Nitin Baibal Relnak

JEIM 1:2

Ka u le ka nau hna, nan cungah hneksaknak a phunphun a tlun tikah vanṭha ah i rel u,

JEIM 1:3

zeicahtiah cu bantuk hneksaknak cu nan zumhnak in nan tei tikah in khawhnak nan ngei.

JEIM 1:4

Zeihmanh bau loin a tlingmi nan si nakhnga, a karlak ah ing kho loin um sual loin a dongh tiangin ing ko u.

JEIM 1:5

Sihmanhsehlaw fimnak a baumi nan um ahcun, Pathian sinah thlacam seh law Pathian nih a pek ko lai; Pathian nih cun ahopaoh kha zaangfah ngai le siang ngaiin a pek ko hna.

JEIM 1:6

Asinain thla nan cam tikah lung awṭawm lo tein nan zumh hrimhrim lai. Lung awṭawm in a ummi cu thlichia nih a choihmi rili tilet bantuk a si.

JEIM 1:7-8

Cu bantuk mi nih cun, ka halmi kha Pathian nih a ka pek lai, tiah a ruah awk a si lo; lung awṭawm in a ummi cu an i tinhmi ah khan an kal ciahmah kho bal lo.

JEIM 1:9

Zumtu sifak cu Pathian nih ṭhanchonak a pek tikah i lawm seh law

JEIM 1:10

zumtu mirum cu Pathian nih ṭumchuknak a pek tikah i lawm seh. Zeicahtiah mirum cu ramlak pangpar a par a ṭilh bangin an ṭil lai.

JEIM 1:12

Hneksaknak a in tikah fek tein a ummi cu a lung aa lawm, zeicahtiah cu bantuk hneksaknak kha a tei khawh caah Pathian nih amah a dawtu hna a kamhmi nunnak kha laksawng ah a hmuh lai.

JEIM 1:13

Cu bantuk hneksaknak kha mi nih an in tikah, "Tukforhnak hi Pathian sinin a ra," an ti awk a si lo; zeicahtiah Pathian cu ṭhat lonak nih a tukforh kho lo i amah zong nih ahohmanh a tukforh bal hna lo.

JEIM 1:14

Sihmanhsehlaw mi nih tukforhnak kan in cu, kan duhnak a ṭha lomi nih khan a kan pialpi i rap ah a kan foih caah a si tawn.

JEIM 1:15

Cu tikah thil ṭhalo duhnak nih cun sualnak kha a pawi i a hrin; cun sualnak cu a ṭhang i patling a si tikah thihnak kha a hrin.

JEIM 1:17

Laksawng ṭha le laksawng tlamtling paohpaoh hi vancung in a rami an si; vancung i a ceumi thil a Sertu Pathian sinin a rami an si. Amah cu aa thleng lo, vancung thil ceu hna le cu thil ceu hna thladem cu an i thleng lengmang nain anih cu aa thleng bal lo.

JEIM 1:18

Amah nih amah duh tein a kan ser i a kan sernak ah cun biatak kha a hman, cucaah kannih cu a sermi thil vialte lakah cungnung bik kan si.

JEIM 1:19

Ka dawtmi u le nau hna, mah hihi philh hlah u: ahohmanh bia theih duhnak leiah cun a khul a rangmi si u law biachimnak lei le thinhunnak lei ah cun a khul a nuarmi si u.

JEIM 1:22

A bia kan theih paoh ahcun a za, tiah nanmah le nanmah kha i hleng len hlah u. A bia cu a tuah tu in tuah deuh u.

JEIM 1:23

A bia a thei nain a tuah ṭung lomi cu hi bantuk mi hi a si: mipa pakhat nih thlalang aa bih i amah le amah cu aa hmu.

JEIM 1:24

Ṭha tein aa zoh i a kal i zei ka lo ti kha a philh colh.

JEIM 1:25

Sihmanhsehlaw mi a luattertu nawlbia tling chungah ṭha tein aa bih i cucu a ruat peng i, a theihmi kha philh loin a tuahmipa cu Pathian nih a tuahnak ah lawmhnak a pek.

JEIM 1:26

Mi pakhatkhat nih, kei cu biaknak leiah aa zuammi ka si, tiah aa ruat ko lai, sihmanhsehlaw a lei kha a uk khawh lo ahcun a biaknak cu pakpalawng a si i amah le amah aa hlengmi a si.

JEIM 1:27

Sihmanhsehlaw nuhmei ngakṭah ṭha tein zohkhenh le vawlei cungah thurhnawm lo tein um tu hi Pathian kan Pa nih biaknak thiang le biaknak taktak i a ruahmi cu a si.

JEIM 2:1

Ka u le ka nau hna, sunparnak Bawi, Bawipa Jesuh Khrih a zummi nan si bantukin mi thleidannak lungthin zeihmanh ngei hlah u.

JEIM 2:5

Ka dawtmi ka u le ka nau hna, ngai hmanh u. Pathian nih hi vawlei cung i misifak hna hi, zumhnak i a rummi si awk le amah a dawtu a kamhmi hna Pennak kha a comi si awkah a thim hna.

JEIM 2:9

Sihmanhsehlaw mi cu a lenglei i an langhning lawngin na ti hna ahcun na sual cang, Nawlbia nih khan nawlbia buartu ah an hmuh cang.

JEIM 2:10

Nawlbia chung bia pakhat a buarmi cu nawlbia a dihlak in a buar a si ko.

JEIM 2:12

Zalonnak an petu nawlbia nih bia a ceih laimi hna bantukin nan biachim le nan thil ti ah um u.

JEIM 2:13

Zeicahtiah zaangfahnak a ngei lomi cu Pathian nih a bia a ceih tikah a zaangfah ve lai lo; zeicahtiah zaangfahnak cu biaceihnak nih a tei.

JEIM 2:14

Ka u le ka nau hna, pakhat khat nih, "Zumhnak ka ngei," ti seh law, cu zumhnak cu a tuahnak nih a langhter ṭung lo ahcun, zeidah a ṭhathnem? Cu zumhnak nih cun a khamh khawh lai maw?

JEIM 2:17

Cu bantukte cu zumhnak zong cu a si ve, tuahnak zeihmanh a chuahter lo ahcun a thimi thil a si ko.

JEIM 2:18

Sihmanhsehlaw a cheu nih nan i thawh hnga i, "Pakhat nih zumhnak a ngeih, a dang pakhat nih tuahnak a ngeih," nan ti hnga. Cu tikah kan lehnak hna cu, "Zeitindah tuahnak um loin mi nih zumhnak a ngeih khawhning a si ka hmuhsak tuah. Kei nih cun ka zumhnak cu ka tuahnak in kan hmuhsak hna lai," ti hi a si hnga.

JEIM 2:22

Nan hngal kho lo maw? A zumhnak le a tuahnak cu hmunkhat ah pei rian an ṭuan kha; a zumhnak cu a tuahnak thawngin pei a tlin kha.

JEIM 2:23

Cucaah cun, "Abraham nih Pathian a zumh i cu a zumhnak thawng cun Pathian nih miding ah a cohlan," tiah a titu Cathiang bia cu a tling. Cucaah Abraham cu, "Pathian hawi," tiah ti a si.

JEIM 2:24

Cucaah minung cu an zumhnak thawng lawnglawng khan si loin, an tuahmi thawng khan Pathian he i remnak an hmu ti cu nan hngalh.

JEIM 2:26

Cucaah cun pum cu thlarau loin a thih bantukin zumhnak zong tuahnak loin a thi ve.

JEIM 3:1

Ka u le ka nau hna, tam tuk cu saya nan si awk a si lo, zeicahtiah kannih saya pawl hi hawi nak fak deuh in biaceihnak kan hmu lai ti kha nan hngalh.

JEIM 3:2

Kan dihlak hin palhnak kan tuah cio tawn. A biachim ah palhnak a tuah lomi cu mitling a si i a pum aa uk khomi a si.

JEIM 3:6

Lei cu mei bantuk a si. Thil ṭhalo aa hlumnak kha a si i kan pum chungah hin a dihlak khan ṭhat lonak cu a vahter. Kan nunnak hi a dihlak in mei in a khangh i cu mei cu hell in a thomi mei a si.

JEIM 3:8

Sihmanhsehlaw lei cu a hrem khotu ahohmanh an um lo. Lei cu thil ṭha lo, uk khawh lomi, thihnak sivai in a khatmi a si.

JEIM 3:9

Kan Bawipa le kan Pa a simi Pathian thangṭhatnak caah kan hman i Pathian mui in sermi kan minung hawi chiatserhnak ah kan hman fawn.

JEIM 3:10

Thangṭhatnak bia le chiatserhnak bia kha kan kaa pakhat chung cun an chuak. Ka u le ka nau hna, hitihin cun a si awk a si lo.

JEIM 3:11

Cerh pakhat chungin ti thlum le ti kha an chuak ṭi bal lo.

JEIM 3:13

Nan lakah a fim i hngalhnak a ngeimi nan um maw? Cu hna nih cun a fimmi le hngalhnak a ngeimi an si kha a ṭhami an nunning le toidornak lungthin le fimnak in an tuahmi thil ah khan an langhter awk a si.

JEIM 3:14

Sihmanhsehlaw nan lung chungin mi nahchuahnak nan ngeih i mi cungah nan thin a hun peng i mah zawn lawng aa ruatmi nan si ahcun, mifim kan si tiin i porhlaw hlah u law, biatak dohnak ah lih kha chim lengmang hlah u.

JEIM 3:15

Cu bantuk fimnak cu vancung in a rami a si lo; cu bantuk fimnak cu hi vawlei cung fimnak hi a si i thlarau aa tel lomi fimnak, khuachia fimnak tu a si.

JEIM 3:16

Nahchuahnak le mah zawn lawng ruahnak a umnak paoh ah i rem lonak le ṭhat lonak a phunphun kha a um zungzal.

JEIM 3:17

Sihmanhsehlaw cunglei in a rami fimnak cu a hmasa bik ah a thiang i cun daite le nem tein a um i hawikom cungah a ṭha; midang zaangfahnak khan a khat i thil ṭha kha tampi a tlai; thleidannak zeihmanh a ngei lo i a zer zong a zer lo.

JEIM 3:18

Cun daihnak sertu pawl nih daihnak in an tuhmi thlaici nih a thei a tlaimi cu ṭhatnak a si.

JEIM 4:1

Nan i siknak le nan i velhnak vialte hi khuazei in dah an rat? Nuamhnak nan duhnak in an ra i cu nan duhnak cu nan pum chungah khan anmah le anmah aa do lengmangmi an si.

JEIM 4:3

Cun nan hal tikah nan hmu kho lo, zeicahtiah nan i tinhmi kha a ṭha lo; nanmah nuamhnak ca lawng i hman awkah khan thil cu nan hal.

JEIM 4:4

Zumh awk tlak lo minung hna! Vawlei he i hawikomh hi Pathian he i ral a si ti kha nan hngal lo maw? Vawlei hawikom si a duhmi paoh nih cun Pathian ral ah an i ser ko.

JEIM 4:5

"Pathian nih kan chungah a chiahmi thlarau cu duhnak ṭihnung in a khat," tiah Cathiang nih a timi kha sullam ngei lo a si tiah ruat sual hlah u.

JEIM 4:6

Sihmanhsehlaw Pathian pekmi vel cu cu nak hmanh cun a ṭhawng deuh chinchin. Cathiang nih a ti bangin, "Pathian nih aa porhlawmi cu a doh hna i mi toi i aa dormi kha vel a ngeih hna."

JEIM 4:7

Cucaah Pathian nawl kha ngai ko u. Khuachia kha doh u law an zam tak ko hna lai.

JEIM 4:8

Pathian cu naih u law an naih ve hna lai. Misual mi hna, nan kut kha i ṭawl u. Miziathiam hna, nan lung kha i thianh u.

JEIM 4:10

Bawipa hmaiah toidor tein um u law amah nih an hlorh hna lai.

JEIM 4:13

"Nihin ah maw thaizing ah dik khual kan tlawng lai i khika ah kum khat kum hnih tluk kan um lai i chaw kan tuah lai i tangka tampi kan hmu lai," tiah a timi hna, ka bia hi ngai tuah u.

JEIM 4:14

Thaizing ah na nunnak cu zei a lawh lai hmanh na hngalh ṭung lo. Nang cu minmei zaammi bantuk, atute a hung um i a lo zaumi bantuk pei na si ko cu.

JEIM 4:15

"Bawipa a hna a tlak ahcun, kan nung lai i cucu khakha kan tuah lai," ti tu ah nan ti awk deuh a si.

JEIM 4:17

Cucaah cun hi a ṭhami thil hi ka tuah awk a si tiah a hngal ko ṭung i a tuah lomi cu misual a si.

JEIM 5:7

Cucaah cun ka u le ka nau hna, Bawipa a rat hlantiang lungsau in um ko u. Lothlopa nih a lo in a sunglawimi rawl a chuah lai kha lungsau in a hngah tawn. Fur tlak lai le faruahthawh rat lai kha lungsau in a ngan.

JEIM 5:8

Nannih zong nan lung a sau awk a si. Ruahchannak sangpi ngei ko u. Bawipa cu a ra dengmang cang.

JEIM 5:9

Harnak nan ton tikah pakhat le pakhat i mawhchiat hlah u. Cu ti nan um ahcun Pathian nih bia an ceih sual hna lai. Biaceihtu cu lamnai te ah a um ko i a rung lut zau ko lai.

JEIM 5:10

Bawipa min in bia a rak chimmi profet hna kha, ka u le ka nau hna, philh hna hlah u. Harnak chung i lungsau in sifahnak a ingmi an si caah i zohchun hna u.

JEIM 5:11

Annih nih an in khawh cah, lunglawmmi kan ti hna. Job lungsaunak kha nan theih i Pathian nih a donghnak ah a pek ṭhannak kong kha nan theih. Bawipa cu zaangfahnak le zawnruahnak in a khatmi a si.

JEIM 5:13

Nan lakah harnak a tongmi nan um ahcun, thla cam hna seh. A lung aa lawmmi nan um ahcun, thangṭhatnak hla sa hna seh.

JEIM 5:14

A zawmi nan um ahcun, Khrihfa upa kha au hna u law thla in campiak hna seh law Bawipa min in chiti kha in thuh hna seh.

JEIM 5:15

Zumhnak in thla an camnak nih khan a zawmi kha a damter lai; Bawipa nih damnak kha a pek ṭhan lai i sualnak a tuahmi kha ngaihthiam a si lai.

JEIM 5:19

Ka u le na nau hna, pakhatkhat biatak in nan tlau sual i a dang pakhatkhat nih nan kirpi ṭhan tikah,

JEIM 5:20

misual kha aa palhmi lam in a kirpi ṭhantu nih, cu misual mi thlarau cu thihnak in a khamh lai i sualnak tampi ngaihthiamnak a umter lai, ti kha va philh hlah u.

JEIM 5:16

Cucaah cun nan sualnak kha pakhat le pakhat i chim u law pakhat le pakhat thla i campiak u, cu ti nan tuah ahcun damnak nan hmuh lai. Miṭha mi thlacamnak cu hmual a ngei.

JEIM 5:17

Elijah kha kanmah bantuk minung a si ve ko. Ruah sur hlah seh tiah biatak tein thla a cam i kum thum le a cheu ruah sur loin a um.

JEIM 5:18

Cun thla a cam ṭhan i ruah a sur i vawlei nih tirawl a vuiter.