SUALNAK IN PATHIAN SIN KIRTHAN THLUACHUAH HMUHNING

DEUTERONOMI 30:1

"Cun mah thil vialte, thluachuahnak le chiatnak hna, nan hmaiah ka chiahmi hna hi nan cungah a tlun i, Bawipa nan Pathian nih an dawi hnanak miphun vialte hna lakah cucu nan hun hngalh ṭhan hna i,

DEUTERONOMI 30:2

Bawipa nan Pathian sinah nanmah he nan fale hna he nan kir ṭhan i nihin ah kan pekmi hna vialte chungah nan lung dihlak le nan ruahnak dihlak in a aw nan ngaih tikah,

DEUTERONOMI 30:3

khi tikah Bawipa nan Pathian nih khan nan van kha an pek ṭhan hna lai i nan cungah zaangfahnak a ngei lai i Bawipa nan Pathian nih an ṭheknak hna mi vialte sin khan an pumh ṭhan hna lai.

DEUTERONOMI 30:4

Nan lakin chuahmi hna kha vanhramdeng bik i an um hmanh ah, khika khin Bawipa nan Pathian nih an pumh hna lai i khika khin an ratpi hna lai.

DEUTERONOMI 30:5

Nannih nih nan co nakhnga, Bawipa nan Pathian nih nan pupa hna i an rak comi ram chungah khan an luhpi hna lai i nan pupa hna nakin rum deuh le tam deuh ah an ser hna lai.

DEUTERONOMI 30:6

Bawipa nan Pathian cu nan lung dihlak le nan ruahnak dihlak in nan dawt i nan nun nakhnga, Bawipa nan Pathian nih nanmah lung le nan tefa hna lung cuarpar cu an tan hna lai.

DEUTERONOMI 30:7

Cun Bawipa nan Pathian nih hi chiatnak vialte cu nanmah an hremtu hna nanmah dohtu hna le nan ral hna cungah a tlunter lai.

DEUTERONOMI 30:8

Cun Bawipa aw kha nan ngaih ṭhan lai i nihin ah kan pekmi hna a nawlbia vialte cu nan ulh hna lai.

DEUTERONOMI 30:9

Bawipa nih nan pupa hna kha a rak lawmh hna bangin, nannih rumter awk kha a duh ṭhan lai caah, Bawipa nan Pathian nih nan kut rian vialte le, nan pum theitlai le, nan saṭil karhnak le nan vawlei theitlai ah tam piin an rumter hna lai;

DEUTERONOMI 30:10

hi nawlbia cauk chungah aa ṭialmi a phungbia le a nawlbia hna kha ulh awkah nannih nih Bawipa nan Pathian aw kha nan ngaih i Bawipa nan Pathian lei ah nan lung dihlak le nan ruahnak dihlak in nan i mer paohpaoh ahcun, an rumter hna lai.

DEUTERONOMI 30:11

"Zeitintiah nihin ah kan pekmi hna nawlbia hi nan caah a har tukmi le nan phak leng a si lo.

DEUTERONOMI 30:12

'Kannih nih kan theih i kan tuah khawh nakhnga, ahodah kan caah van ah khin a hung kai lai i kan sinah a run ṭumpi lai,' tiah nan ti awkin van ah khin a um lo.

DEUTERONOMI 30:13

'Kannih nih kan theih i kan tuah khawh nakhnga, ahodah kan caah rili lengah a kal in kan sinah a ratpi lai,' tiah nan ti awkin rili lengah khin a um fawn lo.

DEUTERONOMI 30:14

Sihmanhsehlaw bia cu nan pawngte ah a um ko; nan kaa chung le nan lung chungah a um, cucaah nan tuah khawh ko.