl hna le Judah mi hruitu hna nih khan Paul sual an phawtnak cu an rak chimh.

LAMKALTU 25:3

Paul cu lam ṭim i rak thah awk kha khua an khan caah Festas cu zaangfahnak tein Paul cu Jerusalem ah ratter ko tiah an nawl.

LAMKALTU 25:4

Cun Festas nih cun a leh hna i, "Paul cu Sisaria ah thong chungah a um ko i keimah zong khika ah tuan ah ka kir lai.

LAMKALTU 25:5

Mipa nih hin palhnak a tuah a si ahcun, nan haotu hna kha ka sinah kal hna seh law taza cuai hna seh," tiah a ti.

LAMKALTU 25:7

Paul cu a hung phanh tikah Jerusalem in a rami Judah mi hna kha a velchum cun an dir i hi pa nih hin sual fak tampi a tuah tiin sualphawt hram kha an thawk, sihmanhsehlaw an puhmi kha ahmaan tiah an ti khawhmi a um lo.

LAMKALTU 25:8

Cun Paul nih khan aa thawh i, "Judah mi Phung kongah siseh, biaknak inn kongah siseh, Rom siangpahrang kongah siseh, zeihmanh sualnak ka tuah lo," tiah a ti.

LAMKALTU 25:9

Festas nih khan Judah mi nih hung ka daw hna seh ti a duh caah Paul cu a thawh i, "Hi sual an in puhmi ruangah hin Jerusalem khua ah kal i ka hmaiah biaceih na duh maw?" tiah a hal.

LAMKALTU 25:10

Paul nih aa thawh i, "Siangpahrang biaceihnak zung hrimhrim ah ka chuak lai, khika ah bia cu ka ceih hna seh. Nangmah nih fiang tein na hngalh bantukin Judah mi cungah zeihmanh ṭhat lonak ka tuah lo.

LAMKALTU 25:11

Nawlbia kha buar i thihnak tlak thil ka tuah a si ahcun, cu chungin luatternak cu kan hal lo. Sihmanhsehlaw an ka puhmi ah hin biatak zeihmanh a um ṭung lo ahcun ahohmanh nih an kut chungah nan ka chan kho lai lo. Siangpahrang sinah azu ka khan," tiah a ti.

LAMKALTU 25:13

Cu hnu tlawmpal ah cun Agrippa Siangpahrang le Bernis cu Festas kha hung chawnh ta awkah Sisaria khua ah khan an ra.

LAMKALTU 25:22

Agrippa nih Festas cu a thawh i, "Hi pa hi keimah hrim nih theih ka duh ve," tiah a ti. Cun Festas nih cun, "Thaizing ah na theih lai," tiah a leh.

LAMKALTU 26:1

Agrippa nih cun Paul cu a thawh i, "Na kong kha nangmah nih i chim tuah," tiah a ti. Paul nih cun a kut kha a hun zao i a sual lonak kong kha hitihin a chim:

LAMKALTU 26:6

Cun hika i biaceih awk i ka dir zong hi Pathian nih kan pupa hna sinah biakamnak a rak tuahmi chung i ruahchannak ka ngeih ve ruangah hin a si —

LAMKALTU 26:7

cu ka ruahchanmi cu kan miphun phu hleihnih hna nih Pathian kha chun he zan he an rak biak tikah kan hmuh te lai tiin an rak i ruahchanmi ṭhiamṭhiam kha a si ko. Cu ruahchannak ruangah cun, Bawipa, Judah mi nih sual an ka puh hi a si.

LAMKALTU 26:13

Lam i kan kal lioah cun, chunlai ah khin, maw Bawipa, vancung in keimah le keimah he a kal ṭimi hna velchum i ni nakin a ceu deuhmi ceu a rung ceu cu ka hmuh.

LAMKALTU 26:14

Kan dihlak in vawlei ah kan tlu i Hebru holh in aw pakhat nih a ka chawnh kha ka theih i, 'Saul, Saul, zeicahdah na ka hrem? Fungzum chuih hi nangmah caah dah kaw a fah ko,' tiah a ka ti.

LAMKALTU 26:15

Cun kei nih, 'Ahodah na si, Bawipa?' tiah ka ti i, 'Keimah cu na hremmi Jesuh ka si.

LAMKALTU 26:16

Sihmanhsehlaw tho law na ke in dir tuah. Nangmah cu ka sal i ser kan duh caah na sin i ka langh hi a si; nihin i keimah kong na hmuhmi le hmailei i kan hmuhsak dingmi thil kha, nangmah nih midang kha na chimh hna lai.

LAMKALTU 26:17

Nangmah cu kan thlah lainak miphun Israel mi hna le Jentail mi hna sinin kan khamh lai.

LAMKALTU 26:18

Nangmah nih an mit kha na deiter hna lai i muihnak in ceunak ah, Satan pennak in Pathian pennak chungah na nunter hna lai; cun keimah an ka zumhnak thawngin an sual ngaihthiamnak kha an hmuh lai i Pathian thimmi hna lakah an i tel ve lai, tiah Bawipa nih cun a ti," tiah a ti.

LAMKALTU 26:20

A hmasa bik ah Damaskas khua le Jerusalem khua ah, cun Judah mi hna umnak ram dihlak ah, cun Jentail mi hna sinah, 'Nannih nih nan sualnak kha i ngaichih u law Pathian leiah khan i mer u law nan i ngaihchihnak a langhtertu thil kha tuah hna u,' tiah ka ti.

LAMKALTU 26:21

Hi ruangah hin pei Judah mi nih biakinn chung ka um lio i an ka tlaih i thah an ka zalh kha a si ko cu.

LAMKALTU 26:22

Sihmanhsehlaw nihin ni tiangah hin Pathian nih a ka bawmh i cucaah cun hika zongah hin a hme sin he a ngan sin he ka hngalhnak bia ka chim khawhnak hi a si. Ka chimmi hi profet hna le Moses nih a si te lai tiah an rak chimmi hrimhrim kha a si:

LAMKALTU 26:23

cucu zeidah a si tiah, Judah mi hna le Jentail mi hna sinah khamhnak ceunak thanh awk caah, Messiah nih cun fahnak kha a in a hau lai i thihnak in a tho ṭhan hmasa bikmi a si lai, ti hi a si ko," tiah a ti.

LAMKALTU 26:27

Agrippa Siangpahrang, profet cu na zum hna maw? Na zumh hna tiah ka hngalh," a ti.

LAMKALTU 26:28

Agrippa nih Paul cu a thawh i, "Fawi tuk in hen pei Khrihfa ah canter na ka zalh cu," tiah a ti.

LAMKALTU 26:29

Paul nih cun, "A fawi ah siseh, a har ah siseh, Pathian sinah ka thlacamnak cu nangmah le nihin i ka bia a theimi vialte hi keimah bantuk si ve u law ti hi a si — hi thir cincik bel chim lo hin," tiah a ti.

LAMKALTU 27:1

Itali ram ah tilawng in nan kal lai tiah bia an kan khiahpiak tikah, Paul le a dang thongtla tlawmpal hna kha Rom ralkap chung i "Siangpahrang Ralkapbu" timi haotu Julias sinah khan an pek hna.

LAMKALTU 27:6

Cuka ah cun ralbawipa nih khan Alekzandria khua in Itali ram ah a kal dingmi lawng pakhat a hmuh i cu lawng ah cun a kan citter.

LAMKALTU 27:8

Rilikam naih te khan kan kal thliahmah i har ngaiin Lawng Dinhnak Hnangam timi kha kan phan i cu lawng dinhnak cu Lasia khua in a hla lo.

LAMKALTU 27:9

Cuka ah cun saupi kan cam i Tlanhnak Ni zong kha a luan cang caah hmailei i kal ding cu ṭihnung a si cang. Cucaah Paul nih cun ruahnak a pek hna i,

LAMKALTU 27:10

"U le nau hna, hika in hmailei kan kalnak ding hi ṭihnung ngaimi a si lai tiah ka hngalh; nan thil phorhmi le lawng zong nih hin rawhralnak an hmu sual lai i nunnak hlohnak zong a um ko lai," tiah a ti hna.

LAMKALTU 27:11

Sihmanhsehlaw ralbawipa kha lawng cawngtu bawile a ngeitu hna nih an chimmi bia tu kha a lung ah a lut deuh i Paul chimmi bia kha cu a lut kho lo.

LAMKALTU 27:20

Ni tampi, ni siseh, arfi si hna seh, hmu kho loin kan um i thlitu cu fak piin a hrang lengmang ko. A donghnak ah cun nun lai hmanh kha kan i ruah ngam ti lo.

LAMKALTU 27:21

Cuticun mi cu rawl loin saupi an um tikah Paul cu an hmaiah a dir i, "U le nau hna, ka bia rak ka ngaiin Krit tikulh khan chuak loin rak um u si law, hi harnak le sunghnak vialte hi kan tong hnga lo.

LAMKALTU 27:22

Sihmanhsehlaw atu cu nan lungdong hlah u, tiah kan nawl hna. Pakhat hmanh kan thi lai lo, lawng bel hi a rawk lai.

LAMKALTU 27:23

Zeicahtiah ka biak i a ta ka simi Pathian vancungmi kha zahan ah ka sinah a ra i,

LAMKALTU 27:24

'Paul, na thinphang hlah. Siangpahrang hmaika ah cun na dir ṭhiamṭhiam ko lai; cun Pathian nih amah ṭhatnak thawngin nangmah sinah a kalmi vialte an nunnak hi nangmah kha an pek,' a ka ti.

LAMKALTU 27:25

Cucaah u le nau hna, nan lungdong hlah u. Zeicahtiah a ka chimh bantukte cun a si ko lai tiah Pathian kha ka zumh.

LAMKALTU 27:27

A zan hleinganak a si cang i Mediterranean rili ah cun thlichia nih cun a kan choih cuahmah ko. Zanṭim hrawngah khin lawngcawng pawl nih cun tlang kan naih rua tiin an lung a hring nawn.

LAMKALTU 27:31

Sihmanhsehlaw ralbawipa le ralkap hna cu Paul nih khan, "Hi lawngcawng pawl hi lawng cung i an um peng lo ahcun nan nung lai lo," tiah a ti hna.

LAMKALTU 27:33

Khua a hung dei dengmang i Paul nih an dihlak in rawl ei u tiah a nawl hna. "Ni hleili chung awlokchong in nan um i hi chung vialte rawl zeihmanh nan ei lo.

LAMKALTU 27:34

Cucaah nan nunnak ding caah hin nan herh caah rawl ei u tiah kan nawl hna. Nan lu cung samfa fa khat hmanh a lo lai lo," tiah a ti.

LAMKALTU 27:35

Hi bia a chim dih in Paul nih cun rawl kha aa lak i an hmaika ah cun Pathian sinah thla a cam hnuah a ei.

LAMKALTU 27:37

Lawng cung i a ummi cu kan dihlak in za hnih sawm sarih le paruk kan si.

LAMKALTU 27:39

Khua a hung dei tikah lawngcawng hna nih khan titlang cu khuazei a si kha an hngal kho lo, sihmanhsehlaw ti fonghlei pakhat kha an hei hmuh i a si khawh ahcun khika ah khan lawng cu kan dinhter lai an ti.

LAMKALTU 27:41

Sihmanhsehlaw lawng cu thetse tlang ah aa su khut i a tap ai. Lawng cu a hmailei kha thetse chungah cun aa bunh i cawlcang kho ti loin a taan lioah khan a hnulei tu cu tilet nih khan kuai cuahmah in a den ṭualmal ko.

LAMKALTU 27:42

Ralkap nih khan thongtla vialte hi kan thah dih hna lai, pakhat hmanh i leuh in luat hna hlah seh, an ti.

LAMKALTU 27:43

Sihmanhsehlaw ralbawipa nih khan Paul kha khamh a duh caah a thlauh hna. Cucaah aa leuh khomi paoh tikam leiah i leuh u, tiah nawl a pek hna;

LAMKALTU 27:44

cun a taangmi pawl nih cun thingpheng zeilo ṭukṭak le lawng kuaimi pelpawi kha an i tlaih cio i an zulh hna. Cuticun kan dihlak in him tein titlang ah kan chuak.

LAMKALTU 28:1

Titlang i him tein kan chuah dih tikah cu tikulh cu Malta tikulh a si ti kha kan hngalh.

LAMKALTU 28:2

Cuka rammi hna cu kan cungah an ṭha ngaingai. Ruahpi a sur i khua a sik, cucaah meiphu an kan tihpiak i hung to u tiah an kan ti.

LAMKALTU 28:3

Paul cu thinghreu kha a khawmh i mei ah khan a tih hna. Mei nih cun a hun linh caah thing chung cun rul a hung chuak i Paul cu a kut ah a cuk i aa thlai ko.

LAMKALTU 28:4

Cuka rammi hna nih rul kha Paul kut i aa thlai ko cu an hmuh tikah pakhat le pakhat kha, "Hi pa hi lainawng a si ṭheo lai, rili in luat hmanh seh law khuazing nih nunter a duh lo i a si ko," an ti.

LAMKALTU 28:5

Sihmanhsehlaw Paul nih khan rul cu mei chungah khan a vun thin i amah cu zei ti hmanh in a um lo.

LAMKALTU 28:6

Zeitik ah dah a hung phin unman lai, asilole zeitik ah dah a tluk lai i a thih lai ti lawng kha an rak zoh ko. Sihmanhsehlaw caan saupi an ngan hnu i zeiti hmanh in a um lo tikah an lung an i let i, "Hi pa hi pathian a si ko lai," an ti.

LAMKALTU 28:7

Cuka hmun in lamnai nawn ah khin cuka tikulh a uktu bawi Publius lo kha an um. Ṭha tein a kan tlunter i ni thum chung cu a khual kan si.

LAMKALTU 28:8

Publius pa cu raifanh le thisen chungtlik in a zaw i a ril ko; Paul nih khan a khaan chungah khan a vung luhhnawh i thla a campiak i a cungah a kut a chuan i a damter.

LAMKALTU 28:9

Hi thil thawng hin cuka tikulh i a ummi mizaw vialte kha an ra i damnak kha an hmuh.

LAMKALTU 28:15

Rom khua i a ummi unau pawl nih kan thawng kha an rak theih i Appius Chawdawrnak Hmun timi hmun le Khual Buk Pathum tiang khan an rak kan don. Paul nih a hmuh hna tikah Pathian kha a lawmh i a thazang a tlung.

LAMKALTU 28:17

Ni thum hnuah cuka i a ummi Judah mi hruaitu hna kha Paul nih cun pumh a sawm hna. An i pumh tikah a thawh hna i, "Ka u le ka nau hna, kan miphun cungah siseh, kan pupa hna sinin kan hmuhmi kan phunglam cungah siseh ṭhat lonak zeihmanh ka tuah lo nain Jerusalem ah thong ah an ka thlak i Rom mi hna kut chungah an ka chanh.

LAMKALTU 28:20

Cucaah cun nannih hmuh le biaruah kan duhnak hna cu a si; hi thir cikcin in an ka khihnak hi Israel mi nih an rak i ruahchan zungzalmi pa ruangah a si," tiah a ti hna.

LAMKALTU 28:22

Sihmanhsehlaw na ruahnak cu theih kan duh ko, zeicahtiah hi nan phu hi khuazakip ah mi nih an thangchiat lengmangmi a si," an ti.

LAMKALTU 28:23

Cucaah ni an i tuk i cu ni ah cun Paul umnak ah khan tampi an ra. Zinglei in zan tiang Pathian Pennak kong kha a chimh hna i a fianter hna. Jesuh kong ah an lung a pem khawh nakhnga Moses Phungbia chungin le profet hna ṭialmi chungin bia kha a lak hna.

LAMKALTU 28:24

A cheu cu an lung a pem, sihmanhsehlaw a cheu nih cun an zum lo.

LAMKALTU 28:25

Paul nih hi thil pakhat hi a chim hnuah anmah lakah khan lung i rual lo ngaiin an ṭian. Cu a chimmi cu hihi a si: "Thiang Thlarau nih profet Isaiah thawngin nan pupa hna sinah a chimmi bia cu a va hmaan thiam dah.

LAMKALTU 28:26

A chimmi cu: Va kal law hi mi hi va chim hna, A ngaih cu nan i ngaih sek ko lai, sihmanhsehlaw nan hngal lai lo; A zoh cu nan i zoh sek ko lai, sihmanhsehlaw nan hmu lai lo.

LAMKALTU 28:27

Zeicahtiah hi mi hna lung cu a pit i an hna cu a chet i an mit cu a caw. Cuticun si hna hlah seh law cu an mit nih khan khua a hmuh hnga i an hna nih khan a theih hnga i an lung nih khan a hngalh hnga i Ka sinah khan an ra kir hnga i ka damter hna hnga, tiah Pathian nih a ti, ti hi a si," tiah a ti.

LAMKALTU 28:28

Cun Paul nih cun a donghnak ah, "A si ahcun Pathian khamhnak bia cu Jentail mi hna sinah thlah a si cang. Annih nih cun an ngaih lai," tiah a ti hna. 

LAMKALTU 28:30

Kum hnih chung Paul cu khika ah inn aa hlan i a um; amah chawnhbiak awkah a rami vialte kha a rak lawmh hna.

LAMKALTU 28:31

Pathian Pennak kong kha a chimh hna i Bawipa Jesuh Khrih kong kha a cawnpiak hna i ralṭha ngai le zeihmanh dawntu um loin a chimh hna.