Nitin Baibal Relnak

2 KORIN 1:1

Pathian duhnak in Khrih lamkaltu a simi keimah Paul le kan nau Timote nih, Korinth khua chung i a ummi Pathian Khrihfabu le Grik ram chung i a ummi Pathian mi vialte nan sinah ca kan in kuat hna.

2 KORIN 1:3

Kan Bawipa Jesuh Khrih i a Pa le a Pathian, zaangfahnak in a khatmi kan Pa, zeizong vialte ah a kan bawmtu Pathian cu lawm u sih!

2 KORIN 1:4

Harnak kan innak kip ah a kan hnemh caah kannih zong nih harnak a phunphun in a ingmi kha kan hnemh khawh ve hna i kan hnemh hnanak ah cun Pathian sinin hnemhnak kan hmuhmi kha kan hman.

2 KORIN 1:5

Khrih nih a inmi temhinnak tampi cu kannih zong kan i hrawm ve bantukin Khrih hnangamnak zong cu kan i hrawm ve.

2 KORIN 1:6

Temhnak kan in ahcun nanmah hnangamnak le khamhnak caah a si; cun hnangamnak kan hmuh ahcun nannih zong nih nan hmuh ve i kan inmi temhnak kha lungsau in nan in khawh ve nakhnga thazang pek nan si.

2 KORIN 1:8

U le nau hna, Asia peng chung i harnak kan tonmi kha hngalhter ṭhan kan in duh hna. Kan cung i an kan khinhmi thil kha rak rit tuk, rak ngan tuk kaw, nun lai hmanh kan i ruah lo.

2 KORIN 1:9

Kannih cu thi dingin biakhiah kan si ko cang tiin kan i ruah. Asinain hi ti thil a rak um cu kanmah le kanmah kha i bochan loin, mithi a thawhtertu Pathian kha kan i bochan deuhnak hnga caah a rak si.

2 KORIN 1:10

Cu tlukin ṭih a nungmi thihnak chungin a kan khamh i hmailei zongah a kan khamh ko lai.

2 KORIN 1:14

Atu cu nan kan hngalhnak hi a tlam a tling lo ngai, sihmanhsehlaw tlamtling tein nan hun kan hngalh te lai ti kha ka zumh i Bawipa Jesuh ni ah cun kan i chawrmi cu nanmah nan si lai bantukin nan i chawrmi zong kanmah kan si ve te lai.

2 KORIN 1:19

Zeicahtiah Silas le Timote le keimah nih kan in chimhmi hna Jesuh Khrih, Pathian Fapa cu, "E,e," "Ai,ai," aa cawhmi a si lo. Amah cu Pathian "E" a si ko;

2 KORIN 1:21

Nanmah he kanmah he Khrih ta kan si ti fiang tein a kan hngalhtertu cu Pathian hrimhrim kha a si; amah ca i a kan thleidangtu cu Pathian ṭhiamṭhiam kha a si,

2 KORIN 1:22

Pathian nih cun amah ta kan sinak hmelchunhnak kha kan cungah a khenh i kan ca i a kan chiahpiakmi a dihlak aamahkhan caah khan kan lung chungah Thiang Thlarau kha a kan pek.

2 KORIN 2:7

Atu cu nannih nih nan ngaihthiam awk le thazang nan pek awk a si, a ngaih a chiat tuk ahcun a lung a dong sual lai.

2 KORIN 2:11

cuti ka ngaihthiam cu Satan nih khan kan tei sual hlah seh ti ka duh caah a si, zeicahtiah Satan thil tining cu fiang tein kan hngalh ko.

2 KORIN 2:12

Khrih kong Thawng Ṭha kha chim awkah Troas khua ka phak tikah, Bawipa nih cu rian ṭuannak caah lam a ka onh ti kha ka hmuh.

2 KORIN 2:13

Sihmanhsehlaw kan nau Titas kha ka hmuh lo caah ka lungre a thei ngaingai. Cucaah cu ka mi cu, dam tein rung um u, tiah ka titak hna i Masidonia ram ah khan ka lan.

2 KORIN 2:14

Sihmanhsehlaw Pathian cu lawm ko u sih. Zeicahtiah Khrih teinak puai i a kal nuahmahmi mibu chungah khan kannih cu Khrih he kan i pehtlaihnak thawngin Pathian nih thongtla bantukin a kan hruai zungzal. Khrih kong hngalhnak cu khuazakip ah zihmui bantukin karhter awkah Pathian nih kannih cu a kan hman.

2 KORIN 2:15

Cucaah kannih cu Khrih nih Pathian sinah a pekchanhmi rimthaw zihmui bantuk kan si, cu zihmui cu khamh lio lengmangmi hna sin zong a phan i a tlau lio lengmangmi hna sin zong a phan.

2 KORIN 2:16

A tlau lio lengmangmi hna caah cun thihnak rimchia a si i khamh a si lio lengmangmi hna caah cun nunnak petu rimhmui a si. Cu bantuk rian cu aho nih dah a tuah khawh lai?

2 KORIN 2:17

Kannih cu Pathian bia kha, thil man fawi bantuk men in a tawngthammi hna bantuk kan si lo; kannih cu Pathian nih khan a kan thlah caah, amah hmaiah Khrih sal bantukin lungthin tak tein bia kan chim.

2 KORIN 3:1

Hiti kan ti tikah hin mah thangṭhat kan lo hoi hnga maw? Midang bantukin kannih zong nanmah ṭialpiakmi siseh, nanmah sin kuatmi siseh, thangṭhatnak ca i ken kan herh ve dahra?

2 KORIN 3:2

Kan ca kenmi cu nanmah kha pei nan si cu, kan lungthin cungah mi vialte hngalh awk le rel awkin ṭialmi cu.

2 KORIN 3:3

Hi ca a ṭialtu cu Khrih kha a si i kannih hi a phortu ah a kan hmanmi kan si. Cu ca cu lung cungah cahang in ṭial si loin minung lungthin cungah a nungmi Pathian Thlarau nih a ṭialmi a si.

2 KORIN 3:6

biakam thar rian a kan ṭuanter khotu cu, cu Pathian cu a si. Cu biakam thar chung i a ummi cu ṭialmi nawlbia kha si loin Thlarau tu a si. Ṭialmi nawlbia nih cun thihnak kha a chuahpi, sihmanhsehlaw Thlarau nih cun nunnak kha a chuahpi.

2 KORIN 3:7

Nawlbia cu lungtlap cungah khan cafang in ṭial a rak si i cu nawlbia cu annih kha pek a si lioah khan Pathian sunparnak cu a lang. Moses hmai i a rak ummi ceunak cu a lang. Moses hmai i a rak ummi ceunak cu a ziam zau ko nain cu ceunak cu a rak ṭhawn tuk caah khan Israel mi nih Moses kha dengteo in an rak zoh ngam lo. Thihnak tluntertu a simi Nawlbia hmanh, cu bantuk sunparnak he a rat a si ahcun,

2 KORIN 3:8

Thlarau rianṭuannak a sunparnak cu zeitluk in dah a ngan chinchin.

2 KORIN 3:9

Minung sual vun phawtnak rian hmanh cu tlukin a sunlawi ahcun, minung thian vun chehnak rian cu zeitluk in dah a sunlawi chinchin.

2 KORIN 3:13

Israel mi nih maw ka hmai i ceunak a ziamh le a loh hi hmu hna lai tiah Moses nih a hmai puan in a rak i khuh bantuk kha kannih cu kan si lo.

2 KORIN 3:14

An lungthin cu a rak i khar hrimhrim ko i nihin ni tiang zong hin biakam hlun cauk an rel caan paoh ah an lungthin kha, cu puan nih cun a huh ṭhiamṭhiam ko hna. Cu puan cu mi nih Khrih he an i pehtlaih tik lawngah aa hawk.

2 KORIN 3:16

Sihmanhsehlaw Cathiang nih, "Moses cu Bawipa lei i a hun i mer ah khan puan cu aa hawk," a ti bang khan cu puan cu aa hawk cang.

2 KORIN 3:17

Hi zawn i "Bawipa," a timi hi Thlarau a si i Bawipa Thlarau a umnak hmun paoh ah luatnak a um.

2 KORIN 3:18

Kannih caah hmai khuhnak puan kha a um ti lo caah kan dihlak in Bawipa sunparnak cu thlalang chung i kan mui a langh bang khin kan langhter; cuticun sungpar chin lengmang in amah lo chin lengmang ah thlen kan si i cucu Thlarau a simi Bawipa rianṭuannak cu a si.

2 KORIN 4:1

Pathian nih a kan zaangfah caah cu rian cu a kan ṭuanter i kan hnabei a dong bal lo.

2 KORIN 4:2

Ningzak a simi thil, a thli tein tuahmi thil vialte kha kan hlawt hna i ahohmanh hleng lo tein kan um, Pathian bia zong kha hlennak ah kan hmang bal lo. Biatak kha hlangfang tein kan chim i cuticun Pathian hmaika ah kan minung hawi cu nanmah nih nan chiaṭha thleidannak ningin kan chiat le kan ṭhat cu ruat ko u, kan ti hna.

2 KORIN 4:3

Kan chimmi Thawngṭha cu aa thuh a si ahcun, a tlau liomi hna ca lawngah aa thup a si lai.

2 KORIN 4:4

Annih nih zeicahdah an zumh lo ti ahcun, hi vawlei khuazing ṭhalo nih hin an lungthin cu mui lakah a chiah peng hna caah a si. An cung i a ceumi ceunak cu hmu loin a umter hna, cu ceunak cu Khrih sunparnak kong Thawngṭha in a rami a si i Khrih cu Pathian bantuk taktak a si.

2 KORIN 4:6

"Muihnak chungin ceunak hung ceu seh," tiah a titu Pathian ṭhiamṭhiam kha kan lung chungah amah ceunak a ceutertu cu a si; Khrih hmai cungah a ceumi Pathian sunparnak hngalhnak ceunak kha a kan pek.

2 KORIN 4:7

Asinain hi thlarau rothil a kengtu kannih hi tlak um bantuk men kan si, cu nih cun thil ti khawhnak ṭhawnnak hi kanmah ta si loin Pathian ta a si ti kha a langhter.

2 KORIN 4:8

Khatlei khatlei in an kan rial dip lengmang, sihmanhsehlaw kan kek ngaingai bal lo; lungawṭawm in kan um tawn, sihmanhsehlaw kan hnabei a dong bal lo;

2 KORIN 4:9

ral tampi kan ngei, sihmanhsehlaw hawi pakhat loin kan um bal lo; cei tein an kan ṭhuat tawn, sihmanhsehlaw kan thi taktak bal lo.

2 KORIN 4:10

Thih a thiammi kan tak cungah hin Jesuh thihnak kha kan i ken zungzal, zeicahtiah hi kan tak ṭhiamṭhiam ah hin Jesuh nunnak zong cu a langh ve nakhnga.

2 KORIN 4:11

Thih a thiammi kan pum ah hin Jesuh nunnak cu a langh khawh nakhnga Jesuh ruangah thihnak huat dengmang lengmang in khua kan sa.

2 KORIN 4:14

Bawipa Jesuh nunnak ah a thawhtertu Pathian nih khan kannih zong Jesuh sinah cun a kan thawhter lai i nanmah he a hmaika ah cun a kan luhpi lai, ti kha kan hngalh.

2 KORIN 4:16

Hi ruangah hin pei kan lung a dongh bal lonak cu a si cu. Kan mihring sinak cu duhsah tein zor chin lengmang hmanh seh law kan thlarau sinak cu ni khat hnu ni khat a thar chin lengmang.

2 KORIN 4:17

Cun harnak hmete caan tawite kan inmi nih hin, hi harnak nakin a let tampi in a ngan deuhmi zungzal sunparnak cu a kan pek lai.

2 KORIN 4:18

Kannih nih kan i zohchihmi cu hmuh khawhmi thil hi si loin hmuh khawh lomi thil khi an si. Hmuh khawhmi thil cu caan tawite lawng a nguh, sihmanhsehlaw hmuh khawh lomi thil cu zungzal in a hmun.

2 KORIN 5:1

Kannih kan umnak thlam, vawlei cung kan pum hi, ṭheh a si tikah, vancung ah khin kan umnak ding caah Pathian nih inn a kan pek lai ti kha kan hngalh — cu inn cu amah Pathian nih a sakmi inn, zungzal hmun dingmi inn cu a si.

2 KORIN 5:3

cu inn in thuamh kan si tikah pum loin kan um lai lo.

2 KORIN 5:9

Cucaah hika kan inn i kan um a si zongah, khika kan inn i kan um a si zongah, zeidang nakin kan duh bikmi cu amah duhnak tuah kha a si.

2 KORIN 5:5

Cu bantukin i thlennak ding ca i a kan timtu cu Pathian a si i kan ca i a kan chiahpiakmi thil vialte aamahkhan caah a Thlarau cu a kan pek.

2 KORIN 5:7

zeicahtiah mit hmuh in si loin zumhnak tu in kan kal.

2 KORIN 5:14

Mi vialte caah mi pakhat a thi i a thihnak ah cun mi vialte an thi ve ti kha kan hngalh caah Khrih nih kan ca i a ngeihmi dawtnak nih cun a kan uk.

2 KORIN 5:15

Mi vialte caah a thihnak chan cu minung nih hin an nun chungah anmah ca lawngah nung ti loin, anmah ruang i thihnak a ing i a tho ṭhanmipa ca i an nun nakhnga caah a si.

2 KORIN 5:17

Mi zeihmanh hi Khrih he an i pehtlaih tikah cun mi thar a si; a nunning hlun kha a lo cang, nunning thar kha aa thawk cang.

2 KORIN 5:18

Hi thil vialte a tuahtu cu Pathian a si i Pathian nih cun Khrih thawngin kannih a ral a simi cu a hawi ah a kan thlen i midang zong a hawi i ser ve awk rian cu a kan pek.

2 KORIN 5:19

Cucaah kannih kan biapi cu, Pathian nih mi vialte kha Khrih thawngin hawi ah a ser hna, ti hi a si. Pathian nih an sualnak kha anmah sual phawtnak ding caah cazin chungah a khumhpiak hna lo i kannih cu a hawi i a ser hnanak bia chim kha a kan fial.

2 KORIN 5:21

Khrih cu sualnak zeihmanh a ngei lo, sihmanhsehlaw kanmah ruangah Pathian nih kan sualnak kha a hrawmter i cucaah amah he kan i peh ahcun Pathian dinnak kha kan i hrawm ve lai.

2 KORIN 6:2

Pathian nih, "Nanmah cu zaangfah kan duh hna caah kha caan ah khan nan bia cu ka rak in theihpiak hna i Khamh kan duh hna caah kha ni ah khan ka rak in bawmh hna," tiah a rak chim. Ngaihmanh u! Pathian zaangfahnak hmuh caan cu atu hi a si i khamhnak hmuh ni cu nihin hi a si!

2 KORIN 6:4

Kan i zuammi tu cu zei kan tuahnak hmanh ah Pathian sal kan si ti langhter kha a si i hnahnawhnak le harnak le retheihnak kha lungsau thinfual in kan in hna.

2 KORIN 6:6

Kan ziaza a thiannak le biatak kan hngalhnak le lungsaunak le mi cung i zaangfahnak kan ngeihmi nih Pathian sal kan si kha an langhter. Cun Thiang Thlarau laksawng kan hmuhmi le dawtnak taktak kan ngeihmi le

2 KORIN 6:7

biatak kan chimnak le Pathian ṭhawnnak nih khan Pathian sal kan sinak cu an langhter fawn. Raldohnak caah siseh, kanmah ralvennak caah siseh kan hmanmi cu dinnak a si.

2 KORIN 6:10

kan ngaihchiatnak cu an tuah nain kan lung aa lawm zungzal, sifak ngai kan lo sihmanhsehlaw mi tampi kan rumter hna, zeihmanh a ngei lomi ko kan lo, asinain a taktak ti ahcun kan ngeih lomi a um lo.

2 KORIN 6:14

A zum lomi hna he i fon cetcut tuk in rian ṭuan ṭi hlah u; cucu a si kho lomi thil a si. Zeitindah a dingmi thil le a ding lomi thil cu hawikom an si khawh lai? Zeitindah ceunak le muihnak cu hmunkhat ah an um ṭi khawh lai?

2 KORIN 6:16

Zeitindah Pathian biakinn cu lawkihmi siasal he an i tlak khawh lai? Zeicahtiah kanmah cu pei a nungmi Pathian biakinn cu kan si cu. Pathian hrimhrim nih, "Ka mi hna sinah ka umnak inn cu ka sak lai i an sinah ka um lai; Keimah cu an Pathian ka si lai i annih cu ka mi an si lai," a ti bantuk khan a si taktak.

2 KORIN 6:18

Keimah cu nan pa ka si lai i nannih cu ka fapale le ka fanule nan si lai, tiah Bawipa Lianngan Bik nih a ti," tiah a ti.

2 KORIN 7:1

Ka dawtmi ka hawile hna, hi biakamnak vialte hi kanmah pei pek kan si cu. Cucaah pum siseh, thlarau siseh, a thurhnawmhtertu paohpaoh kha i thianh u sih law Pathian ṭih bu tein um u sih.

2 KORIN 7:5

Masidonia kan phak hnu hmanh ah dinh mui kan hmu hlei lo. A kenkip ah harnak a um, pakhat le pakhat an i si, kan lung chungah phannak a um.

2 KORIN 7:6

Sihmanhsehlaw lung a dongmi lung ṭhawnnak a pe tawntu Pathian nih cun, Titas a ratnak thawng khan lung ṭhawnnak a kan pek ṭhan.

2 KORIN 7:7

Titas nih cun, zeitluk in dah hmuh nan kan duh le, zeitluk in dah nan ngaih a chiat le zeitluk in dah nan kan ṭanpi kha a kan chimh i atu cu hlan nak hmanh khan kaa lawm deuh.

2 KORIN 7:10

Pathian nih a hmanmi ngaihchiatnak nih cun khamhnak lei kalpitu lungthlennak a chuahpi i cu bantuk ngaihchiatnak cu i ngaihchih awk zeihmanh a um lo. Asinain vawlei cung phung ningin ngaihchiatnak kha kan in ahcun cu nih cun thihnak kha a chuahpi.

2 KORIN 7:16

Nanmah cu kan bochan khawh hna caah zeitluk in dah kaa lawmh.

2 KORIN 8:1

U le nau hna, Pathian vel nih zeitindah Masidonia ram Khrihfabu chungah rian a ṭuan ti kha hngalhter kan in duh hna.

2 KORIN 8:2

Harnak an innak nih khan fak piin a hneksak hna; asinain an i lawmhnak cu a ngan tuk caah an si a fak ngaingai ko nain thawhlawm ah an siang ngaingai.

2 KORIN 8:3

An pek khawh chungin an pek ti kha hngalhter kan duh hna, an pekmi hi an pek khawh leng hmanh a si.

2 KORIN 8:5

An tuahmi cu ka rak i ruah ngam lengpi a si, A hmasa bik ah anmah kha Pathian sinah an i pe, cun Pathian hnatlaknak in kan sin zongah an i pe.

2 KORIN 8:9

Nannih nih kan Bawipa Jesuh Khrih vel kha nan hngalh ko: a rum nain nanmah ruangah sifak ah a cang, cuti a can cu a sifahnak khan nannih kha rumter an duh hna caah a si.

2 KORIN 8:11

Cucaah cun rak pehzulh u law rian cu rak lim u. Nan rak thawk lio bantuk khan a lim lei zongah lungthawhnak rak ngei peng u law nan ngeihmi ning cio ah pek rak i zuam u.

2 KORIN 8:12

Pek duhnak lungthin nan ngeih ahcun nan ngeih lomi thil zoh in si loin nan ngeihmi thil zoh in Pathian nih nan laksawng cu an cohlanpiak hna lai.

2 KORIN 8:20

Hi siang ngaiin pekmi laksawng kan hmannak ah hin ahohmanh nih an kan soi khawh nakhnga lo ralring tein kan ṭuan.

2 KORIN 8:21

Kan i tinhmi cu, Bawipa hmuh lawngah si loin, minung mit hmuh zongah a dingmi thil tuah kha a si.

2 KORIN 9:6

Hihi philh hlah u: thlaici tlawmte a tuhmi nih cun theipar tlawmte a zun tawn, tampi a tuhmi nih cun tampi a zun tawn.

2 KORIN 9:7

Cucaah nanmahle nan lungthin nan i thlehning cio ah rak tho u, nan thawh tikah i ngaihchih bu le hnekchom in si hlah seh, lunglawm tein a thomi kha Pathian nih a dawt hna.

2 KORIN 9:8

Pathian nih cun nan herh leng tiangin an pek khawh ko hna, cucaah nanmah ca i nan herhmi caah khan nan i zat tiangin nan ngei zungzal ko lai i thil ṭha tuah nan duhmi ca i nan herhmi caah khan a zat leng tiang hmanh nan ngei ko lai.

2 KORIN 9:9

Cathiang nih, "Siang ngaiin sifakmi kha a pek hna, a zaangfahnak cu zungzal in a hmun," a ti bang khan a si lai,

2 KORIN 9:10

Cun thlaici tuhtu thlaici a petu le ei awk rawl a petu Pathian nih cun nan herhmi thlaici vialte kha an pek hna lai, nan siannak chung khan theipar tampi chuahter awkah amah nih cun a ṭhanter lai.

2 KORIN 9:11

Zeitik caan paoh ah minunsiang nan si khawh nakhnga Pathian nih cun a za in an rumter zungzal hna lai i kan sinin an hmuhmi nan laksawng ruangah khan Pathian cu mi tampi nih an lawmh lai.

2 KORIN 9:12

Zeicahtiah nan tuahmi nih hin Pathian mi hna an herhbaunak lawng kha a bawmh si loin Pathian sin i chimmi lunglawmhnak bia tampi zong kha a chuahter.

2 KORIN 9:15

A sung tukmi a laksawng caah hin Pathian cu lawm ko u sih.

2 KORIN 10:1

Hmunkhat um vial ah zeihmanh chim ngam ṭung lo, a langhlat vial in a ral a ṭha ngai ṭung, nan ka timipa keimah Paul nih, Khrih lungnemnak le a zaangfahnak lungthin in kan nawl hna.

2 KORIN 10:3

Vawleicung ah cun kan um taktak, sihmanhsehlaw vawlei cung thil tinhmi ngei in ral kan do lo.

2 KORIN 10:4

Raldohnak i kan hmanmi hriamnam cu vawlei cung hriamnam an si lo, ralhruang fekfek a hrawk khotu Pathian hriamnam tu kha an si. A hmaan loin bia i alnak kha kan hrawh,

2 KORIN 10:5

Pathian hngal kho hna hlah seh tinak ca i chonmi vampang porhlawtnak vialte kha kan baoh dih; minung lungthin kha sal ah kan va tlaih hna i Khrih nawl kha kan ngaihter hna.

2 KORIN 10:7

Thil cu a sining taktak in zohhmanh u sih: Pakhat nih aa thawh i Khrih ta ka si, a ti. Cu pa nih cun amah kha ṭha tein i ruat ta rih tuah seh, zeicahtiah amah cu Khrih ta a si tluk te khan kannih zong kan si ve ko.

2 KORIN 10:8

Bawipa nih a ka pekmi nawlngeihnak cu a hlei deuh in ka hman a si zong hmanh ah ka ning a zak lo, cu nawlngeihnak ka hmuhmi cu nanmah ṭhehnak nawlngeihnak si loin nanmah saknak nawlngeihnak tu a si.

2 KORIN 10:13

Kannih tu cu kan i porhlawtnak kha a hlei a hluat a phanh sual lai kha kan duh lo caah Pathian nih a kan chiahpiakmi rian ramri chung lawngah khan kan um lai i cu rian chungah cun nanmah lak i kan ṭuanmi zong hi aa tel.

2 KORIN 10:17

Sihmanhsehlaw Cathiang nih a chim bang khan, "Porhlawt a duhmi nih cun Bawipa nih a tuahmi kha i porhlaw ko hna seh,"

2 KORIN 10:18

Zeicahtiah mi cu amah le amah kha ka ṭha tiin aa ruah tikah hin Pathian nih a cohlan a si lo i Bawipa nih a ṭha ti in a ruah lawngah hin a cohlan a si.

2 KORIN 11:2

Pathian nih an sian hna lo bantukin kei zong nih kan siang ve hna lo. Nannih cu Khrih he i um dingin ka ham cangmi ngaknu thiang bantuk nan si.

2 KORIN 11:3

Evi cu rul nih a zernak le lih in a hlen bantuk khan nannih zong nan lungthin kha a thu sual lai i thiang tein Khrih nan tlaihchannak kha nan ngol sual lai ti ka phang.

2 KORIN 11:12

Lamkaltu kan si ve, aa timi hna nih khan, anmah bantukin kan ṭuan ve, an ti khawh nakhnga lo, atu i ka tuahmi hi ka tuah lengmang ko lai

2 KORIN 11:17

Atu i ka chim lengmangmi hi Bawipa nih chim seh ti a ka duhmi cu a si hrim lai lo, hiti kaa porhlawt lengmang ah hin mihrut bantukin bia ka chim lengmang taktak ko.

2 KORIN 11:28

Cun a dang cu zeihmanh chim loin, khrihfabu zawn ka ruahnak nih hin nifate in a nenh in a ka nenh.

2 KORIN 11:29

Pakhatkhat an derthawm ah, kei zong ka derthawm ve, pakhat khat sualnak chung i an tlak ah lungretheih in ka thi.

2 KORIN 11:30

Kaa porhlawt awk a herh a si ahcun zeitluk in dah a derthawmmi ka si a langhtertu kha kaa porhlaw lai.

2 KORIN 12:1

A ṭhathnemnak zeihmanh a um lo hmanh ah kaa porhlawt a hau ko. Atu cu Bawipa nih a ka pekmi langhnak le biathlam kong kha ka chim cang hna lai.

2 KORIN 12:7

Sihmanhsehlaw ka hmuhmi thil khuaruahhar a tam ruangah porhlaw ruamkai in ka um sualnak hnga lo ka pum ah hin hling pakhat a ka chiah i cu hling Satan lamkaltu cu porhlaw in ka um sualnak hnga lo a ka dawntu dingah a hman.

2 KORIN 12:8

Hi kong ah hin voi thum thliahmah Bawipa sinah thla ka cam i, ka lakpiak ko tiah ka nawl.

2 KORIN 12:9

A ka lehnak cu, "Ka vel hi na caah a za ko, zeicahtiah ka ṭhawnnak cu derthawmnak ah hin a lang," ti a si. Cucaah cun Khrih ṭhawnnak nih a ka huhphenh ti kha ka hngalh nakhnga, ka derthawmnak ah hin lunglawm tein kaa porhlaw cang.

2 KORIN 12:10

Ka derthawmnak ah siseh, nihsawhnak le harnak le hremnak le temhinnak ka hmuhmi ah siseh, Khrih ruangah kaa lawm ko; zeicahtiah ka derthawm tikah hin ka ṭhawn a rak si.

2 KORIN 12:14

Atu hi nanmah tlawn kan timh hna a voi thumnak a si — zeihmanh kan hal hna lai lo. Ka duhmi cu nanmah nan si, nan tangka a si lo. A ngaingai ti ahcun, fale nih pale cu an cawm hna awk a si ṭung lo, pale nih pei fale cu an cawm hna awk a si deuh cu.

2 KORIN 12:15

Nanmah bawmhnak dingah hin ka ngeihmi vialte le ka pum zong hi hman dih ka duh ko. Cu tlukin kan dawt hringhran hna caah cun, daw lo deuh in nan ka um awk a si maw?

2 KORIN 12:19

Kan hmaiah anmah le anmah humhak an i zuam tiah ruah zong nan kan ruah sual ko lai. Cucu a si lo. Khrih nih chim hna seh ti a kan duhning in Pathian hmaiah kan chim i ka dawtmi ka hawile hna, kan tuahmi thil vialte hi nanmah bawmhnak caah si seh ti kan duh.

2 KORIN 12:21

Nan sin ka rat nolh tik cu, ka Pathian nih nan hmaiah ningzak in a ka umter sual lai ti ka phang. Nun thur in a rak nung i nu le pa sualnak pumsa duhnak an tuahmi aa ngaihchih lomi hna ruangah khan ka ṭap lai.

2 KORIN 13:1

Atu hi kan tlawn hna a voi thumnak a si lai. Cathiang nih a ti bantukin, "Sual i puhnak cu tehte pahnih nih maw pathum nih maw, ahmaan an ti awk a si."

2 KORIN 13:5

Nanmah le nanmah kha ṭha tein i hneksak tuah u: zumhnak nunning khan a nungmi nan si maw? I hneksak tuah u. Hneksaknak nan innak ah khan nan tluk sual dah ti lo ahcun, Khrih Jesuh cu kan chungah a um ti kha nan hngalh ko a si lo mei.

2 KORIN 13:8

Biatak cu a ṭanh in dah kan ṭanh ko ti lo ahcun, a doh cun kan do kho hrimhrim lo a si ko.

2 KORIN 13:10

Hi ruangah hin a langhlat in ca kan kuat hna hi a si. Ka duhnak cu nan sin ka phak tikah Bawipa nih a ka pekmi nawlngeihnak kha hraang ngaiin hman herh hlah ning ti hi a si — cu nawlngeihnak cu nanmah ṭhehnak nawlngeihnak si loin nanmah saknak nawlngeihnak tu a si deuh.

2 KORIN 13:11

Atu cu ka u le ka nau hna, dam tein rak um u. Nan umtuning kha rak i remh u. Kan nawlnak hna hi rak ngai u; pakhat le pakhat i rem u law dai tein rak um u. Cun dawtnak le remnak Pathian cu nan sinah a um lai.

2 KORIN 13:12

A thiangmi kuttlaihnak in pakhat le pakhat i biachawn u. Pathian mi vialte nih nan kut an in tlaih hna.

2 KORIN 13:13

Bawipa Jesuh Khrih vel le Pathian dawtnak le Thiang Thlarau he i hawikomhnak cu nan dihlak sinah um ko seh.