NITIN BAIBAL RELNAK

BIATHLAM 1:1

Hi cauk hi Jesuh Khrih nih a phuanmi thil kong a si. Cu a phuanmi cu a um zau dingmi thil, Pathian nih a sal hna hmuhsak awkah a pekmi kha a si. Cu thil hna cu Khrih nih a sal Johan kha a hngalhter i cu hngalhtertu ah cun a vancungmi kha a thlah i

BIATHLAM 1:2

Johan nih cun a hmuhmi thil vialte cu a chim dih. Pathian sinin hmuhmi bia le Jesuh Khrih nih a phuanmi biatak Johan nih a chim chinmi cu hihi a si.

BIATHLAM 1:4

Asia peng chung i a ummi Khrihfabu pasarih kha Johan nih bia kan cah hna: Atu i a um liomi le a rak um cangmi le a um lai ding a simi Pathian le a bawiṭhutdan hmai i a ummi thlarau pasarih le Jesuh Khrih nih vel le daihnak in pe ko hna seh.

BIATHLAM 1:5

Jesuh Khrih cu zumh awk a tlakmi tehte, hrin hmasa bikmi Fapa, thihnak in thawhter a simi a si i vawlei cung siangpahrang hna a uktu zong a si fawn. Kannih cu a kan dawt i a thihnak thawngin kan sualnak chung khan a kan chuah i

BIATHLAM 1:6

a Pathian le a Pa rian kha tlangbawi bantukin a ṭuantu dingah siangpahrang phun ah a kan ser. Cu Jesuh cungah cun sunparnak le ṭhawnnak kha zungzal in zungzal tiang um camcin ko seh! Amen.

BIATHLAM 1:7

Zohhmanh u, khuadawm sin khin a ra lio! Mi kip nih an hmuh lai, a rak chuntu hna zong nih khan an hmuh lai. Cun vawlei cung mi vialte cu a cung i an rak tuahmi kha i ngaichih in an ṭap lai. Cu ti hrimhrim cun a si lai! Amen.

BIATHLAM 1:8

Lianngan Bik Bawipa Pathian nih cun, "Kei cu Alfa le Omega ka si," a ti, cu Pathian a um liomi le a um cangmi le a um laimi cu, zeizong vialte siangpahrang Bawipa a si.

BIATHLAM 1:10

Bawipa Ni ah Thlarau nih a ka tlak i ka hnulei in aw thangpi pakhat kha ka theih, cu aw cu muko aw thawng bantuk a si.

BIATHLAM 1:11

A ka thawh i, "Na hmuhmi kha ṭial law na ṭialnak cauk cu Khrihfabu pasarih kha kua hna: cu Khrihfabu hna cu Efesa khua le Smyrna khua le Pergamum khua le Thiatira khua le Sardis khua le Filadelfia khua le Laodisia khua i a ummi kha an si," tiah a ti.

BIATHLAM 1:12

A ka chawntu cu ahodah a si hnga tiah ka hun i mer i cuka ah cun sui mei vannak pasarih ka hmuh hna.

BIATHLAM 1:16

A orhlei kut in arfi pasarih aa put hna i a ka chungin kap hnih in a harmi nam a chuak. A hmai cu chunlai ni ceu bantukin a ceu.

BIATHLAM 1:17

Amah cu ka hmuh tikah mithi bantukin a ke hramah ka tlu. A orhlei kut in a vun ka tawngh i, "Na thinphang hlah! Kei cu hmasa bik le hmanung bik kha ka si.

BIATHLAM 1:18

Kei cu a nungmi kha ka si. Ka rak thi, sihmanhsehlaw zohhmanh, zungzal in zungzal tiang ka nung cang. Thihnak cung le mithikhua cungah nawl ka ngei.

BIATHLAM 1:20

Ka orhlei kut i na hmuhmi arfi pasarih hna le sui mei vannak pasarih hna an sullam biathli cu hihi a si: arfi pasarih hi Khrihfabu hna i an vancungmi kha an si i mei vannak pasarih hna hi Khrihfabu pasarih hna kha an si," tiah a ti.

BIATHLAM 2:1

"Efesa khua i a ummi Khrihfabu vancungmi sinah hitihin va ṭial tuah: A orhlei kut in arfi pasarih aa put i sui mei vannak pasarih hna lakah aa chawkmi bia cu hihi a si:

BIATHLAM 2:3

Na lung a sau, keimah ruangah harnak na in i na lung a dong lo.

BIATHLAM 2:4

Sihmanhsehlaw ka lung na si lonak a um: cucu hmasa i na rak ka dawt bantuk khan na ka daw ti lo.

BIATHLAM 2:5

Zeitluk niam i na tlak cang kha philh hlah. Na sualnak kha mertak hna law hmasa i na rak tuah tawnmi kha tuah ṭhan hna. Na sualnak kha na mertak hna lo ahcun, ka ra lai i na mei vannak kha a umnak hmun in ka ṭhial lai.

BIATHLAM 2:7

"Hna nan ngeih ahcun, Thlarau nih Khrihfabu hna sinah a chimmi bia cu ngai ko u! Teitu a simi cu, Pathian Dum chung i a ummi nunnak thingkung theitlai einak nawl kha ka pek hna lai," a ti.

BIATHLAM 2:8

"Smyrna khua i a ummi Khrihfabu vancungmi sinah hitihin va ṭial tuah: Hi bia hi a hmasa bik le a hmanung bik a simi, a thi i a nung ṭhanmi bia a si.

BIATHLAM 2:9

Na harnak kha ka hngalh ko hna; sifak na si kha ka hngalh — sihmanhsehlaw a ngaingai ti ahcun a rummi na si. Judah mi a si lo nain Judah mi ka si aa timi hna nih an in thangchiatnak kha ka hngalh; annih cu Satan ta a simi bu an si!

BIATHLAM 2:10

Sifahnak na in dingmi kha zeihmanh ṭih hna hlah. Hi bia hi ngai hmanh. Khuachia nih khan nangmah hneksaknak caah nanmah lak i a cheu cu thong ah a thlak hna lai; harnak na inmi cu ni hra chung a si lai. Thih tiangin ka cungah zumhawktlak tein um ko; cun nunnak suiluchin kha kan pek lai.

BIATHLAM 2:11

"Hna nan ngeih ahcun, Thlarau nih Khrihfabu hna sinah a chimmi bia kha ngai ko u! "Teitu a simi cu thih hnihnak nih harnak a pe kho hna lai lo," a ti.

BIATHLAM 2:12

"Pergamum khua i a ummi Khrihfabu vancungmi sinah hitihin va ṭial tuah: "Hi bia hi vainam kap hnih har a ngeimi bia kha a si.

BIATHLAM 2:13

Na umnak hmun kha ka hngalh; Satan nih a bawiṭhutdan a chiahnak hmun a si kha ka hngalh. Ka cungah zumhawktlak in na um i keimah ca i zumhawktlak a simi tehte Antipas kha Satan umnak hmun i an thah ah khan, na zumhnak cu na ṭhial tak hlei lo.

BIATHLAM 2:14

Asinain na cungah ka lungtlin lonak tlawmpalte a um: cucu Balaam cawnpiaknak a zulmi nan lakah tlawmpal an um kha a si; Balaam nih cun Balak kha, Israel mi cu siasal pekmi rawl einak thawng le nu le pa sualnak thawngin an sual nakhnga, na cawnpiak hna lai, tiah a cawnpiak.

BIATHLAM 2:15

Cun nan lakah Nikolas zultu pawl cawnpiaknak a zulmi zong nan um fawn.

BIATHLAM 2:17

"Hna nan ngeih ahcun Thlarau nih Khrihfabu sinah a chimmi bia cu ngai tuah u. "Teitu a simi hna cu thuhmi manna changreu kha tlawmpal in ka pek hna lai. Cun lung rang zong pakhat cio in ka pek hna lai i cu lung cungah cun a cotu cio lawng nih a sullam an hngalhmi min thar kha an i ṭial cio," tiah a ti.

BIATHLAM 2:18

"Thiatira khua i a ummi Khrihfabu vancungmi sinah hi bangin va ṭial tuah: Hi bia hi Pathian Fapa, a mit mei alh bantukin a alhmi le a ke dar tleu bantukin a tleumi bia a si.

BIATHLAM 2:19

Na tuahmi kha ka hngalh. Dawtnak na ngeihmi le zumhawktlak na sinak le na rianṭuanmi le na lungsaunak kha ka hngalh hna. A hramthawk ah na rak tuahmi nakin atu ah tam deuh na tuah ti kha ka hngalh.

BIATHLAM 2:20

Sihmanhsehlaw na cung i ka lungtlin lonak cu hihi a si. Pathian lamkaltu ka si, aa timi Jezebel kha na dawn lo. Amah nih cun ka salle kha a cawnpiak hna i a ping ah a hruai hna i nu le pa sualnak kha an tuah i siasal pekchanhmi rawl kha an ei.

BIATHLAM 2:21

Lungthlennak caan kha ka pek ko, sihmanhsehlaw a horduhcuainak lam khan i let ṭhan a duh lo.

BIATHLAM 2:24

Sihmanhsehlaw Thiatira khua i a ummi a dang nih cun hi cawnpiaknak ṭhalo cu nan zul lo i midang nih, "Satan biathli thuk," an timi cu nan hngal lo. Nannih cungah cun thilrit khinh kan duh hna lo.

BIATHLAM 2:25

Sihmanhsehlaw atu i nan ngeihmi kha ka rat tiang fek tein rak i tlaih ko u.

BIATHLAM 2:26-27-28

Teitu a simi hna le tuah hna seh ti ka duhmi a dongh tiangin a tuahmi hna cu, ka Pa sinin ka hmuhmi nawl ngeihnak kha annih zong ka pek ve hna lai. Miphun dang uknak nawl kha ka pek hna lai i annih cu thirfung in uknak nawl le tlak-um bangin khuainak nawl kha ka pek hna lai. Cun deirel arfi zong kha ka pek hna lai.

BIATHLAM 3:1

"Sardis khua i a ummi Khrihfabu vancungmi sinah hi bangin va ṭial tuah: Hi bia hi Pathian thlarau pasarih le arfi pasarih a ngeimi bia kha a si. Na tuahmi kha ka hngalh, a nungmi a si tiah na min a thang nain na thi ko.

BIATHLAM 3:2

Cucaah cun i hlau law na ngeih rihmi kha a thih taktak hlanah thazang thar la tuah. Zeicahtiah na tuahmi thil kha Pathian mit hmuh ah a tlingmi an si rih lo ti kha ka hmuh.

BIATHLAM 3:3

Cucaah cun zeidah an in cawnpiakmi kha a si ti le zeitindah na rak theih ti kha philh hlah, cucu zul law na sualnak kha mertak hna. Naa hlauh lo ahcun mifir bantukin kaan rathnawh lai i ka rat caan kha a hngalh hmanh na hngal lai lo.

BIATHLAM 3:4

Asinain Sardis khua i a ummi tlawmpal nih cun nan puan kha thiang tein nan chiah ko. Puan rang aih in keimah sinah nan i chawk lai, zeicahtiah cu bantukin aa chawk dingah cun aa tlakmi nan si.

BIATHLAM 3:5

Teitu a simi hna cu hi bantukin puan rang an i aih lai i a nungmi hna cauk chung khan an min cu ka hlo lai lo. Ka Pa le a vancungmi hna hmaiah langhngan in, hi hna cu ka mi an si, ka ti lai.

BIATHLAM 3:7

"Filadelfia khua i a ummi Khrihfabu vancungmi sinah hi bangin va ṭial tuah: Hi bia hi a thiangmi le a taktak a simi, David tawh a tlaitu, innka a hun tikah ahohmanh nih an khar khawh ti lomi, a khar tikah ahohmanh nih an hun khawh ti lomi bia kha a si.

BIATHLAM 3:8

Na tuahmi kha ka hngalh; na thazang a tlawm nain kan cawnpiakmi na zulh le ka cungah zumh awk tlak na si kha ka hngalh. Innka pakhat kaan hunpiak i ahohmanh nih an khar kho lai lo.

BIATHLAM 3:10

Lungsau in um tuah, tiah kan timi kha na zulh caah, vawleicung mi vialte hneksaknak ding caah vawlei cung dihlak ah a tlung laimi harnak caan kha tong loin kan luatter lai.

BIATHLAM 3:11

Ka ra zau lai. Na ngeihmi kha ṭha tein i chiah, teinak laksawng na hmuh ding cu ahohmanh nih in chut hna hlah seh.

BIATHLAM 3:12

Teitu a simi cu ka Pathian biaknak inn chungah khan tungpi ah ka ser lai i cu biakinn cu zeitikhmanh ah a chuahtak lai lo. Amah cungah cun ka Pathian min kha ka ṭial lai i ka Pathian khualipi, a min Jerusalem thar a simi zong kha a cungah cun ka ṭial lai. Cu khualipi cu ka Pathian sinin vancung khin a rung ṭum lai. Cun a cungah cun ka min thar zong ka ṭial fawn lai.

BIATHLAM 3:14

"Laodisia khua i a ummi Khrihfabu vancungmi sinah hi bangin va ṭial tuah: Hi bia hi zumhawktlak le ahmaan taktakmi tehte Amen bia kha a si; amah cu Pathian nih a sermi vialte hram a si.

BIATHLAM 3:15

Na tuahmi kha ka hngalh ko; a kih zong na kik lo, a lum zong na lum lo. A kih zong kik lawlaw, a lum zong lum lawlaw law ka duh.

BIATHLAM 3:16

A lum menmen na si i a lum zong na lum lawlaw lo i a kih zong na kih lawlaw fawn lo caah, ka kaa chungin kan chak lai.

BIATHLAM 3:17

Ka rum ko, kaa za ko, zeihmanh ka bau lo, na ti. Asinain zeitluk sifak le zaangfah awk tlak dah na si kha naa hngal lo. Na si a fak, puan aih awk hmanh na ngei lo i na mit a caw.

BIATHLAM 3:18

Cucaah ruahnak kan cheuh duhmi cu, keimah sinin sui thiang taktak kha ka caw law na rum lai. Cun naa thuamhnak ding le taklawng in na umnak ningzahnak khuhnak ding caah, thil rang i cawk fawn. Cun na mit thuh awkah si zong i cawk law cuticun khua na hmu kho lai.

BIATHLAM 3:19

Ka dawtmi cu ka chimhhrin hna i dan ka tat tawn hna. Cucaah cun i biatak law na sualnak kha mertak hna.

BIATHLAM 3:20

Ngaihmanh! innka ah ka dir i ka kingh. Ahohmanh an si ah, ka aw a thei i innka a ka hunhmi cu, a inn chungah cun ka lut lai i a sinah rawl ka dum lai i amah zong ka sinah a dum ve lai.

BIATHLAM 3:21

Keimah kha teitu ka si i ka Pa pawngah a bawiṭhutdan cungah ka ṭhut bantuk hin, teitu a simi cu ka bawiṭhutdan cung i ka pawngah ṭhutnak nawl kha ka pek hna lai.

BIATHLAM 4:1

Hi dih hin langhnak a dang pakhat ka hmuh ṭhan i vancung ah khin innka pakhat aa hungmi kha ka hmuh. Cun hlan deuh ah ka rak theihmi aw, muko aw bantuk a simi kha, a hung thang i, "Hika ah hin hung kai law, hi dih hin zeidah a um lai ti kha kan hmuhsak lai," a ti.

BIATHLAM 4:4

Bawiṭhutdan cu a velchum in bawiṭhutdan dang kul le pali nih an kulh i cu bawiṭhutdan hna cungah cun, puan rang aa aih i sui luchin aa chinhmi upa kul le pali an ṭhu.

BIATHLAM 4:8

Saram nung pali hna nih cun thla paruk cio an ngei i an chunglei he an lenglei he mit in an khat. Chunzan in hlasak an ngol lo i: "A thiang, a thiang, a thiang, Lianngan Bik Bawipa Pathian cu, Amah cu a um cangmi le a um liomi le a um laimi a si," an ti.

BIATHLAM 4:10

Cu bantukin an thangṭhat tikah upa kul le pali kha bawiṭhutdan cung i a ummi hmaiah cun an kun i zungzal in zungzal tiang a nungmi cu an biak. An suiluchin kha bawiṭhutdan hmaiah cun an chiah hna i,

BIATHLAM 4:11

"Kan Bawipa le kan Pathian, Nangmah cu sunparnak le upatnak le lianhngannak kha hmuh awkah aa tlakmi na si. Zeicahtiah zeizong vialte kha nangmah nih na ser hna i Nangmah duhnak bangin annih cu ser an si i nunnak an ngei," tiah an ti.

BIATHLAM 5:1

Bawiṭhutdan cung i a ṭhumi nih cun lncazual pakhat a orhlei kut in aa put kha ka hmuh i cu cazual cu a chunglei he a lenglei he aa ṭial dih i cakhenh pasarih in an khenh chih.

BIATHLAM 5:2

Cun vancungmi pakhat a ṭhawng ngaimi kha ka hmuh i cu vancungmi nih cun, "Ahodah cakhenhnak phoih awk le cazual samh awkah aa tlak hnga," tiah fak piin a ti.

BIATHLAM 5:3

Sihmanhsehlaw cu cazual a phoih i a chung a zoh khotu cu vancung ah siseh, vawleicung ah siseh, vawlei toiah siseh, ahohmanh an hmu kho hna lo.

BIATHLAM 5:5

Cu tikah upa pakhat nih khan a hun ka chawnh i, "Ṭap hlah! Zohhmanh, Judah phun chungin a chuakmi Chiandeih, David tefa milianngan nih khan, teinak a hmuh cang i cakhenhnak pasarih kha a phoih khawh hna i cazual kha a kau khawh," tiah a ti.

BIATHLAM 5:6

Cun Tuufa pakhat, bawiṭhutdan laifang ah a dir i saram nung pali hna le upa hna nih an kulh kha ka hmuh. Tuufa cu an rak thahmi si dawh a si. Ki pasarih le mit pasarih a ngei i a mit pasarih cu Pathian nih vawlei cung khuazakip ah a thlahmi Pathian thlarau pasarih kha an si.

BIATHLAM 5:7

Tuufa cu a va kal i bawiṭhutdan cung i a ṭhumi orhlei kut i cazual kha a va lak.

BIATHLAM 5:8

Cu ti a va lak ahcun saram nung pali hna le upa kul le pali hna kha Tuufa hmaiah cun an kun. Pakhat nih tingtang pakhat cio le zihmui a khatmi sui kheng pakhat cio an i put, sui kheng chung zihmui cu Pathian mi hna thlacamnak kha a si.

BIATHLAM 5:9

Hla thar kha an sa i: "Nangmah cu cazual kha lak awk le a khuhnak kha phoih awkah naa tlak. Zeicahtiah an in thah i na thihnak thawngin, Hrin kip le chung kip le holh kip le phun kip chungin, Minung cu Pathian sinah na phakpi hna.

BIATHLAM 5:10

Kan Pathian rian tlangbawi bantukin a ṭuantu dingah siangpahrang phun ah na ser hna i Annih nih vawlei cu an uk lai," an ti.

BIATHLAM 5:13

Cun vancung i a ummi le vawlei cung i a ummi le vawlei toi i a ummi le rili chung i a ummi thilnung vialte nih, "Bawiṭhutdan cung i a ṭhumi le Tuufa cu, thangṭhatnak, upatnak, sunparnak le ṭhawnnak kha, An cungah zungzal in zungzal tiang um ko seh," tiin hla an sak kha ka theih.

BIATHLAM 6:1

Cun Tuufa nih cakhenh pasarih chung i pakhatnak a phoih kha ka hmuh. Cun saram nung pali hna lak i pakhat nih khan khuari thawng bantuk a simi aw in, "Ra," a ti kha ka theih.

BIATHLAM 6:2

Ka hun zoh i rang rang pakhat ka hmuh. A cung i aa citmi nih cun likuk pakhat aa put i amah cu bawiluchin pakhat an pek. Teitu nih tei awkah aa thawh bantukin aa thawh.

BIATHLAM 6:3

Cun Tuufa nih cun cakhenh pahnihnak kha a phoih i saram nung pahnihnak nih, "Ra," a ti kha ka theih.

BIATHLAM 6:4

Rang dang pakhat a hung chuak i rang sen a si. A cung i aa citmi cu, vawlei cung i ral thawhternak ṭhawnnak kha an pek, cucu zeicahdah a si tiah, mi kha pakhat le pakhat i that hna seh, ti caah a si; amah cu vainam nganpi an pek.

BIATHLAM 6:5

Cun Tuufa nih cun cakhenh pathumnak kha a phoih; cun saram nung pathumnak nih, "Ra," a ti kha ka theih. Ka hun zoh i rang nak pakhat ka hmuh. A cung i aa citmi nih cun cuaithlainak pakhat aa put.

BIATHLAM 6:6

Saram nung pali hna lakin a chuakmi aw a lomi aw pakhat ka theih i cu aw nih cun, "Ni khat ni hlawh caah changvut cu khiat khat, barli cu khiat thum. Sihmanhsehlaw oliv chiti le mitsur hang cu hrawk hna hlah," a ti.

BIATHLAM 6:7

Cun Tuufa nih cun cakhenh palinak kha a phoih i saram nung palinak nih, "Ra," a ti kha ka theih.

BIATHLAM 6:8

Ka hun zoh i rangrau diapduap pakhat ka hmuh. A cung i aa citmi cu a min ah Thihnak a si i Hell nih a hnulei in a zulh. Vawlei cung cheu li cheu khat uknak nawl kha pek an si i ral in siseh, mangṭam in siseh, rai in siseh, sahrang in siseh, mi thah khawhnak nawl kha pek an si.

BIATHLAM 6:9

Cun Tuufa nih cun cakhenh panga-nak kha a phoih. Pathian bia an chim ruangah le Pathian tehte an sinak ah zumhawktlak in an um ruangah an thahmi hna thlarau kha biakṭheng toiah cun ka hmuh hna.

BIATHLAM 6:10

Fak piin an au i, "A lianngan bik Pathian, a thiang i a taktak a simi Pathian, vawleicung mi, a kan thattu hna hi zei can dah kan phuhlam loin na um hna lai i an biaceih loin na um hna lai," an ti.

BIATHLAM 6:11

Annih cu puan rang pakhat cio an pek hna i, "Tlawm tein i din ko rih u. Nanmah bantukin thihnak a ing ve ding nan salhawi le nan unau hna an tling rih lo," tiah an ti hna.

BIATHLAM 6:12

Cun Tuufa nih cakhenh paruknak a phoih kha ka hmuh. A fak ngaimi lihnin a um i ni cu puanchia nak bantukin a nak i thlapa cu thisen bantukin a sen dih.

BIATHLAM 6:13

Cun thli fak nih a kung a hninh tik i theipi kuh a ṭilmi bantuk khin arfi cu vancung in vawlei ah an rung tla.

BIATHLAM 6:14

Cazual an zual bantuk khin van cu a lo i tlang le tikulh vialte cu an umnak hmun in an ṭhial dih hna.

BIATHLAM 6:15

Cun vawlei cung siangpahrang hna le uktu hna le ralbawi hna le mirum hna le miṭhawng hna le midang vialte cu sal he a luatmi he, tlang cung lungkua le lungpi toiah an i thup dih.

BIATHLAM 6:16

Tlang le lungpi cu an auh hna i, "Kan nenh u law bawiṭhutdan cungah a ṭhumi hmai le Tuufa thinhunnak cun kan phen tuah u!

BIATHLAM 6:17

An thinlinh ni ni lianngan cu an phan cang i aho nih dah a celh lai," a ti.

BIATHLAM 7:1

Cu hnuah cun vancungmi pali vawlei kil li cung i an dir kha ka hmuh i vawlei cung thlitu pali hna kha, vawlei cungah siseh, rili cungah siseh, thingkung cungah siseh, an hrannak hnga lo an thlauh hna.

BIATHLAM 7:2

Cun nichuahlei in vancungmi a dang pakhat a nungmi Pathian cakhenhnak he a rat kha ka hmuh. Pathian nih vawlei le rili hrawh khawhnak nawl a pekmi vancungmi pali kha aw fak piin a auh hna.

BIATHLAM 7:3

Vancungmi nih cun, "Kan Pathian sal hna kha an cal ah hmelchunhnak kan khenh hna hlan cu vawlei le rili le thingkung kha hrawk hna hlah u," tiah a ti.

BIATHLAM 7:4

Cun an cal ah Pathian cakhenhnak in hmelchunhnak an khenhmi hna cu thong za khat le thong sawm li le thong li an si, Israel phun dihlak chungin an si, tiah an ka chimh.

BIATHLAM 7:9

Cu hnuah cun khua ka hun zoh i mibu nganpi, ahohmanh nih a rel in an rel cawk lomi khi ka hmuh. Annih cu phun kip, ram kip, holh kip le hrin kip chungin a rami an si i bawiṭhutdan hmai le Tuufa hmaiah cun an dir i puan rang an i aih i tum hnah kha an i put.

BIATHLAM 7:10

Fak piin an au i, "Kan khamhnak cu bawiṭhutdan cungah a ṭhumi Pathian le Tuufa sinin a rami a si," an ti.

BIATHLAM 7:13

Upa pakhat nih khan a ka hal i, "Puan rang aa aihmi hna hi ahodah an si i khuazei in a rami dah an si?" tiah a ka ti.

BIATHLAM 7:14

"Ka hngal lo, bawipa, Nangmah nih ta na hngalh deuh lai," tiah ka leh. Cun a ka thawh i, "Hi mi hna hi hremnak nganpi a ingmi kha an si; Tuufa thi chungah an puan kha an suk i an puan cu an vaar cang.

BIATHLAM 7:15

Cucaah cun Pathian bawiṭhutdan hmaiah an dir i chunzan in biakinn chungah a rian kha an ṭuan. Bawiṭhutdan cung i a ṭhumi nih khan a umpi hna i a ven hna.

BIATHLAM 7:16

Annih cu an ti a hal in an rawl a ṭam ti lai lo; ni nih a linh ti hna lai lo i thlanhri puak in zeihmanh nih a umter ti hna lai lo.

BIATHLAM 7:17

Zeicahtiah bawiṭhutdan laifang i a ummi Tuufa kha an tuukhal a si lai i nunnak tiput cerhkam ah a kalpi hna lai. Cun Pathian nih an mitthli vialte kha a hnawhpiak dih hna lai," a ti.

BIATHLAM 8:1

Tuufa nih cakhenh pasarihnak kha a phoih i vancung cu suimilam a cheu chung dai ṭhup in a um.

BIATHLAM 8:2

Cun Pathian hmaiah a dirmi vancungmi pasarih kha ka hmuh hna i muko pasarih an pek hna.

BIATHLAM 8:3

A dang vancungmi pakhat, zihmui khanghnak umte pakhat aa putmi kha a ra i biakṭheng pawngah cun a ra dir. Pathian mi hna an thlacamnak i toih awkah le bawiṭhutdan hmai i a ummi sui biakṭheng cung i khangh awkah zihmui tampi an pek.

BIATHLAM 8:4

Pathian hmai i a dirmi vancungmi kut cun zihmui khu cu Pathian mi hna thlacamnak he khan an kai ṭi.

BIATHLAM 9:1

Cun vancungmi panganak nih khan a muko cu a vun tum, van in vawlei ah arfi pakhat a tlami ka hmuh; dongh hngal lo khor tawh kha amah cu an pek.

BIATHLAM 9:2

Dongh hngal lo khor cu arfi nih cun a vun hun i somei nganpi chung i meikhu a chuakmi bantuk meikhu kha a hung chuak hluahmah; cu dongh hngal lo khor in a chuakmi meikhu nih cun ni ceunak le thli kha a muihter dih hna.

BIATHLAM 9:3

Meikhu chung cun khaubawk an chuak i vawlei cungah an rung ṭum; tlangngaikuang ṭhawnnak bantuk kha khaubawk cu an pek hna.

BIATHLAM 9:4

Ram hring siseh, thingkung siseh, ramkung siseh, hrawk hna hlah u, tiah an ti hna; an cal ah Pathian hmelchunhnak a ngei lomi lawnglawng kha nan hrawh khawh hna, ti an si.

BIATHLAM 9:5

Hi mi hna thah cu khaubawk kha onh an si lo, a hrem lawng thla nga chung nan hrem hna lai, ti an si. Cu an hrem hnanak fahning cu tlangngaikuang mi henh bantuk khi a si lai.

BIATHLAM 9:11

An uktu ah siangpahrang pakhat an ngei i dongh hngal lo khor a uktu vancungmi kha a si. A min cu Hebru holh in Abaddon ti a si; Grik holh cun Apollyon ti a si i a sullam cu "Hrawktu" tinak a si.

BIATHLAM 9:12

Thil ṭihnung hmasa bik cu a dih; hi hnuah hin a dang pahnih a ra ding an um rih.

BIATHLAM 9:15

Vancungmi pali cu a thlah hna, annih cu hi suimilam thengte le hi ni thengte le hi thla thengte le hi kum thengte i minung vialte cheu thum cheu khat a thattu ding i rak timhlamhmi kha an si.

BIATHLAM 9:16

An rangcung ralkap hna cu nuai za hnih an si tiah an ka chimh.

BIATHLAM 9:18

Rangtum hna kaa chungin a chuakmi hremnak pathum, mei le meikhu le kat nih cun, minung cheu thum cheu khat an thah hna.

BIATHLAM 9:20

Hi hremnak pathum nih a thah lomi, a taangmi minung hna nih khan, anmah nih an ser chommi thil kha an mertak hlei hna lo. Khuachia biak kha an ngol lo i sui le ngun le dar le lung le thing in sermi siasal, khua zong a hmu kho lomi, a theih zong a thei kho lomi, a kal zong a kal kho lo mi biak kha an ngol hlei fawn lo.

BIATHLAM 10:1

Cun vancung in a ṭhawngmi vanmi a dang pakhat a rung ṭum kha ka hmuh. Khuadawm in aa thuam i a lu ah chuncha aa khimh; a hmai cu nika bantuk a si i a ke cu mei tung pipi bantuk an si.

BIATHLAM 10:2

A kut in aa samhmi cazual hmete pakhat aa put. A orhlei ke in rili kha a lamh i a kehlei ke in vawlei kha a lamh,

BIATHLAM 10:7

Vancungmi pasarihnak nih a muko a tum tikah Pathian nih, a sal profet hna sinah a rak chim bang khan, a rak timh thlimi kha a tlinter lai," a ti.

BIATHLAM 10:8

Cun vancung in aw ka theihmi nih khan a run ka chawnh ṭhan i, "Rili cung le vawlei cungah a dirmi vancungmi nih aa putmi cazual aa samhmi kha va la tuah," a ti.

BIATHLAM 10:9

Vancungmi sinah cun ka va kal i cazual hmete cu ka pe, tiah ka va ti. A ka thawh i, "I lak law ei tuah; na pawpi chungah cun a kha lai, sihmanhsehlaw na ka chungah cun khuaihliti bantukin a thlum lai," a ti.

BIATHLAM 10:11

Cun, "Pathian nih miphun dangdang hna le ram dangdang hna le holh phun dangdang hna le siangpahrang tampi hna kong i a chimmi bia kha na chim ṭhan awk a herh lai," an ka ti.

BIATHLAM 11:1

Tahnak fung caah phaikung pakhat an ka pek i, "Hung kal law Pathian biakinn le biakṭheng kha hung tah hna, cun biakinn chung i Pathian a biami kha hung rel hna.

BIATHLAM 11:2

Asinain biakinn lenglei tual kha cu va ngaan rih hna. Va tah rih hna hlah, zeicahtiah kha tual kha cu Pathian a bia lomi, thla sawm li le thla hnih chung, Khua Thiang a naang ding hna ca i chiahmi an si.

BIATHLAM 11:3

Ka tehte pahnih kha ka thlah hna lai, annih cu buri an i aih lai i ni thong khat le za hnih le sawm ruk chung Pathian bia kha an chim lai.

BIATHLAM 11:5

Harnak pek a zalmi hna paoh kha an kaa chungin a chuakmi mei in an thah hna; hi bantukin harnak pek a timtu hna paoh cu thah an si lai.

BIATHLAM 11:6

Van kharnak nawl kha an ngei i cucaah cun Pathian bia an chim chung cu ruah a sur lai lo. Cerhti put zong kha thi i canternak nawl an ngei fawn. Cun vawlei zong kha an duh tik caan paoh ah hremnak a phunphun in hremnak nawl an ngei.

BIATHLAM 11:7

Cun bia chim awk an ngeihmi an chim dih tikah, dongh hngal lo khor thukpi chungin a hung chuakmi sahrang nih khan a doh hna lai. A tei hna lai i a thah hna lai;

BIATHLAM 11:8

an ruak cu khuapi chung lamkalai ah khan an ril lai, cu khua cu an Bawipa vailam i an khenh chihnak khua kha a si. Cu khua cu a min ah minhleng in Sodom, ti asiloah, Izipt ti a si.

BIATHLAM 11:10

Hi profet pahnih hna nih hin vawleicung mi kha temhnak tampi an pek hna caah, hi hna pahnih an thihnak ah hin vawlei cung mi cu an i lawm lai i an thihnak cu an tuk an aih lai i pakhat le pakhat laksawng an i ṭhen lai.

BIATHLAM 11:11

Ni thum le a cheu hnuah Pathian sinin nunnak petu thaw kha a ra i an chungah a lut i annih cu an dir; a hmumi vialte hna cu an thlakawk a bar hna.

BIATHLAM 11:12

Cun cu profet pahnih hna nih cun, vancung in, "Hika ah hin hung kai u," tiah aw thang piin a run titu hna aw kha an theih. An ral nih an zoh ko hna lioah cun, vancung ah khuadawm in an kai.

BIATHLAM 11:13

Cu caan te ah cun lihnin fak ngaingai pakhat a um; khuapi cu cheu hra cheukhat a rawk i minung thong sarih lihnin nih cun a thah hna. A tangmi pawl cu an thin a phang i vancung Pathian a lianhngannak kha an thangṭhat.

BIATHLAM 11:14

Thil ṭihnung pahnihnak cu a dih cang; sihmanhsehlaw zohhmanh, thil ṭihnung pathumnak a ra zau lai.

BIATHLAM 11:15

Cun vancungmi pasarihnak nih khan a muko cu a vun tum i aw thawng fakpi vancung ah cun a thang i, "Vawlei cung uknak nawl cu kan Bawipa le a Messiah ta a si cang," an ti.

BIATHLAM 11:16

Cun Pathian hmaiah bawiṭhutdan cung i a ṭhumi upa kul le pali hna kha an kun i Pathian cu an biak.

BIATHLAM 11:17

"A Lianngan Bik Bawipa Pathian, Nang cu atu i a ummi le hlan i a rak ummi na si. A liannganmi na ṭhawnnak kha na hman cang i Uknak hram naa thawk cang caah, Na cungah kan i lawm.

BIATHLAM 11:18

Atu caan hi na thinhunnak a rat caan le Mithi hna biaceih caan a si caah, Pathian bia lomi cu an thin a hung ngaingai. Cun atu caan hi na sal na profet hna le na mi vialte hna le nangmah an ṭihtu vialte hna kha, A hme a ngan thlu loin laksawng pek caan a si fawn. Cun vawlei a hrawktu hna hrawh caan kha a si," an ti.

BIATHLAM 11:19

Vancung i a ummi Pathian biakinn cu a hun i a chung i biakamnak an chiahnak kuang kha a lang. Cun nimtlau a lek, ṭek a tla, khua a ri, li aa hnin i fak piin rial a tla.

BIATHLAM 12:1

Cun van ah khin khuaruahhar a simi hmelchunhnak nganpi pakhat a lang. Minu pakhat a lang i a thuam ah nika a si; thlapa kha a ke in aa lamh i a lu ah arfi hleihnih bawiluchin aa chinh.

BIATHLAM 12:2

Nau a hring dengmang i nau nganfah in a ai.

BIATHLAM 12:3

Cun van ah cun khuaruahhar a simi hmelchunhnak a dang pakhat a lang ṭhan. A ngan ngaingaimi limkeng senpi, lu pasarih le ki pahra a ngeimi kha a hung lang i a lu ah cun bawiluchin pakhat cio an um.

BIATHLAM 12:4

A mei in arfi cheu thum cheu khat kha vancung cun a run kuaih ciammam hna i vawlei ah a thlak hna. Nau a hring dengmangmi nu hmaiah cun a dir i cu a dir cu a fa kha a chuah cangka in ka ei lai ti a duh caah a si.

BIATHLAM 12:5

Cun miphun vialte thirfung in a uktu ding fapa kha minu nih cun a hrin. Sihmanhsehlaw ngakchia cu an lak zau i Pathian le a bawiṭhutdan sinah an kalpi.

BIATHLAM 12:6

Minu cu Pathian nih a rak timhpiak cangmi hmun ah thetse ram ah khan a zam i khika ah ni thong khat le ni za hnih le ni sawm ruk an rak zohkhenh.

BIATHLAM 12:7

Cun van ah khin raldohnak a um. Mikhael le a vancungmi hna nih khan limkeng cu an doh i limkeng nih cun a vancungmi hna he a rak doh ve hna.

BIATHLAM 12:8

Sihmanhsehlaw limkeng cu a sung i amah le a vancungmi hna cu van ah umnak nawl an ngei ti lo.

BIATHLAM 12:9

Limkeng nganpi cu lengah an hlonh. Cu limkeng cu rulpi tar, Khuachia, asiloah, Satan timi, vawleicung mi vialte a hleng dihtu hna kha a si. Amah cu a vancungmi vialte hna he vawlei ah an thlak hna.

BIATHLAM 12:10

Cun vancung ah cun aw thangpi pakhat ka theih i, "Atu cu Pathian khamhnak a phan cang! Atu cu Pathian nih a ṭhawnnak kha siangpahrang bantukin a langhter cang. Atu cu a Messiah nih khan a nawlngeihnak kha a langhter cang. Kannih kan unau hna sual a puhtu, Pathian hmaiah dir riangmang in chunzan in sual a puh zungzaltu hna kha, vancung in lengah hlonh a si cang.

BIATHLAM 12:11

Kan unau hna nih amah cu Tuufa thi thawngin le an chimmi bia biatak a simi thawngin an tei cang; an nunnak pek kha an rak sian i thih zong an rak ngamh.

BIATHLAM 12:12

Cucaah cun nannih van hna le khika i a ummi vialte hna, i lawm tuah u. Sihmanhsehlaw vawlei le rili caah cun ṭihnung a va si hringhran dah! Zeicahtiah Khuachia cu nan sinah a rung ṭum cang i cu pinah caan tawite lawnglawng ka ngei ti kha a hngalh fawn caah a thin a linh in a lin ko," tiah a ti.

BIATHLAM 12:13

Limkeng nih vawlei cungah thlak ka si cang ti kha a hngalh tikah, fapa a hringtu nu kha a dawi colh.

BIATHLAM 12:15

Cun minu cu fenh seh tiah limkeng nih khan a kaa chungin tilian a chuahter.

BIATHLAM 12:16

Sihmanhsehlaw vawlei nih minu cu a rak bawmh; a kaa kha a an i limkeng kaa chungin a chuakmi tilian kha a rak dolh.

BIATHLAM 12:17

Limkeng cu minu cungah khan a thin a hung ngaingai i minu tefa a tang rihmi vialte hna doh awkah khan aa thawh; cu hna cu Pathian nawlbia a ngai i Jesuh nih a phuanmi biatak, zumh awk tlak tein aa tlaihmi kha an si.

BIATHLAM 12:18

Cun limkengpi cu rilikam ah khan a dir.

BIATHLAM 13:1

Cun sahrang pakhat rili chungin a hung chuah kha ka hmuh. Ki pahra le lu pasarih a ngei, a ki cungah cun bawiluchin pakhat cio an um i a lu cungah cun Pathian thangchiatnak min pakhat cio an i ṭial.

BIATHLAM 13:2

Ka hmuhmi sahrang cu a mui ah pawlai a lo, a ke cu vom ke bantuk a si i a kaa cu chiandeih kaa bantuk a si. Limkeng nih khan sahrang cu, a ṭhawnnak le a bawi ṭhutdan le a nawlngeihnak a kau ngaingaimi kha a pek.

BIATHLAM 13:3

Sahrang lu pakhat cu, voi khat cu rak that cang hna seh law a lo, sihmanhsehlaw cu thihpi awk tlak a hma cu a dam cang. Vawleicung mi vialte cu an khuaruah a har i sahrang cu an zulh.

BIATHLAM 13:4

Limkeng nih khan a nawlngeihnak cu sahrang kha a pek caah mi vialte nih limkeng cu an biak. Sahrang zong cu an biak i, "Sahrang bantuk hi ahodah a um hnga? Aho nih dah an doh khawh lai?" an ti.

BIATHLAM 13:5

Sahrang cu a ṭhalo tuk hringhranmi thil kha chim onh a si i thla sawm li le thla hnih chung nawlngeihnak ngeih onh a si.

BIATHLAM 13:7

Pathian mi kha doh awk le tei awkah onh a si i phun kip ram kip holh kip le mi kip cungah nawlngeihnak nawl pek a si.

BIATHLAM 13:8

Vawlei cung i a ummi vialte hna nih amah cu an biak lai, sihmanhsehlaw vawlei ser hlan in nunnak cauk chung i an min ṭial a simi hna nih cun an bia lai lo, cu nunnak cauk cu thahmi Tuufa ta kha a si.

BIATHLAM 13:10

Tlaih awk a simi cu tlaih a si hrimhrim ko lai; vainam in thah awk a simi cu vainam in thah a si hrimhrim ko lai. Hi ah hin Pathian mi hna nih in khawhnak an ngeih le zumhawktlak an si kha an langhter awk a hau," a ti.

BIATHLAM 13:11

Cun sahrang a dang pakhat vawlei chungin a hung chuah kha ka hmuh. Tuufa ki bantuk ki pahnih a ngei i limkeng bantukin bia a chim.

BIATHLAM 13:12

Sahrang pakhatnak nih a ngeihmi nawlngeihnak kaupi kha amah hmai hrimhrim ah cun a hman. Thihpi awk tlak a simi hma a ing i a dam ṭhanmi sahrang pakhatnak kha, nan biak hrimhrim lai tiah vawlei le a cung i a ummi vialte cu a hnek hna.

BIATHLAM 13:13 

Sahrang pahnihnak nih cun khuaruahhar ngan pipi kha a tuah hna; mi vialte mit hmuh ah vancung in mei kha vawlei ah a tlakter.

BIATHLAM 13:14

Cun vawleicung i khua a sami vialte cu, khuaruahharnak a tuahmi khan a hlen hna; cu khuaruahharnak hna cu sahrang pakhatnak hmaika i tuahnak nawl pek a simi khuaruahharnak kha an si. Vainam in thahhrulhmi a si nain a nungmi sahrang upatnak caah khan milem pakhat nan ser lai, tiah vawlei cung mi vialte kha sahrang nih cun a ti hna.

BIATHLAM 13:15

Sahrang pakhatnak milem chungah khan sahrang pahnihnak cu nunnak thaw khumhnak nawl pek a si i cucaah milem cu a holh kho i amah a bia lomi cu a thah hna.

BIATHLAM 13:16

Sahrang nih cun mi vialte, a hme si hna seh, a ngan si hna seh, a rum si hna seh, sifak si hna seh, sal si hna seh, a luatmi si hna seh, an dihlak in an orhlei kut asiloah an cal ah hmelchunhnak hramhram in a ngeihter hna.

BIATHLAM 13:17

Cu hmelchunhnak an ngeih lo ahcun ahohmanh nih thil kha a cawk zong an caw kho lo i a zuar zong an zuar kho lo, cu hmelchunhnak cu sahrang min, asiloah, sahrang min ca i hmanmi nambar kha a si.

BIATHLAM 14:1

Khua ka hun zoh i Zion Tlang i Tuufa a dir ko kha ka hmuh; a sinah cun mi sing khat sang li le thong li an um i cu hna cu an cal i amah min le a Pa min khenhmi kha an si.

BIATHLAM 14:3

Sing khat sang li le thong li hna cu bawiṭhutdan le saram nung pali hna le upa hna lei hoih khan an dir. Vawlei cungin tlanh a simi hna lawng nih an thiam khawhmi hla thar kha an sa.

BIATHLAM 14:4

Annih cu nu he um ṭi loin thiang tein a ummi an si; nu le pa sinak a hngal lomi an si. Tuufa kha a kalnak kip ah an zulh. A tang rihmi minung hna lakin tlanhmi an si i Pathian sin le Tuufa sinah pekchanh hmasa bikmi an si.

BIATHLAM 14:5

Lih an chim bal lo, palhnak zeihmanh an tuah lo.

 BIATHLAM 14:6

Vawlei cung mi vialte, phun kip, ram kip, holh kip le mi kip sin i thanh awk a simi, zungzal Thawngṭha aa phorh i vanlai i a zuangmi vancungmi pakhat kha ka hmuh.

BIATHLAM 14:7

Aw thang piin, "Pathian kha ṭih u law a lianhngannak kha thangṭhat u. Zeicahtiah amah nih minung vialte bia a ceih hna lai caan kha a phan cang. Van le vawlei le rili le tiput a sertu kha bia u," a ti.

BIATHLAM 14:8

Vancungmi pahnihnak nih pakhatnak kha a hun zulh i, "Minu cu a ril cang! Babilon khuapi cu a ril cang. A zu cu mi vialte kha a pek hna i a dinter hna — cu a zu cu a hornak zu ṭhawng kha a si," a ti.

BIATHLAM 14:11

A hremtu hna mei a khu cu zungzal in a kai zungzal ko. Sahrang le a milem a biami le sahrang hmelchunhnak a ngeimi hna caah cun, chun zongah zan zongah lungdaih hnangamnak zeihmanh a um ti lo.

BIATHLAM 14:12

Pathian mi hna, Pathian nawl a ngai i Jesuh cungah zumh awk tlak in khua a sami hna nih cun, hi zawn ah hin in khawhnak an ngeih awk a hau.

BIATHLAM 14:13

Cun vancung in aw pakhat ka theih i, "Hihi ṭial tuah: Khrih zumh bu tein a thimi cu lunglawmmi an si," a ti. Cun Thlarau nih, "A si hrimhrim lai. An rianṭuanmi nih khan a zulh hna lai i rian an ṭuannak cun an i din cang lai," tiah a leh.

BIATHLAM 14:14

Cun khua ka hun zoh i khuadawm rang pakhat ka hmuh, cu cungah cun minung he aa lomi kha a ṭhu, a lu ah sui bawiluchin aa chinh i a kut in a harmi faah pakhat aa put.

BIATHLAM 14:15

Biakinn khan a dang vancungmi pakhat a chuak i khuadawm cung i a ṭhumi cu fak piin a auh i, "A caan a cut cang caah na faah kha hmang law facang kha at tuah; vawlei cung rawl cu ṭuan a cu cang," a ti.

BIATHLAM 14:16

Cun khuadawm cung i a ṭhumi nih khan vawlei ah a faah cu a vun hei i rawl cu a ṭuan.

BIATHLAM 14:18

Cun vancungmi dang pakhat, mei uktu a simi kha biakṭheng khan a ra. A har ngaimi faah aa putmi vancungmi kha fak piin a hei auh i, "Na faah kha hmang law mitsur kha an hmin cang caah mitsur lo i a ummi mitsur kha ṭuan hna," a ti.

BIATHLAM 14:19

Cucaah vancungmi nih khan a faah cu vawlei ah a vun hei i mitsur ruang mitsur thei kha a ṭuan hna i Pathian thinhunnak mitsur nennak chungah khan a thlak hna.

BIATHLAM 14:20

Mitsur thei cu khuapi leng i a ummi mitsur nennak ah khan an nen hna i mitsur nennak chung cun thisen a chuak i khan za hnih a luang i pe nga tluk a thuk.

BIATHLAM 15:1

Cun van ah khin khuaruahhar le lianngan ngai a simi hmelchunhnak a dang pakhat ka hmuh ṭhan. Vancungmi pasarih, hremnak pasarih aa putmi kha ka hmuh hna i cu hremnak cu a hmanung bik an si cang, zeicahtiah Pathian thinhun phuannak a donghnak an si.

BIATHLAM 15:2

Khua ka hei zoh i mei he cawhmi thlalang rili he, aa lomi kha ka hmuh. Cun a min, nambar in chimmi sahrang le a milem a teitu hna kha ka hmuh hna. Annih cu thlalang rilikam ah khan an dir i Pathian nih a pekmi hna tingtang kha an i put.

BIATHLAM 15:3

Annih cu Pathian sal Moses hla kha le Tuufa hla kha an sa i, "Bawipa, a lianngan bik Pathian, Zeitluk in dah na thil tuahmi hi an lianhngan i khuaruahhar an si. Miphun vialte Siangpahrang, Na lam cu zeitluk in dah a dikmi le a hmaanmi a si!

BIATHLAM 15:4

Bawipa, ahodah nangmah ṭih loin a um ngam lai? Na lianngannak chim duh loin ahodah a um lai? Nangmah lawng a thiangmi na si. Miphun vialte nih na hmaiah an ra lai i an in biak lai, Thil ding na tuahmi kha mi vialte nih hmuh a si caah," an ti.

BIATHLAM 15:5

Cu hnuah cun vancung i biakinn aa hun kha ka hmuh i a chungah cun Biakamnak Thlam kha a um.

BIATHLAM 15:6

Hremnak pasarih aa putmi vancungmi biakinn chungin an chuah kha ka hmuh; puan rang thiang an i aih i an ṭang ah sui ṭangmenh kha an i menh.

BIATHLAM 15:8

Biakinn cu Pathian sunparnak le lianhngannak meikhu in a khat i vancungmi pasarih nih hremnak pasarih an tlunpimi a dih hlantiang ahohmanh biakinn chungah cun an lut kho lo.

BIATHLAM 16:1

Cun biakinn khan aw thangpi pakhat nih vancungmi pasarih hna cu, "Va kal u law Pathian thinhunnak kanto pasarih kha vawlei ah va thle hna u," tiah a ti thawng kha ka theih.

BIATHLAM 16:2

Vancungmi pakhat cu a kal i a kanto cu vawlei ah khan a bungh. Sahrang hmelchunhnak a ngeimi hna le a milem a biami hna kha ṭih a nung ngaingaimi le a fak ngaingaimi hmachia nih a tlunh hna.

BIATHLAM 16:3

Cun vancungmi pahnihnak nih a kanto cu rili ah a bungh. Ti cu mithi mi chungin a chuakmi thisen bantuk ah a cang i rili chung thilnung vialte cu an thi dih.

BIATHLAM 16:4

Cun vancungmi pathumnak nih a kanto cu tiva le tiput cungah khan a bungh i thisen ah an cang dih.

BIATHLAM 16:5

Ti a uktu vancungmi nih cun, "Hi na tuahmi biaceihnak ah hin na ding ko, maw a Thiang Mi, atu i a um liomi le hlan i a rak um cangmi Pathian!

BIATHLAM 16:6

Pathian mi hna le profet hna kha an thi an rak chuah hna caah nangmah nih annih cu din awkah thi kha na pek ve hna. Annih nih hmuh awk i an i tlakmi kha an hmuh ko," a ti.

BIATHLAM 16:8

Cun vancungmi palinak nih a kanto kha ni cungah a bungh i ni cu mi kha khanghnak nawl a hmu.

BIATHLAM 16:9

Ni lin nih cun mi kha a kangh hna i hi hremnak cung i nawl a ngeitu Pathian min kha an thang chiat. Asinain an sualnak kha an mertak duh lo i Pathian lianhngannak kha an thangṭhat duh lo.

BIATHLAM 16:10

Cun vancungmi panganak nih a kanto cu sahrang bawiṭhutdan cungah khan a bungh. Sahrang pennak ram cungah khan muihnak a tlung ciammam i fahnak an inmi kha a fah tuk caah an lei kha an i seh,

BIATHLAM 16:11

cun fahnak le hmachia an in ruangah khan vancung Pathian cu an thangchiat. Asinain an lam ṭhalo kha an kaltak hlei lo.

BIATHLAM 16:12

Cun vancungmi paruknak nih a kanto cu Zufrates tivapi cungah a bungh. Tiva cu a kao i nichuahlei in a rami siangpahrang hna caah khan lam a rak awnter.

BIATHLAM 16:13

Cun thlarau thur pathum, utlak a lomi kha ka hmuh hna; limkeng kaa chung le sahrang kaa chung le nal profet kaa chungin an hung chuak.

BIATHLAM 16:14

Annih cu khuachia thlarau, khuaruahharnak a tuah khomi kha an si. Cu thlarau pathum hna cu vawleicung khuazakip ah khan an kal i vawleicung siangpahrang vialte kha an pumh hna. Cu bantukin hmunkhat ah an pumh hna cu, Lianngan Bik Pathian ni lianngan ni ah pakhat le pakhat i do hna seh ti caah a si.

BIATHLAM 16:16

Cun thlarau hna nih khan siangpahrang cu hmunkhat ah an pumh hna i cu hmun cu Hebru holh in Armageddon ti a si.

BIATHLAM 16:15

"Ngai hmanh, mifir bantukin ka ra lai. Zapi lakah taklawng in an vah nakhnga lo le ningzak in an um nakhnga lo, hngilh lo tein a rak um i a hnipuan ṭha tein a rak i fimhlawmmi cu, lunglawmmi an si," a ti.

BIATHLAM 16:17

Cun vancungmi pasarihnak nih khan a kanto cu thlitu lakah a bungh. Biakinn chung bawiṭhutdan khan aw thangpi pakhat a ra chuak i, "A dih cang!" tiah a ti.

BIATHLAM 16:18

Nimtlau a lek, khua a ri, ṭek a tla i ṭihnung ngaingai in li aa hnin. Minung ser hramthawk in cu bantuk lihnin cu a um bal lo; lihnin vialte lakah lihnin fak bik a si.

BIATHLAM 16:19

Khualipi cu cheu thum ah a kuai i ram vialte cu an khua kha an rawk dih. Pathian nih a liannganmi Babilon kha a philh lo i a hrai chung zu kha a dinter — a thinhunnak zu kha.

BIATHLAM 16:20

Tikulh vialte kha an lo dih i tlang vialte zong kha an lo dih.

BIATHLAM 16:21

Rial ngan pipi, pawng za khat tiang a ritmi kha van in minung cungah an tla. Cun mi nih rial in hremnak an in ruangah cun Pathian kha an thangchiat, an inmi hremnak cu a fak hringhranmi a si ko.

BIATHLAM 17:1

Cun vancungmi pasarih lak i pakhat, kanto aa putmi kha ka sinah a ra i, "Ra law, rilipi cungah bawinu ṭhut in a ṭhumi hlawhhlangnu milianngan nu kha, zeitindah dantat a si lai, ti kha kan hmuhsak lai.

BIATHLAM 17:2

Vawlei cung siangpahrang hna nih hlawhhlangnu milianngan nu he cun sualnak an tuah i a sualnak zu an dinnak cun vawlei cung mi cu an ri dih," a ti.

BIATHLAM 17:3

Thlarau nih khan a ka tlaih i vancungmi nih khan thetse ram ah a ka kalpi. Cuka ah cun nu pakhat, sahrang sen cung i aa citmi kha ka hmuh i cu sahrang cu a tak khat in min ṭhalo aa ṭial; cu sahrang nih cun lu pasarih le ki pahra a ngei.

BIATHLAM 17:4

Nu cu maimaw le puansen in aa thuam i sui hlawn le lungvar le pale lungvar in aa ṭamh. A kut in sui hrai pakhat aa put i cu sui hrai cu fihnung le ṭeifiak in a khat, cu fihnung le ṭeifiak cu a sualnak theitlai kha an si.

BIATHLAM 17:6

Cun cu nu cu, Pathian mi hna thisen le Jesuh cungah zumhawktlak in an um ruangah thahmi hna thisen a rit kha ka hmuh. Amah ka hmuh tikah ka khuaruah a har tuk hringhran.

BIATHLAM 17:7

Vancungmi nih cun, "Zeicahdah na khuaruah a har? Minu sullam le aa citmi sahrang, lu pasarih le ki pahra a ngeimi sullam cu kan chimh lai.

BIATHLAM 17:8

Na hmuhmi sahrang kha hlanah cun a rak nung, asinain atu cu a nung ti lo, rawhralnak a phak hlanah dongh hngal lo khor chung khan a hung chuak lai. Vawlei cung i khua a sami, vawlei ser hlan in nunnak cauk chungah an min a rak i ṭial lomi hna nih khan, sahrang cu an hmuh tikah an khuaruah a har lai, zeicahtiah voi khat cu a rak nung, atu cu a nung ti lo, asinain a hung chuak ṭhan lai.

BIATHLAM 17:9

"Fim le hngalhthiam a hau. Lu pasarih hi tlang pasarih, nu a ṭhutnak tlang pasarih kha an si. Cun siangpahrang pasarih zong kha an si fawn.

BIATHLAM 17:10

Panga cu an ril cang, pakhat cu atu hi siangpahrang a si lio a si i a dang pakhat cu a ra rih lo; a rat tikah caan tlawmte lawng a um lai.

BIATHLAM 17:11

Cun hlan i a rak nung i atu i a nung ti lomi sahrang kha, siangpahrang pariatnak a hmasa pasarih bu chung i aa tel vemi kha a si i rawhralnak phak awkah a hung chuak.

BIATHLAM 17:12

"Ki pahra na hmuhmi kha siangpahrang pahra, uknak hram aa thawk rih lomi, sihmanhsehlaw sahrang he suimilam pakhat chung uk ṭi dingin nawl pekmi an si.

BIATHLAM 17:13

Hi pahra hna nih hin an dihlak in tinhmi pakhat an ngei i an ṭhawnnak le an nawl ngeihnak cu sahrang kha an pek.

BIATHLAM 17:14

Annih nih Tuufa kha an doh lai; sihmanhsehlaw Tuufa le Tuufa nih a kawh hna i a thim hna i zumhawktlak zultu a simi hna nih khan an tei hna lai, zeicahtiah Tuufa cu bawi vialte Bawipa le siangpahrang vialte Siangpahrang a si," a ti.

BIATHLAM 17:15

Vancungmi nih cun a ka thawh ṭhan i, "Hlawhhlangnu a ṭhutnak rilipi na hmuhmi kha miphun hna le ram hna le holh hna le mi hna an si.

BIATHLAM 17:18

"Nu na hmuhmi cu vawlei cung siangpahrang hna a uktu khualipi kha a si," a ti.

BIATHLAM 17:16

Ki pahra na hmuhmi le sahrang nih khan hlawhhlangnu kha an huat lai i a ngeihmi vialte kha an chuh dih lai i taklawng in an chiah lai; a sa kha an ei lai i amah cu mei in an khangh lai.

BIATHLAM 17:17

Zeicahtiah Pathian nih a chimmi bia kha a tlin hlantiang cu, Pathian nih aa tinhmi tuah duhnak kha an lungthin chungah a chiah i cucaah lungnge tein rian an ṭuan i uknak nawl an ngeihmi kha sahrang cu an pek.

BIATHLAM 17:18

"Nu na hmuhmi cu vawlei cung siangpahrang hna a uktu khualipi kha a si," a ti.

BIATHLAM 18:1

Khi hnuah vancung in vanmi dang pakhat a run kha ka hmuh. Nawlngeihnak a ngan ngaingaimi a ngei i a sunparnak nih vawlei cu a ceuh dih.

BIATHLAM 18:2

Fak piin a au i, "Nu kha a ril cang! Babilon Khualipi kha a tlu cang. Khuachia le thlarau thur nih an umhnawh cang i a thurhnawmmi le fihnung a simi vate a phunphun in a khat cang.

BIATHLAM 18:4

Cun vancung in aw pakhat ka theih ṭhan i, "Ka mi hna, chuak tuah u, Amah chung khan chuak tuah u! Sualnak a tuahmi ah khan i tel hlah u, Dantatnak a hmuh ding zong kha i hrawm hlah u.

BIATHLAM 18:20

Sihmanhsehlaw amah a rawh ruangah van cu i lawm ko seh. Pathian mi hna le lamkaltu hna le profet hna, i lawm ko u! Zeicahtiah nan cung i a tuahmi ruangah khan Pathian nih amah cu dan a tat cang!

BIATHLAM 18:24

Profet hna le Pathian mi hna kha a chungah an thisen an chuah hna caah Babilon cu dantat a si cang; asi, vawlei cungah thah a simi vialte hna an thisen cu amah chungah cun hmuh an si dih!

BIATHLAM 19:1

Cu hnuah cun vancung i a ummi mibu nganpi aw thawng bantuk ka theih i, "Pathian cu thangṭhat ko u. Khamhnak le sunparnak le lianhngannak cu kan Pathian ta an si.

BIATHLAM 19:2

A biaceihmi cu dingte le hmaan tein a ceih. Vawlei a hornak in a thurhnawmhtertu hlawhhlangnu milianngan nu kha sual a phawt cang. Pathian sal kha a thah hna caah Pathian nih dan a tat cang," a ti.

BIATHLAM 19:7

I lawm u si law i nuam u sih; a lianngannak cu thangṭhat u sih! Zeicahtiah Tuufa nupi ṭhit caan cu a phan cang i a ṭhit laimi ngaknu cu aa tim cang.

BIATHLAM 19:10

Amah biak awkah a ke hramah ka bawk, sihmanhsehlaw a ka thawh i, "Bawk hlah. Keimah zong nangmah bantukin Pathian sal ka si ve, Jesuh nih a phuanmi biatak aa tlaihmi nan unau hna lak i pakhat ka si ve. Pathian tu bia tuah," a ti. Profet hna kha lungthawhnak a petu cu Jesuh nih a phuanmi biatak kha a si.

BIATHLAM 19:11

Cun van kha aa hung i rang rang pakhat ka hmuh. A cung i aa citmi cu a min ah Zumhawktlak le Ahmaanmi ti a si; bia a ceih tik le ral a doh tikah dinnak in a ceih i a doh.

BIATHLAM 19:12

A mit cu meizik bantuk an si i a lu ah bawiluchin tampi aa chinh. A cungah min pakhat aa ṭial, asinain amah dah ti lo nih cun zei a si ti kha ahohmanh nih an hngal lo.

BIATHLAM 19:13

Aa aihmi puan cu thi aa neh dih. An auhnak a min cu "Pathian Bia" ti a si.

BIATHLAM 19:14

Vancung ralkap bu nih khan rang rang cungin an zulh i puan rang in an i thuam.

BIATHLAM 19:15

A har ngaingaimi nam pakhat a kaa chungin a hung chuak i cu nam cun miphun vialte kha a tei dih hna lai. Annih cu thirfung in a uk hna lai i Lianngan Bik Pathian thinhunnak mitsur nennak chung mitsur kha a nen hna lai.

BIATHLAM 19:16

A puan le a ke ah, "siangpahrang vialte Siangpahrang le bawi vialte Bawi," tiin aa ṭial.

BIATHLAM 19:19

Rang cung i aa citmi le a ralkapbu kha doh awkah sahrang le vawlei cung siangpahrang hna cu an i pum.

BIATHLAM 19:20

Sahrang cu an tlaih i thong ah an thlak, cun a hmaika i khuaruahharnak a tuah tawntu nal profet zong kha an tlaih chih. (Sahrang hmelchunhnak a ngeimi hna le sahrang milem a biami hna kha, khuaruahharnak a tuahmi khan a hlen hna). Cun sahrang le nal profet cu an pahnih in kat meialh tili ah a nung in an paih hna.

BIATHLAM 19:21

Rang aa citmi kaa chungin a chuakmi vainam nih an ralkap vialte cu a thah dih hna i an sa cu va vialte nih an i serh.

BIATHLAM 20:1

Cun vanmi pakhat vancung in a rung ṭum i dongh hngal lo khor tawh le cikcin nganpi aa put kha ka hmuh.

BIATHLAM 20:2

Rulhreu, limkeng kha a tlaih i kum thong khat a hren — cu limkeng cu Khuachia, asiloah, Satan kha a si.

BIATHLAM 20:3

Vanmi nih cun dongh hngal lo khor chungah khan a thlak i kum thong khat kha a dih hlantiang, mi kha a hlen khawh ti hna nakhnga lo, a hrenh i ca a khenh chih. Cu hnuah cun tlawmpal chuah a si te lai.

BIATHLAM 20:7

Kum thong khat kha a dih tikah Satan cu thong chung khan chuah a si lai i

BIATHLAM 20:8

vawlei kil li ah aa ṭhekmi miphun vialte kha hlen awkah aa thawh lai, cu hna cu Gog le Magog kha an si. Satan nih cun i tuk awkah a pumh ciammam hna lai i rili kam thetse zat an si lai.

BIATHLAM 20:9

Vawleicung khuazakip ah khan an i ṭhek i Pathian mi hna umnak hmun le Pathian nih a dawtmi khua kha an kulh. Sihmanhsehlaw van in mei a rung tla i a thah dih hna.

BIATHLAM 20:10

Cun annih a hlengtu hna, Khuachia kha, mei le kat tili chungah khan an paih, cuka cu sahrang le nal profet an rak thlaknak hna kha a si; cuka ah cun chunzan in zungzal hrem an si zungzal ko lai.

BIATHLAM 20:4

Cun bawiṭhutdan hna le a cung i a ṭhumi hna kha ka hmuh hna; annih cu biaceihnak nawl kha pek an si. Jesuh nih a phuanmi biatak le Pathian bia an chim ruangah thahnak a ingmi thlarau hna zong kha ka hmuh hna. Sahrang kha an bia lo, a milem zong an bia lo, an cal le an ban zongah sahrang hmelchunhnak kha an ngei lo. An hung nung i Khrih he cun siangpahrang bantukin kum thong khat chung uktu bawi an si.

BIATHLAM 20:5

(Mithi mi a dang cu kum thong khat a dih hlan kha cu an nung lo). Mah hihi mithi thawhter an si a hmasa u cu a si.

BIATHLAM 20:6

Hi mithi thawhter an si a pakhatnak i aa telmi hi cu lunglawmmi le thluachuak hringhranmi an si ko. Thih voi hnihnak nih an cungah nawl zeihmanh a ngei lo; annih cu Pathian le Khrih tlangbawi an si lai i Khrih he cun kum thong khat chung uktu bawi an si lai.

BIATHLAM 20:11

Cun bawiṭhutdan raangpi le a cung i a ṭhumi kha ka hmuh hna. A cung i a ṭhumi hmaika cun vawlei le van kha an zaam i an um ti lo.

BIATHLAM 20:12

Cun mithi mi kha, a ngan he a hme he, bawiṭhutdan hmai i an ṭhut kha ka hmuh. Cauk kha an kau hna, cun cauk a dang pakhat, nunnak cauk zong kha an kau ve. Mithi cu an rak tuahmi cauk chung i aa ṭialning khan an bia an ceih hna.

BIATHLAM 20:13

Cun rili nih a chung i a thimi kha a hun chuah hna. Thihnak le mithi khua zong nih khan, an hrenmi mithi kha an hun chuah ve hna. An dihlak in an tuahning cio khan an bia an ceih hna.

BIATHLAM 20:14

Cun thihnak le mithi khua cu mei tili chungah khan an paih hna. (Hi mei tili hi thih voi hnihnak cu a si).

BIATHLAM 20:15

Nunnak cauk chungah an min aa ṭial lomi paoh cu mei tili chungah cun an paih hna.

BIATHLAM 21:1

Khi hnuah van thar le vawlei thar kha ka hmuh hna. Van hmasa le vawlei hmasa kha an lo cang i rili kha a um ti lo.

BIATHLAM 21:2

Cun Khua Thiang, Jerusalem thar kha Pathian sinin vancung in a rung ṭum cu ka hmuh, va ngei lai ngaknu nih a va ding ton awkah aa ṭamh bantuk khin aa ṭamh.

BIATHLAM 21:3

Bawiṭhutdan in aw thangpi pakhat ka theih i, "Pathian umnak inn cu minung hna sinah a um cang. Anmah sinah cun a um lai i annih cu a mi an si lai. Pathian hrimhrim cu an sinah a um lai i amah cu an Pathian a si lai.

BIATHLAM 21:4

An mitthli vialte kha a hnawh dih hna lai. Thihnak a um ti lai lo, ngaihchiatnak le ṭahnak le fahnak zong a um ti lai lo. Thil hlun vialte cu an lo dih cang," a ti.

BIATHLAM 21:5

Cun bawiṭhutdan i a ṭhumi nih cun, "Atu cu thil vialte kha a thar in ka ser dih cang hna," a ti. A ka thawh i, "Hi bia hi ṭial hna, zeicahtiah ahmaanmi le zumhawktlak a simi bia an si," a ti.

BIATHLAM 21:6

Cun aa thawh i, "Rian ka lim dih cang. Kei cu Alfa le Omega, hramthawknak le donghnak ka si. Tihal paoh nunnak tiput ti kha man loin ka dinter hna lai.

BIATHLAM 21:7

Teitu a simi paoh nih hihi ka sinin an hmuh lai: Keimah cu an Pathian ka si lai i annih cu ka fa an si lai.

BIATHLAM 21:8

Sihmanhsehlaw miralchia le mirawi hmang le fih awk lungthin a ngeimi le lainawngmi le horduhcuaimi le camh hmangmi le siasal biami le lihchimmi vialte hna an umnak ding cu, mei le kat in a alhmi tili, thih voi hnihnak kha a si," a ti.

BIATHLAM 21:9

Vancungmi pasarih hna lak i pakhat, hremnak hmanung bik pasarih in a khatmi kanto pasarih aa putmi kha ka sinah a ra i, "Ra hmanh, Tuufa nupi, va ngei lai ngaknu cu kan hmuhsak lai," a ti.

BIATHLAM 21:10

Thlarau nih cun a ka tlaih i vancungmi nih khan tlang sangpi pakhat par ah a ka kaipi. Cun Jerusalem, Khua Thiang kha Pathian sinin vancung in a rung ṭum kha a ka hmuhsak.

BIATHLAM 21:11

Cu khua cu Pathian sunparnak in a cer. Khualipi cu lung man sung, jasper lungvar bantukin a tleu i thlalang bantukin a fiim.

BIATHLAM 21:12

Kulhnak vampang nganpi a sang ngaimi pakhat a ngei i cu kulhnak vampang ah cun kutka hleihnih an um i cu kutka hleihnih cu vancungmi hleihnih nih an cawngh hna. Cu kutka ah cun Israel mi phun hleihnih min kha an i ṭial.

BIATHLAM 21:14

Khua kulhnak vampang cu lung pahleihnih cungah bunh a si i cu lung pahleihnih cungah cun Tuufa lamkaltu pahleihnih hna min kha an i ṭial.

BIATHLAM 21:18

Vampang cu jasper lungvar in ser a si i khuapi cu sui thiang in ser a si i thlalang fim in a fim.

BIATHLAM 21:19

Khua kulhnak vampang hram cu lung man sung a phunphun in an ṭamh. A tang nung bik lung cu jasper lungvar a si, a pahnihnak cu safaiar lungvar a si, a pathumnak cu agate lungvar a si, a palinak cu emeral lungvar a si,

BIATHLAM 21:21

Kutka hleihnih cu rili lungvar hlum pipi hleihnih an si, kutka pakhat ah lungvar hlum pakhat a si ko. Khuapi chung lam cu sui thiang a si i thlalang bantukin a tleu.

BIATHLAM 21:22

Khuapi chungah cun biakinn ka hmu lo, zeicahtiah a biakinn cu Lianngan Bik Bawipa Pathian le Tuufa kha a si.

BIATHLAM 21:23

Khuapi nih cun ni ceunak siseh, thlapa ceunak siseh a herh lo, zeicahtiah Pathian sunparnak nih cun a ceuh i Tuufa cu a meiinn a si.

BIATHLAM 21:25

Khuapi kutka cu chunnitlak in an i hung zungzal ko, zeitikhmanh ah an i khar lo, zeicahtiah khika ah zan a um ti lo.

BIATHLAM 21:27

Sihmanhsehlaw a thurhnawmmi cu khi khua chungah ahohmanh an lut kho lai lo; ningzah awk thil a tuahmi hna le lih a chimmi hna zong ahohmanh an lut kho lai lo. Tuufa nunnak cauk chung i an min aa ṭialmi lawnglawng cu khuapi chungah cun an lut kho lai.

BIATHLAM 22:1

Vancungmi nih cun nunnak tiva zong a ka hmuhsak, cu tiva cu Pathian le Tuufa bawiṭhutdan hram in khuapi laifang ah a rung luangmi a si i thlalang bantukin a fiim.

BIATHLAM 22:2

Cu tivakam ah cun nunnak thingkung cu a um i kum khat ah voi hleihnih, thla khat ah voi khat lengmang thei a tlai; cun a hnah cu miphun vialte hna caah damnak a si.

BIATHLAM 22:5

Zan a um ti lai lo i meiinn siseh, ni ceunak siseh, an herh ti lai lo, zeicahtiah Bawipa Pathian cu an ceunak a si lai i annih cu siangpahrang bantukin uktu zungzal in zungzal tiang an si lai.

BIATHLAM 22:3

Pathian nih chiat a serhmi thil paohpaoh cu cu khua chungah cun an um kho lai lo. Pathian bawiṭhutdan le Tuufa bawiṭhutdan cu khuapi chungah cun a um lai i a rianṭuantu hna nih khan an biak lai.

BIATHLAM 22:4

Annih nih a hmai an hmuh lai i a min cu an cal ah aa ṭial lai.

BIATHLAM 22:6

Cun vancungmi nih khan a ka thawh i, "Hi bia hi biatak an si i zumhawktlak an si. A Thlarau kha profet hna a petu Bawipa Pathian nih, tuante ah a tlung zau ding thil kha a sal hna hmuhsak awkah, a vanmi kha a run ka thlah," a ti.

BIATHLAM 22:7

Cun Jesuh nih, "Ngai hmanh, ka ra zau lai. Hi cauk chung i aa ṭialmi profet bia a zulmi cu lunglawmmi an si," a ti.

BIATHLAM 22:8

Keimah Johan nih hi thil vialte hi ka theih hna i ka hmuh hna. Cun ka theih hna i ka hmuh dih hna tikah, hi thil vialte a ka hmuhsaktu vancungmi ke hram ah cun ka bawk i biak ka zalh.

BIATHLAM 22:9

Sihmanhsehlaw a ka thawh i, "Tuah hlah. Kei zong nangmah bantukin sal ka si ve ko; na unau profet hna le hi cauk chung i aa ṭialmi bia a zulmi na unau hna bantukin sal ka si ve ko. Pathian tu bia ko," a ti.

BIATHLAM 22:10

Cun hitihin a ka ti, "Hi cauk chung i aa ṭialmi profet chimchung bia hi a thli in i chiah ko hlah. Zeitintiah hi thil vialte cu a tlin lainak caan a nai cang.

BIATHLAM 22:12

Jesuh nih cun, "Ngaihmanh, ka ra zau lai. Mi kip an rianṭuanning cio ah pek awkah ka laksawng cu ka rak i put lai.

BIATHLAM 22:13

Kei cu Alfa le Omega kha ka si, hmasa bik le hmanung bik, hramthawknak le donghnak ka si," a ti.

BIATHLAM 22:14

An puan kha thiang tein a su i nunnak thingkung theitlai ei khawhnak nawl le khuapi kutka chung luhnak nawl a ngeimi cu lunglawmmi an si.

BIATHLAM 22:16

"Keimah, Jesuh nih, Khrihfabu chung i a ummi nannih sinah hi bia cu thanh awkah ka vancungmi kha ka run thlah. Kei cu David tefa kha ka si, kei cu deirel arfi ceu cu ka si," a ti.

BIATHLAM 22:17

Thlarau le va ngei laimi ngaknu nih khan, "Ra u," an ti. Hi bia a theimi paoh nih khan, "Ra u," ti ve hna seh. Ti a halmi paoh cu ra u, nunnak ti hi a duhmi paoh nih man loin i lak u.

BIATHLAM 22:20

Hi thil vialte hi ahmaan dih tiah tehte a khaangtu nih, "Tuan ah ka ra hrimhrim lai," a ti. Cu bantuk cun si ko seh. Bawipa Jesuh, ra ko cang!

BIATHLAM 22:21

Nan dihlak cungah Bawipa Jesuh vel cu um ko seh. Amen.