Nitin Baibal Relnak

1 PETER 1:1

Jesuh Khrih lamkaltu a simi Peter nih, Pontas, Galatia, Kappadosia, Asia le Bithinia peng i ralzam bangin aa ṭhekmi, Pathian thimmi hna, nan sinah ca kan kuat hna.

1 PETER 1:2

Jesuh Khrih kha a nawl ngaih awk le a thi in nannih cu tlengh awkah Pathian kan Pa tinhning in thim nan si i a Thlarau nih miphun thiang ah an ser hna. Vel le daihnak cu tling khitkhet in nan ta si ko seh.

1 PETER 1:3

Kan Bawipa Jesuh Khrih i a Pathian le a Pa cu lawm ko u sih. Zeicahtiah a zaangfahnak a nganmi ruangah kannih cu Jesuh Khrih thihnak in a thawhternak khan, nunnak thar a kan pek. Cucaah kannih cu zumhnak nung in kan khat i

1 PETER 1:4

Pathian nih a mi hna caah a chiahmi thluachuah vanluhnak tampi cu co awkah kan i ruahchan. Cu thluachuahnak cu a thu a man kho lomi le a ziam kho lomi an si i Pathian nih vancung ah khin an chiahpiak hna.

1 PETER 1:5

Cu an chiahpiak hna cu Pathian kha nan zumh caah le khamhnak a phak hlantiang amah ṭhawnnak nih an huhphenh hna caah a si — cu a ra dingmi khamhnak cu atu zongah hin timhcia a si ko cang i caan dongh tikah phuan a si te lai.

1 PETER 1:6

Hi ruangah hin nan lung i lawm ko u, hneksaknak tampi nan in ruangah hin atu ahcun nan ngaih chia hmanh seh law i lawm ko u.

1 PETER 1:7

Hneksaknak nan inmi cu nan zumhnak kha a tak maw tak lo ti hngalhnak caah a si lai. Hrawh khawh a simi thil cu, sui hmanh hi hneksak a hau, cucaah sui nakin let tam piin a sung deuhmi nan zumhnak cu, hneksaknak kha chuak lakin a in khawh nakhnga, hneksak a hau ve. Cun Jesuh Khrih a langh Ni ah cun thangṭhatnak le upatnak le sunparnak kha nan hmuh lai.

1 PETER 1:8

Jesuh cu nan hmu naloin nan dawt, cun nan hmu ṭhiamṭhiam lo nain amah cu nan zumh.

1 PETER 1:9

Cucaah nan zumhnak nih aa tinhmi nan thlarau khamhnak cu nan hmuh caah, holh in chim khawh lomi lawmhnak, a nganmi le a sunglawimi lawmhnak kha nan ngei.

1 PETER 1:10

Hi khamhnak kong hi profet hna nih an ruah an khahmi le an kawlmi a rak si; Pathian nih pek an duhmi hna laksawng kong hi an rak chim chungmi kha a si.

1 PETER 1:11

Zeitik ah dah cu caan cu a si lai ti le zeitindah cu caan cu a rat lai ti kha kawl an rak i zuam i atu caan hi an chungah a ummi Khrih Thlarau nih a rak sawhmi caan cu a si. Thlarau nih cun Khrih nih a in laimi temhinnak le temhnak a in ruangah a hmuh laimi sunparnak kha a rak chimchung cang.

1 PETER 1:13

Cucaah nan lung in rianṭuan awkah timhcia tein um u. Ralring tein um u law, Jesuh Khrih a langh tikah nan hmuh laimi velngeihnak laksawng cungah khan nan i ruahchannak cu bunh ko u.

1 PETER 1:14

Pathian nawl kha ngai u, nan rak hruh lio i nan rak ngeihmi duhnak nih khan nan ziaza cu in uk ti hna hlah seh.

1 PETER 1:15

Nannih an kotu hna Pathian cu a thian bantukin nannih zong thiang ve u.

1 PETER 1:17

Pathian sin i thla nan cam tikah, amah cu kan Pa tiah nan kawh; amah nih cun mi vialte kha an tuahning cio ah duhdanh zeihmanh um loin bia a ceih hna. Cu Pathian cu a sin i thla nan cam tikah, kan Pa, tiin nan kawh ṭung ahcun, hi vawleicung nan nun lioah hin amah upat bu tein nan um awk a si.

1 PETER 1:19

nanmah luatnak man cu a sungmi thi, dotlak lonak zeihmanh a ngei lomi tuufa thi bantuk, Khrih thi kha a si.

1 PETER 1:20

Amah cu Pathian nih vawlei a ser hlan khan a thim cang i nanmah caah hi ni hmanung bik hna caan ah hin a hun langhter.

1 PETER 1:21

Amah thawngin Pathian cu nan zumh i Pathian nih cun thihnak in a thawhter i sunparnak a pek; cucaah nan zumhnak le ruahchannak cu Pathian cungah aa bunhmi an si.

1 PETER 1:22

Biatak nih an fialmi hna nan zulhnak thawngin nanmah cu nan i thianh cang i zumhnak ah nan unau a simi hna cungah khan dawtnak taktak nan ngeih caah, pakhat le pakhat i daw tuah u.

1 PETER 1:23

Pathian bia, a nungmi le zungzal in a hmunmi thawngin, hrintharmi nan si cang, thih a thiammi nu le pa fa si loin thih a thiam lomi pa fa nan si cang.

1 PETER 1:25

Sihmanhsehlaw Bawipa bia cu zungzal in a hmun." Thawngṭha nih an chimhmi hna bia cu hi bia hi a si.

1 PETER 2:1

Ṭhat lonak vialte kha hlaw cang hna u; ziar ngei ti hlah u, lih chim ti hlah u; hrawkhrol in um ti hlah u, nahchuahnak ngei ti hlah u, zawmhtaihnak bia hmang ti hlah u.

1 PETER 2:2

Ngakchia chuakka bantuk si u law thlarau hnuk kha duh u, cu thlarau hnuk nan din thawngin nan ṭhang lai i khamhnak nan hmuh lai.

1 PETER 2:6

Zeicahtiah Cathiang nih, "A sungmi lung pakhat kha ka thim cang i cu lung cu Zion khua i sakmi inn a hram lung caah ka chiah; Amah a zummi cu zeitikhmanh ah an lung a dong lai lo," a ti.

 1 PETER 2:9

Sihmanhsehlaw nannih cu thimmi miphun, Siangpahrang tlangbawi, miphun thiang, Pathian miphun hrimhrim nan si. Muihnak chungin amah ceunak chungah an kotu hna Pathian nih khuaruahharmi thil a tuahmi thanh awkah nannih cu an thimmi hna nan si.

1 PETER 2:10

Hlanah cun nannih cu Pathian mi nan rak si lo, sihmanhsehlaw atu cu nan si cang; hlanah cun Pathian zaangfahnak kha nan rak hngal lo, sihmanhsehlaw a tu cu zaangfahnak kha nan hmuh cang.

1 PETER 2:11

Ka dawtmi ka hawile hna, hi vawlei cungah khual le ralzam nan si bantukin thlarau he aa do zungzalmi pumsa duhnak kha i teiter hna hlah u, tiah kan nawl hna.

1 PETER 2:12

Nan ziaza kha lawkihmi hmanh nih a ṭha an timi si seh law, atu ah cun miṭhalo tiah an in ti ko hna lai nain, nuncan ṭha in nan nun kha anmah hrimhrim nih an hmuh lai i Pathian cu mi vialte biaceih awk i a rat Ni ah cun an thangṭhat lai.

1 PETER 2:15

Zeicahtiah a duhduh in bia a chimmi mihrut kha, thilṭha nan tuahmi in, chim awk hngal loin tuah hna u, ti kha Pathian duhnak a si.

1 PETER 2:16

A luatmi bantukin um u, sihmanhsehlaw nan luatnak kha ṭhat lonak khuhnak ah hmang hlah u, Pathian sal bantuk tu in nung u.

1 PETER 2:19

Pathian nan thlasak ruangah nan hmuh awk a si lomi temhinnak kha nan hmuh i a in in nan i in ahcun Pathian nih cu nan inmi ruangah cun thluachuahnak an pek hna lai.

1 PETER 2:20

Palhnak nan tuahmi ruangah, nan in awk a simi tuknak nan huah ahcun, cucu thangṭhat awk tlak a si maw? Asinain ahmaanmi thil nan tuahmi ruangah, hremnak nan in ahcun Pathian nih thluachuahnak an pek hna lai.

1 PETER 2:21 

Cu bantuk mi si awkah cun Pathian nih an kawh hna cu a si; zeicahtiah Khrih hrimhrim nih nan caah khan a in cang i ka keneh ka zul hna seh tiah i zohchun awk an chiahpiak cang hna.

1 PETER 2:24

Khrih nih a pum hrimhrim in kan sualnak cu vailam tahnak ah khan a kalpi i cucaah kannih cu sualnak ah khan kan thi cang i dinnak ah kan nung cang. A hma in nan dam cang.

1 PETER 2:25

Tuu a tlaumi bantukin nan tlau cang, sihmanhsehlaw atu cu nan nunnak Khaltu a simi le nan nunnak Cawngtu a simi leiah khan nan kir cang.

1 PETER 3:1

Cu bantuk ṭhiamṭhiam in nu nih nan vale kha an nawl nan ngaih hna awk a si. Cu ti nan tuah ahcun, nan vale lak i Pathian bia a zum lomi hna nih khan, nan ziaza a ṭhami thawng cun Pathian bia cu an zumh lai. Nan caah bia kaa khat chim zong a herh lai lo,

1 PETER 3:2

zeicahtiah zeitluk nun thiang in dah nan nun ti le zeitluk in dah nan upat hna kha anmah nih an hmuh ko lai.

1 PETER 3:3

Lenglei ṭamhnak, nan sam phiarning tehna, nan ṭhi nan hlawn tehna, nan thil nan thuam tehna ah khan nan i dawhnak cu a um awk a si lo,

1 PETER 3:4

nan i dawhnak cu nan chung muru ah a um awk a si i cu nan i dawhnak cu a tar kho lomi nemnak le daihnak lungthin, Pathian mithmuh i a sung bikmi thil a simi kha a si.

1 PETER 3:5

Pathian a rak i bochanmi nu hna cu, cu bantukin an i dawhnak a simi an si — an vale nawl an ngaihnak ah khan an i dawhnak cu a si.

1 PETER 3:7

Nannih patung hna zong nan nupile he nan um tikah, annih cu a der deuhmi an si kha philh hlah u. Cucaah bia nan chimh hna tikah hmaizah tein nan chimh hna lai i Pathian pekmi laksawng nunnak cu annih zong nih an co khawh ve lai. Hi bantuk hin um u law zeihmanh nih nan thlacamnak kha hna a hnawh kho lai lo.

1 PETER 3:8

A donghnak ah ka chim duhmi cu, ruahnak khat le lungthin khat in um u, u le nau bantukin i daw u law pakhat le pakhat i zaangfah u law toidor tein um u.

1 PETER 3:9

Ṭhat lonak kha ṭhat lonak in lehrul hlah u, vawlhpamhnak kha vawlhpamhnak in lehrul fawn hlah u; thluachuah peknak tu in lehrul hna u, zeicahtiah Pathian nih an kawh hna tikah bia an kamhmi hna cu, thluachuahnak kan pek hna lai, ti a si.

1 PETER 3:10

Cathiang nih a ti bangin. "Nuam tein nung ve ning ti a duhmi le caan ṭha hmu ve ning ti a duhmi nih cun, ṭhat lonak bia chim kha aa sum lai i lihchim kha a ngol lai.

1 PETER 3:11

Chiatnak kha a mer tak lai i ṭhatnak kha a tuah lai; daihnak kha a kawl lai i a zulh lai.

1 PETER 3:12

Zeicahtiah Bawipa nih a dingmi cu a mit in a ven hna i an thlacamnak kha a ngaih zungzal; Sihmanhsehlaw ṭhat lonak a tuahmi cu a doh hna."

1 PETER 3:13

Ṭhatnak tuah kha a duhmi nan si ahcun aho nih dah harnak an in pek hna lai?

1 PETER 3:14

Cun a dingmi thil tuah ruangah temhnak nan in ahcun, nan caah lunglawmh awk a va si thiam dah! Minung kha ṭih hna hlah u, hmailei thil ruah ah nan khuaruah zong har fawn hlah u.

1 PETER 3:15

Sihmanhsehlaw nan lungthin chungin Khrih kha upat u law nan Bawi ah ser u. Ruahchannak nan ngeihmi kong kha, kan chim tuah u, an timi hna an um ahcun, zeitik caan paoh i chim kho dingin timhcia tein um zungzal u.

1 PETER 3:16

Cun cu bantukin nan chim tikah nemnak le hmaizahnak in chim u. Nan chiaṭha thleidannak kha thiang tein umter u, cu ti nan um ahcun, Khrih zultu nan si ruang i nan ziaza ṭha a soimi hna nih khan nan ziaza cu an hmuh tikah anmah tu an ning a zak lai.

1 PETER 3:17

Chiatnak tuah ruang i innak hmuh nakin ṭhatnak tuah ruang i innak huah cu a ṭha deuh, cucu Pathian duhnak a si,

1 PETER 3:18

zeicahtiah Khrih hrimhrim zong kha nanmah caah a thi i sualnak ruangah khan voi khat ah za lakin a thi; nannih cu Pathian sin i kalpi awk caah khan, miṭha cu miṭhalo mi hna ruangah a thi. Pum cun thihnak a huat, sihmanhsehlaw thlarau cun a nung i

1 PETER 3:19

thlarau in a nunnak cun thong i thlakmi thlarau hna sinah khan a va kal i phung a chim.

1 PETER 3:20

Cu thlarau hna nih cun, Noah nih tilawng a ser lio i lungsau in Pathian nih a ngan hna lioah khan, Pathian nawl cu an ngai duh lo. Lawng chungah a lutmi mi tlawmte — minung an dihlak ah pariat hna kha — ti chung cun khamh an si i

1 PETER 3:21

cucu atu i nanmah an khamhtu hna tipil innak a rak sawhtu hi a si. Tipil innak cu pum hnawm kholh hi a si lo, chiaṭha thleidannak thiang nih Pathian sin i biakamnak a tuahmi tu hi a si. Tipil innak nih cun Jesuh Khrih thihnak in a thawh ṭhannak thawngin an khamh hna i

1 PETER 3:22

amah cu vancung ah a kai i Pathian orhlei kamah a um i vancungmi vialte le vancung nawl ngeihnak vialte le ṭhawnnak vialte kha a uk dih hna.

1 PETER 4:1

Khrih zong nih khan a pum in a rak in caah nannih zong nih cu bantuk thinlung le lungput cun nan tha nan i ṭhawnter ve awk a si. Cu bantukin temhinnak a ingmi hna cu sualnak chungah khan an i tel ti lo.

1 PETER 4:2

Cucaah atu thawk in, hi vawlei cung i nan nun chung cu, minung duhnak kha si ti loin Pathian duhnak tu kha i ukter cang u.

1 PETER 4:4

Cun atu cu Lawkihmi hna kha, cu bantuk nunning ah cun nan telpi duh ti hna lo caah an khuaruah a har i nannih kha an in serhsat hna.

1 PETER 4:5

Sihmanhsehlaw a nungmi he a thimi he bia a ceihtu ding Pathian hmaiah cun an chuak ve lai i an bia cu an i chim ve te ko lai.

1 PETER 4:6

Cu ruangah cun mithi mi hna sin zong i Thawngṭha chim a si venak cu a si. Annih cu midang cio bantuk khan an pum in an nun lioah khan biaceih cu an si ve ko cang; sihmanhsehlaw annih sin i Thawngṭha chim a sinak cu thlarau in an nunnak ah hin Pathian a nun bantukin an nun khawh ve nakhnga ding caah a si.

1 PETER 4:7

Zeizong vialte donghnak caan hi a nai ko cang. Cucaah cun thla nan cam khawh nakhnga, mah le mah aa uk khomi le ralring tein a ummi nan si lai.

1 PETER 4:8

Zeidang vialte nakin, pakhat le pakhat lungtak tein i daw u, zeicahtiah dawtnak nih cun sualnak tampi kha a khuh khawh.

1 PETER 4:10

Pathian laksawng kengtu ṭha bantukin Pathian sinin nan hmuhmi laksawng kha midang ca ṭhatnak ah hmang cio u.

1 PETER 4:11

Zeizong kip ah Jesuh Khrih thawngin Pathian nih thangṭhatnak a hmuh nakhnga, phung a chimmi nih Pathian bia kha chim u, rian a ṭuanmi nih Pathian pekmi thazang khan ṭuan u, sunparnak le lianhngannak cu zungzal in zungzal tiang amah ta a si. Amen.

1 PETER 4:12

Ka dawtmi ka hawile hna, a fakmi temhinnak nan in caah hin, nan khuaruahhar hlah u, kan cungah a um bal theng lomi thil a tlung tiin ruat hlah u.

1 PETER 4:13

Khrih inmi temhnak kha nan in ve caah a lawmh tu in i lawm u, zeicahtiah a sunparnak cu a langh tikah lunglawmhnak in nan khat lai.

1 PETER 4:14

Khrih zultu nan si ruang i serhsatnak nan in ahcun, nan caah lunglawmh awk a va si dah; cu nih cun sunparnak a ngeimi Thlarau, Pathian Thlarau kha nan cungah a um, ti kha a langhter.

1 PETER 4:16

Khrihfa nan si ruang i temhnak nan in tu ahcun, nan ning zak hlah u; Khrih min kha nan i put caah Pathian tu kha lawm u.

1 PETER 4:17

Biaceihnak thawk caan cu a phan cang i biaceih hmasa bik ding cu Pathian mi hna kha an si lai. Kanmah in thawh a si ahcun, Pathian sinin a rami Thawngṭha a zum lomi hna kha, zeitindik an donghnak a va si te ual lai?

1 PETER 4:19

Cucaah Pathian duhning a si ruang i temhnak a ingmi hna nih cun thil ṭha an tuahmi thawng khan Pathian sinah i pe ko hna seh — Pathian cu anmah a Sertu hna kha a si i a biakam kha a tlolh bal lo.

1 PETER 5:1

Khrihfa upa hna, kei zong Khrihfa upa ka si ve bantukin kan nawl hna. Khrih nih temhnak a inmi tehte pakhat ka si ve i a lang laimi sunparnak zongah kaa tel ve lai.

1 PETER 5:2

Pathian nih an pekmi hna tuurun a khaltu kha si u law Pathian nih zohkhenh hna seh ti an duh hna bantukin lungtho lo si loin lungtho tein zohkhenh hna u. Ṭuan man hmuh ding men ah si loin ṭuan nan duh taktak ruang tu ah nan rian kha ṭuan u.

1 PETER 5:3

Nanmah zohkhenh awkah chiahmi hna kha a uk in uk hna hlah u, sihmanhsehlaw an i zohchun ding tu si i zuam u, tiah kan nawl hna.

1 PETER 5:4

Cucaah Tuukhal Bawi Bik kha a rat tikah a ziam kho lomi sunparnak bawi luchin cu nan hmuh lai.

1 PETER 5:5

Cu bantuk ṭhiamṭhiam in, nannih a no deuh pawl zong nih upa deuh pawl kha an nawl nan zulh hna lai. Nan dihlak in toidornak puan kha i aih u law pakhat le pakhat i bawm u, zeicahtiah Cathiang nih "Pathian nih milungpuam cu a doh hna i mitoidor cu a vel kha a pek hna," a ti.

1 PETER 5:6

Cucaah cun a ṭhawngmi Pathian kut toiah toidor tein khuasa u law amah nih a caan a rem a ti tikah an hlorh te hna lai.

1 PETER 5:7

Amah nih an zohkhenh hna caah nan lungretheihnak vialte kha amah cungah chia dih ko u.

1 PETER 5:8

Fimhring tein um u, ralring tein um u! Nan ral Khuachia cu, seh awk kawl ah, chiandeih bangin a vak cuahmah ko.

1 PETER 5:9

Nan zumhnak ah khan fek tein um u law amah cu rak doh u, zeicahtiah vawleicung khuazakip i a ummi zumhnak lei in nan unau a simi hna kha, cu bantuk temhnak cu an ing ve ti kha nan hngalh.

1 PETER 5:10

Sihmanhsehlaw caan tlawmpal nan in hnuah cun, velngeihnak in a khatmi Pathian, Khrih he nan i pehtlaihnak thawngin zungzal a hmunmi a sunparnak i hrawm dingin aan kotu hna nih cun tlinnak an pek hna lai i fehnak le thazang le a fekmi hram bunhnak an pek hna lai.  

1 PETER 5:11

Lianhngannak cu zungzal in amah ta si ko seh! Amen.

1 PETER 5:13

Babilon i a ummi Khrihfabu nih nan kut an in tlaih hna. Hi Khrihfabu zong cu Pathian thimmi a si ve. Cun ka fapa Marka zong nih biakchawnhnak an kuat ve hna.

1 PETER 5:14

Pakhat le pakhat Khrihfa dawt kuttlaihnak in i biachawn u. Khrih ta a simi nan dihlak sinah daihnak um ko seh.