Thawngtha chimtu nih a chimmi Jesuh Khrih hi maw na zumh peng ko. Nangmah nih na ton ve cang mi Jesuh Khrih dah na zumh ve cang. Mi nih chimmi Jesuh lawng na zumh rih ko ahcun unau a poi tuk cang lai hih. Na zumhnak nih cun Khrih he an tonter in an hmuhter hnga lo maw? Zumhnak kan ngeihmi nih hin JESUH KHRIH he kan i ton tiang le Thiang Thlarau in bia kan i ruah tiang pei a kan phanhpi tiah! Nangmah nih hmuhmi le tonmi le ngeihmi te Jesuh Khrih bia ve law zumh ve cang dingin kan sawm! Bawipa nih thluachuah in pe seh!
JOHAN 3:36
Fapa a zummi paoh cu zungzal nunnak an ngei, Fapa nawl a ngai lomi paoh cu nunnak an ngei bal lai lo i Pathian thinhunnak cu an cungah a um zungzal ko lai.
FAPA JESUH KHRIH a zummi poah cu zungzal nunnak kan ngei. Amen! Siahcun nihin FAPA zummi poah hi teh kan nung tak hnga maw???? Nung naisai hlah! Fapa nawl kan ngai lo hme cu! Zei tinhme Fapa nawl cu kan ngaih khawh lai i THIANG THLARAU pei kan chungah a um lo cu! JESUH KHRIH na zumhnak nih hin Amah nawlngainak le Amah caah nun duhnak a ngeih chih hnga lo maw? Cucaah pei Paul nih kei cu Khrih he vailam ah thahchih ka si cang i ka chungah a nungmi cu JESUH KHRIH tu asi ati kha. Amen! Atu i ka nunmi nunning hi cu ka caah a thi i ka chungah a ummi JESUH KHRIH zumnak thawngin ka nung a ti! Amen! (Galati 2:19-20)
Fapa nawl a ngai lomi cu nunnak an ngeilo tiah fiang tein BAIBAL nih a ti ko hi mu! Al awk thalo in minung nih hin zeitinhme Fapa duhnak le a nawl cu kan zulh in kan tuah khawh hnga? THIANG THLARAU a ngeimi lawnglawng nih a tuah khawh. Amen! Mah caah hin pei Amah bak cu ka caah cun thah asi i Thawnnak he cu nunter asi tiah! Kan zumhnak nih Thiang Thlarau a kan pek loah cun a thimi kan si ko i nunnak cu kanmah ta asi hrim lo. Fapa nawl kan ngai i kan zulh, kan tuah khawhnak lam cu a duhnak vialte a hngal dihtu Thiang Thlarau kan ngeih lawngah kan tuah khawh i a nawl ngaimi kan si kho. Amen!
Pathian fa na si ve nak ding ahcun JESUH KHRIH a nawl na ngai a hau i JESUH KHRIH a nawl na ngaih khawhnak ding ahcun THIANG THLARAU in an umpi a herh ve. Amen! Khamhnak tling cikcek in a ngah cangmi hna kan nunnak i raltha tein Pathian fa kan si cang kan ti khawhnak cu mi nih chimmi Jesuh zum ti loin kan chungah a ummi JESUH KHRIH kan zumh cang caah asi. Halleluijah. Amen! Bawipa nih THIANG THLARAU in pe ve ko seh. THIANG THLARAU na ngeihlo ahcun na tlu zungzal ko lai i na nunhlun ah na kir lengmang ko lai. Na nunhlun na kir i na rak tuahmi thilttha lo na tuah peng ko ahcun Khamhnak cu nangmah ta asi rih hrim lo ti kha fiang tein i hngal ve ko.
Pathian fale taktak cu sualnak kan tuah peng lo, aruang cu Pathian thlaici kha kan chungah a um cang caah asi. Amen! JESUH KHRIH zumh le Khamhnak kan ngeih a langhnak cu nunhlun kaltak i Nunthar asimi Jesuh Khrih chungah kan nun zungzal mi hi asi. Amen!
Pathian fa kan si cangnak langhtertu cu mi nih chimmi Jesuh zum ti loin kan chungah a ummi JESUH KHRIH kan zumh cang le kan chungah a nung kan hngalh cang caah hin asi. Halleluijah. Amen! Bawipa nih sunparnak vialte co zungzal ko seh. Amen!
Comments
Post a Comment