NITIN BAIBAL RELNAK

2 PETER 1:1

Jesuh Khrih sal le lamkaltu a simi Simon Peter nih, Kan Pathian a dinnak thawng le kan Khamhtu Jesuh Khrih thawngin kan zumhnak tlukin a sunglawimi zumhnak a hmu vemi nan sinah ca kan kuat hna.

2 PETER 1:2

Pathian nan hngalhnak thawng le kan Bawipa Jesuh nan hngalhnak thawngin vel le daihnak cu tlamtling tein nan ta si ko hna seh.

2 PETER 1:3

Pathian sunparnak le ṭhatnak i hrawm ve awkah a kan kotu kan hngalhnak thawngin Pathian ṭihzah in nun awkah kan herhmi thil vialte cu amah Pathian ṭhawnnak lila nih cun a kan pek.

2 PETER 1:5

Hi ruang hrimhrim ah hin, nan zumhnak i ṭhatnak chap kha fak piin i zuam u; cun nan ṭhatnak ah khan hngalhnak i chap u;

2 PETER 1:6

nan hngalhnak ah khan mah le mah i uk khawhnak i chap u; mah le mah i uk khawhnak ah khan in khawhnak i chap u; in khawhnak ah khan Pathian ṭihzahnak i chap u;

2 PETER 1:7

Pathian ṭihzahnak ah khan unau bantukin i dawtnak i chap u law unau bantukin i dawtnak ah khan zawnruahnak i chap u.

2 PETER 1:8

Hi thil hi nan herhmi an si i tam piin nan ngeih hna ahcun Bawipa Jesuh Khrih nan hngalhnak ah khan ṭhawnnak an pek hna lai i rian tampi an ṭuanter khawh hna lai.

2 PETER 1:9

Sihmanhsehlaw cu thil a ngei lomi cu lamnaite lawng a hmu khomi a si i thil dang zeihmanh a hmu kho lomi bantuk a si, amah nih cun ka sualnak kha ṭawlpiak ka si cang, ti kha a philh.

2 PETER 1:10

Cucaah cun ka u le ka nau hna, Pathian nih an thimnak hna le an kawhnak hna cu nan chungah fehter chinchin ko u; cu ti nan tuah ahcun nan tlu bal lai lo.

2 PETER 1:12

Hi thil hi nan hngal ko cang nain le biatak nan hmuhmi chungah fek tein nan dir cang ko nain kan chimh ṭhan lengmang ko rih hna lai.

2 PETER 1:13

Ka nun chung paoh cu, hi kong kan hngalhter ṭhan lengmang hna hi a herh hrimhrimmi a si, tiah ka ruah.

2 PETER 1:16

Kan Bawipa Jesuh Khrih ṭhawnnak in a rat kha, kannih nih kan in chimh hna tikah, mi phuahchommi tuanbia ṭukṭak kha kan i rinhmi an si lo. A lianhngannak kha kan mit hrimhrim in kan hmuh.

2 PETER 1:17

Sunparnak Cung Nung Bik nih, "Hi hi ka dawtmi ka Fapa a si, ka lung a ka tongtu a si," tiah a ti i Pathian kan Pa nih upatnak le sunparnak a pek tikah khan, cuka hmun ah cun kannih kha kan um.

2 PETER 1:18

Tlang thiang cung i amah sin kan um lioah, hi aw cu vancung in a run kha kanmah hrimhrim nih kan theih.

2 PETER 1:21

Zeicahtiah profet bia cu minung duhnak chung menmen in a chuakmi a si lo, sihmanhsehlaw Pathian sinin a rami bia kha mi nih an chim tikah, Thiang Thlarau nih a fial hna caah a si.

2 PETER 2:1

Hlan lioah Israel mi hna lakah nal profet an rak chuah tawn bangin, nanmah lak zongah hin cawnpiaktu hmaanlo an chuak ve lai. Thil hrawktu a simi le ahmaan lomi zumhning kha an chuahpi lai i anmah a tlantu hna kan Bawipa kha an hlawt lai i cucaah an cungah a rian a rangmi rawhralnak kha an i tlunter lai.

2 PETER 2:2

An ziaza ṭhalo kha mi tampi nih an i cawn lai i cu hna ruangah cun biatak Lam kha thangchiatnak a hmu lai.

2 PETER 2:4

A sualmi vancungmi kha Pathian nih a zuah hna lo i hell ah a thlak hna, khika mui lakah thir cikcin in an hren hna i Biaceih Ni kha an hngak ko.

2 PETER 2:14

Nu hor pawl zoh dah ti lo kha cu zoh an duhmi zeihmanh a um lo; an sual duhnak kha a riam kho bal lo. Thazang a dermi kha rap ah an foihter hna. An lungthin kha hakkauhnak in a khat. Annih cu Pathian nih chiat a serhmi hna an si.

2 PETER 2:19

Luatnak nan hmu lai, tiah bia an kamh hna, sihmanhsehlaw anmah hmanh kha, rawhralnak a phakpitu hna an ziaza sal kha an si — minung hi a teitu paoh sal a si ko.

2 PETER 2:20

Kan Bawipa le kan Khamhtu Jesuh Khrih an hngalhnak thawngin hi vawlei cung thurhnawmhnak in a luatmi hna cu, hi vawlei cung thurhnawmhnak nih khan a tlaih ṭhan hna i a tei ṭhan ahcun, a hramthawk i an rak umning nakkhan an donghnak cu a chia deuh.

2 PETER 2:8

Cu miṭhapa cu an sinah khan khua a sa i ni khat hnu ni khat an tuahsernak a ṭha lomi nih cun a lungthin a ṭhami cu a fahter.

2 PETER 2:9

Cuticun Pathian nih harnak an inmi chungin Pathian a ṭihmi hna khamh cu a thiam i miṭhalo pawl cu Biaceih Ni tiang dantatnak tang i chiah cu a thiam.

2 PETER 3:1

Ka dawtmi ka hawile hna, atu i ca kan kuatmi hna hi a pahnihnak a si. Ka ca chungah, an pahnih tein, tuah kaa zuammi cu, nan lung chung i ruahnak thiang ṭhanghter kha a si i cucaah cun hi thil hi kan chimh ṭhan lengmang hna.

2 PETER 3:3

A hmasa bik ah nan hngalh awk i ka duhmi cu, caan donghnak caan ah cun, an pumsa duhnak nih a ukmi hna kha an hung chuak lai. Nannih cu an in nihsawh hna lai i

2 PETER 3:4

" 'Ka ra ṭhan lai,' tiah bia aa kam a si lo mei? Atu khuazei ah dah a um kun? Kan pupa hna cu an thi diam cang, sihmanhsehlaw thil cu vawlei ser ri in a si bantukin pei a si peng ko hi," an ti lai.

2 PETER 3:5

Pathian nih hlan liopi ah hin bia a rak chim i van le vawlei kha a rak ser hna ti kha an i hngalhter duh lo. Vawlei cu ti chungin le ti in ser a si i

2 PETER 3:6

vawlei hlun a hrawktu cu ti ṭhiamṭhiam, buanchukcho ti kha a si.

2 PETER 3:7

Sihmanhsehlaw Pathian bia ṭhiamṭhiam nih cun atu i a ummi van le vawlei hi mei in hrawh awkah a zuah rih hna. Pathian zei i a rel lomi hna an biaceih a si ni le hrawh an si ni caah cun zuah an si.

2 PETER 3:8

Sihmanhsehlaw ka dawtmi ka hawile hna, hi bia hi philh hlah u. Pathian caah cun ni khat hi kum thong khat bantuk a si i kum thong khat hi ni khat bantuk a si.

2 PETER 3:9

Bawipa cu a biakam tlinter awkah a khul a nuar ko tiin mi a cheu nih an ruah bang hin a si lo, nanmah cung i lungsaunak a ngeih ca tu ah hin a si deuh. Zeitintiah pakhat tlau hmanh hi a duh lo i mi vialte hi sual ngaihchihnak ngei hna seh ti tu hi a duhmi a si.

2 PETER 3:13

Sihmanhsehlaw kannih cu Pathian nih a kan kamhmi van thar le vawlei thar, dinnak a umnak inn kha kan hngak.

2 PETER 3:14

Cucaah cun ka u le ka nau hna, cu Ni nan hngah lioah hin Pathian hmaiah a thiangmi le soi awk um lomi nan si nakhnga fak piin i zuam u law amah he cun rem tein um u.

2 PETER 3:15

Kan hawi le kan unau a simi Paul nih ca an kuat hna tikah, Pathian nih a pekmi fimnak in a chim bantukin, Bawipa nih kan cungah lungsaunak a ngeih cu kannih kha khamh a kan duh caah a si.

2 PETER 3:18

Kan Bawipa le kan Khamhtu Jesuh Khrih vel le hngalhnak ah khan ṭhang ko u. Atu le zungzal tiang khin sunparnak cu amah ta si ko seh! Amen.