ZUNGZAL NUNNAK PETU TAKTAK!

      A donghnak lanhtak puai hman ah sunparnak he Jesuh cu Jerusalem ah laa cit in a lut tikah mipi nih thangthatnak le upatnak nganpi an pek. Cu tikah mipi cu a cawnpiak mi hna cu facang ci pakhat cu vawlei ah tuh a si i a thih ta lo ahcun pakhat lawng a si peng ko. A thih ta lawngah facang mu dang tampi a chuahter khawh tiah a chimh hna. Asullam cu ka thih ta lo ahcun pakhat lawng ka si i ka thih ahcun mikip thinlung kip ah Thiang Thlarau in hmunhma ka la lai i unau tampi ah kan i chuah lai ti hi asi. Amen! (JOHAN 12:24)

       A van peh rihmi cu vawlei uktu satan hi biaceih asi cang i a uknak zong tei asi cang tiah ati. Amen! Cu teinak taktak a ngeimi cu a hlan ah pakhat asimi kha thihnak in a thawh tikah mikip thinlungah Thiang Thlarau in aumpi mi hna le AMAH azummi hna hi kan si. Halleluijah. Amen! Mi vialte caah thihnak in thawhter ka si tikah mi vialte cu ka sinah hnudih an si lai tiah ati. Amen! Chim duhmi taktak cu mi vialte caah a thi i a tho taktak cang, zungzal NUNNAK zong mi vialte pek dih taktak kan si cang nain a zummi le a cohlangmi lawnglawng AMAH he zungzal NUNNAK kan ngei. Amen! Sihmanhsehlaw mah tluk kan caah thihnak in thawhthannak Thawngtha a kan phurh ko nain a cohlang duhlomi le a zum duhlomi cu Jesuh Khrih bia lila nih bia a ceih te ko hna lai. (JOHAN 12:31-32)

       Jesuh nih mi vialte nih vawilei khamhtu ah Pathian thlahmi ka si hi hngal hna seh ti theihter tthannak ah nan sin i ka chimmi vialte hi keimah nawl in le duhning men in ka chimmi asi hrimhrim lo, a ka Thlahtu Pathian nih na chim lai tiah a kan fialmi tu hi ka chimmi asi tiah a ti hna. Amen! (JOHAN 12:49) Asiah ahcun zei cu dah Pathian nih mi vialte sinah na chim lai tiah a fialmi bia taktak cu asi ne: A fialmi taktak cu AMAH hrimhrim kha ka sual ruangah le damlonak vialte caah thihter asi lai i kan sualnak le damlonak vialte in luatter kan si lainak le AMAH he zungzal Nunnak ah thawhter kan si lainak hi a chimter duhmi cu asi. Halleluijah. Amen! Jesuh Khrih nih a chim lengmang bantukin Keimah a ka zummi poah cu an thi lai lo i zungzal nunnak tu an ngei cang tiah a ti lengmang nak asi. Amen! Cucaah Jesuh Khrih nih Keimah hi Lam le Biaktak le Nunnak cu ka si, Keimah sinin dah ti lo ahcun Pa sin phanhnak Lam a um loh a tinak kha asi. Amen!

JOHAN 12:50

Na chim lai tiah a ka fialmi bia cu zungzal nunnak petu a si ti kha ka hngalh. Cucaah ka chimmi bia cu ka Pa nih na chim lai tiah a ka timi bia kha a si," tiah a ti.

PATHIAN NIH VAWLEI CUNG MINUNG VIALTE SINAH FAPA NIH CHIM SEH TI A DUHMI CU AMAH THIHNAK LE THAWHTHANNAK HI ZUNGZAL NUNNAK PETU TAKTAK CU ASI TI HI ASI: HALLELUIJAH. AMEN! A THIHNAK AH KA THI VE, A THAWHTHANNAK AH THAWHPI KA SI VE KO TIAH A ZUMMI POAH CU ZUNGZAL NUNNAK KAN NGEI CANG. AMEN! BAWIPA NIH ABIA THLUACHUAH PEK CANGMI HI NAN NUNNAK AH TLINTER CHIN KO SEH! AMEN!