PATHIAN caah vawlei fimnak hi hruh asi ahcun zei hi dah PATHIAN nih fimnak le hngalhthiamnak taktak a timi cu asi ne hnga! Taksa fimnak nih hih vawlei kan nunnak caah tthathnemnak tampi a chuahpi ve ko nain Pathian nih thluachuah a pek ve lo ahcun cu fimnak le thiamnak in tuahmi vialte cu pakpalawng taktak an rak si. Chikhat tlamtlinnak a ngeih hmanh ah a hmun ding cu asi hrim lo i tleihchan tuk ding thil zeihmanh vawlei ahhin PATHIAN tello in cun an um hrim lo...... Cu ti ka ti tikah vawlei fimnak kan daithlanh lai tinak si loin zeizong vialte cungah Pathian zumhnak le bochannak, ttihnak he vawlei ah hin kan cawlcangh awk le kan nun awk tu asi ti hi ka chim duhmi asi. Amen! Kan fimnak le thiamnak hna hi Pathian aw zulh in kan hman hna ahcun zeitlukin dah Khrihfa Nunzia le thluachuah hna hi a tam hnga? ti hi kan ruah caan a cu cang. Pathian aw zulh kan thiam ah hin tlamtlinnak le thluachuah nih a kan hngah zungzal ko. Amen!
Nihin zumtu tampi nih Khrih pum asimi Khrihfabu chung riantuannak le cawlcanghnak ah hin PATHIAN nih fimnak tiah a auhmi Thlarau fimnak in hruai loin taksa in cawnmi fimnak in kan hruai tikah a leng zoh ahcun ai dawhmi le a tluang ngaimi a lo tawn ko lai nain kan chung lei taktak van purh ahcun JESUH KHRIH cii ruang in achuakmi KHRIH Muisam kan keng bak ti lo. Khrihfabu tampi hi minung nih Khrihfabu tiah kan i au sawhsawh kho men i Pathian nih Khrih i a fale bu tiah auh lo khawh kan rak si ziar... Khrih+Fa+Bu taktak kan si khawhnak dingah A Lu a simi JESUH KHRIH lawng hi kan lu le kan Bawip si zungzal ko cang seh. Amen! Kan i awtnak cu Pathian muikeng in ser kan si, Jesuh Khrih thawngin nunnak kan hmu i Pathian caah kan nun zong hi kan philh awk a si loh. Chim duhmi cu kan tuahmi vialte hna hi Pathian sunparnak caah an si dih ding tu khi an si nain.... Kanmah sunparnak caa tuah an si tawn??????
Jesuh Khrih cu ka Khamhtu le ka Bawipa ah ka cohlan i ka zumh ko timi lawng itlaih i na rak zumhka le nihinni tiang zong dirhmun i lawh peng cu maw, Jesuh Khrih i a fale kan si hnawhchan le kan caah a thi hnawhchan cu asi hnga?? Jesuh Khrih nih tthang ve ulaw thei tampi tlai ve ulaw ka tehte va si uh ti hi a kan cahmi le fial zungzal mi cu asi. A tu kan dirhmun ningin Jesuh Khrih caah cun a tehte cu kan si kho ve taktak hnga maw? ti hi asi: Jesuh Khrih tehte sinak ah kanmah tlinnak le tthatnak ruangah asi ka tinak asi lo nain Amah tlinnak hrawmh in a tehte tha si hi fial kan si. Sihmanhsehlaw Jesuh Khrih mah tlukin a tling ko mi kan ngeih ko ahcun zeitindah kanmah ning tein cun kan si peng le kan tthan bal ve ne lo ti hi na ruat bal ve maw? Zumhnak he vawlei kan nun chungah Pathian fale kan sinak nih hin mi vialte caah tehte kan sinak langhter ve awk asi i midang a lawmhter hna lo hmanh ah kanmah pumpak le innchungkhar ca tal ah hin cun thei kan ngeih awk le lawmhnak tlingtal hi cu kan ngeih awk asi cang nain....
Ka chimmi vialte a tlamtling khawhnak dingah cun Thiang Thlarau Fimnak le Hngalhthiamnak kan ngeih a herh. Thiang Thlarau Fimnak le hngalhthiamnak cu teh zeitindah kan ngeih khawh ne lai i khawika ah dah kan va lak ne lai? Pathian nih fimnak atimi cu: AMAH ttih hi asi i Hngalhthiamnak ngeih a timi zong hi: Tthatlonak hrial hi asi! Amen. Vawlei fimnak cawn bantukin Thlarau fimnak cu cawn awk a tthami asi lo caah zumhnak lawnglawng in cawn khawhmi arak si ai!!!! Cu zumhnak zong cu Jesuh Khrih kan zumhnak thawng lawnglawng in a phi a chuakmi asi i Jesuh Khrih zumhnak nih a van hrinmi cu Thiang Thlarau asi i cu Thiang Thlarau thawng lila cun Pathian ttihnak le Tthatlonak hrial khawhnak taktak cu kan ngei. Amen! JESUH KHRIH lawnglawng hi kan FIMNAK le HNGALHTHIAMNAK kan ngeihnak hrampi cu an si. Amen! Fimnak ngeih le hngalhthiamnak ngeih na duh ahcun JESUH KHRIH hi na thinlung dihlak in zum law Thiang Thlarau na co lai i cu Thiang Thlarau bawmhnak thawng cun PATHIAN kha ttihzahnak na pek lai i Thatlonak kha na hrial khawh lai, cu tikah Pathian nih a fimnak a ngeimi fapa, hngalhthiamnak a ngeihmi fapa tiah auh na si lai. Amen! Pathiam hmai hmanh ah fimnak ngei le hngalhthiamnak ngei ah rel na si ahcun vawlei cung caah cun zei dah chim a hau ti????? Bawipa nih sunparnak co ko seh. Amen!
JOB 28:20
"A si ahcun, fimnak cu khuazei in dah a rat kun? Hngalhthiamnak a hram cu khuazei ah dah a si kun?
JOB 28:28
Cun minung cu a thawh i, 'Zohhmanh, Pathian ṭih hi fimnak cu a si, ṭhat lonak hrial hi hngalhthiamnak cu a si,' tiah a ti," a ti.
Comments
Post a Comment