Dawtmi unau vialte hna kanmah le cang cun vanram a kai ding lawng te ah ai ruatmi kan si cio. Abiapi mi cu kanmah tein kan kai lai ti i zumh hnak hin Pathian nih Fapa zumhnak Thawngin kan thinlung chungah Thiang Thlarau in na kai lai ti hi a biapi deuh ko hnga lo maw? Kanmah le kanmah i lunghmuih ngai ttung i hell kal khawh asi aw..... Zumtu taktak le hrinthannak a hmu cang i Thiang Thlarau in a chungah a um hnawh cang mi hna nunnak ahcun kan duhbikmi hi a kan Khamhtu Pa duhnak tuah le a kan fialmi rian lim hi asi ko. Amen! Cubantuk zumtu hna caah cun ralchiatnak a tlau duahmah, mirawi hmangnak kha kan zamtak, fih awk lungthin kha a rem in kan rem ti loh, lai nawng duhnak kha dawt duhnak in a kan thlen, nu le pa sualnak hi Pathian nawlbia ning in kan hman cang (Nuva cung lawngah hman ding), lih kan chimnak le mi kong ceih kan hmanmi kha Khrih biatak chimnak ceihnak ah kan hman cang, zudin, kuakzuk, khaini tbk; cu kan caah hnawmmen le pakpalawng hlennak men an si kha kan hngalh cang. Amen! Mah vialte hi kan tlinh cang tinak si loin Khrih Min zumhnak le tthawnnak he kan tei cuahmah. Amen! Kan ttih bikmi cu kan chung i a ummi Thiang Thlarau ngeihchiatter lai hi asi i kan chung i a nungmi Thiang Thlarau hruai ningin kan cawlcang i kan nung. Amen! Kan chung i ummi Thiang Thlarau ai lawmhlo kan hngalh tikah a ran khawh chungin kan palhnak le sualnak kan ngeihmi kha kan kawl i damtertu sinah kan sining tein kan hei phuan. Amen! Damtertu Pa ve zong nih cun biatak attanhmi asi caah kan sining tein thuhlo le lihlo tein kan phuan mi nih a lawmhter i a damh kha ai awlhtuk i a kan ngaihthiam cawlh. Halleluijah. Amen! Cu nih cun kan nun a kan cawm i kan tlaunak i kaltthan lengmang kha a kan huatter. Amen!
Nangteh a tang i Baibal chungah hin na lawmh peng ve rih ko ahcun nang caah cun Hell asi ko. Bawipa nih na nun a dih umek in inthleng ve ko seh. Amen! Chimduhmi taktak cu Khrih he naa peh taktak ahcun na nunhlun a tlau i nunthar in na nung cang timi hi asi ko. Jesuh Khrih he ka thitti na ti hnu zong i nangmah ning peng na si ko ahcun Thlarau in hrinthan loin ruahnak tuin na hrinthan a rak si ai! Khrih na zumhnak thawngin Thlarau in hrin na si hnu zongah Pathian he nan i pehtlaihnak ah hna an hnawhtu le an donkhantu cu a um zungzal ko lai nain cucu na zumhmi Pa Jesuh Min tthawnnak in tei ve awk ah le Amin tthawnnak hman thiamnak ah an chiahpiak ve mi asi. Amen! Phundang in ka chim ahcun na zumhnak tahfung hneksaknak an si ko. Cucaah pei Peter nih na cungah hneksaknak a tlun tikah mi vantha ah vaa rel, sui hmanh pei hneksak a hauh cu! Hitluk asungmi le a liannganmi Khamhnak chinchin cu hneksak loin cun maw kan um lai a tinak kha asi cu. Amen! Bawipa nih sunparnak co zungzal ko seh! Hneksaknak na cung i a tlun cu na zumh lo caah si loin na taak maw? ti testnak asi ko. Na sungh lengmang belte ahcun????
Jesuh Khrih hi Kan zumh taktak le Khamhnak kan hmuh taktak ah cun pumsa duhnak vialte cu kan tei khawh ko hna. Amen! Teinak kan hmuhnak cu kanmah tthawnnak le zuamnak cungah si loin kan zumhmi Pa tthawnnak kan hmannak tuin a rak si. Amen! Zei bantuk dirhmun kan si hmanh ah kan lung a dong thai ballo i tthatnak in thluachuah kan hmuh ah siseh chiatnak in turforhnak chung kan tlak ah siseh Amah lamkaltu le Thiang Thlarau in nutling, patling kan sinak tuah an cang ko. Amen! Na lung a dongh belte ahcun ruah awk a um hnga? Paul nih cun kan lung a dong bal lo i a tu zongah nan kan hmuh peng ko hi ta a tinak asi. Amen! Nangteh na zumhnak cungah na hmun peng ve maw????
Pathian fale taktak cu zeitik hmanh ah sual kan tuah peng lo i kan tuahmi tthatlonak cungah kan ilawm peng lo i lawmhnak tling taktak pe khotu asimi Jesuh Khrih sin kir cu kan caah ti le rawl tthawbik asi zungzal. Amen! Kan kir khawhnak zong cu kanmah tthawnnak si loin kan chung i a nungmi Thiang Thlarau tthawnnak le hruainak thawngin asi. Amen! Nang hrinthan cangmi ka si tiah ai lawm ngaimi, bia kan hal ve tuah lai: Na Hrintthan hnu ah nangmah duh hin maw nung dingah le na tuah tthingmi tuah peng dingah Khamh na si?? Naisai hlah! A thar in pei ser na si tiah, Jesuh Khrih thawngin an nunter i Pathian caah nung dingin Khamh na si kha na philh maw? Paul nih ka hrintthan hlan ahcun nawlbia zulhnak thawngin keimah tuahmi, tlinnak timi porhlawtnak ka rak ngei, Sihmanhsehlaw Khrih he kan i ton hnu ahcun keimah timi porhlawtnak vanpangpi kha a ka boahpiak dih i keimah tlinnak le tuahmi timi ah dirti loin Amah tlinnak le tuahmi tu keng in kaa porhlatpi cang tiah ati. Amen! Kannih zumtu taktak cu porhlawt awk kan ngeihmi le vawlei teinak ah kan i ken zungzal mi le kan hmanmi hriamnam a tthabikmi cu Jesuh Khrih Khamhnak le tthawngtha biatak hi a si zungzal ko. Amen!
Na taksa duhnak le sualnak nih an uk peng rih i na tuah peng ko rih ahcun Khamhnak taktak na hmuh rih lo tinak asi ko. Sihmanhsehlaw Thlarau duhnak in na nun ahcun Khrih na chungah a um i zungzal nunnak cu nangmah ta asi cang tinak asi ve. Amen! Paul nih ka tuah duhlomi tu ka tuah i ka tuah duhmi tu ka tuah kho loh tiin na nun rak i hlen hlah! A tuah khawh fawm lo caah cun dawh bawmtu ah Jesuh Khrih ai thim ve i Jesuh nih a chuah ko khah! Amen! Nang zong na tuah kho ve lo i kei zong ka tuah kho ve lo caah Jesuh Khrih rak i thim ve law Paul zong a thih tiang Khrih caah zumhtlak a si bangin nang le kei zong kan si ve ko lai. Amen! Paul bantukin na thih tiang zumhtlak na si lo ahcun Hell ah na tla ko lai. Aruang cu Khrih a ngeimi taktak cu anmah tthawnnak in an nung lo caah asi i a Khamhtu hna zong cu Khrih asi caah a kaltak bal hna lo i zumhtlak i an nun ve dingah a khamh hna caah thih tiang zumhtlak nunnnak le nun khawhnak kha a hrawmh hna i a cawnpiak ko hna. Halleluijah. Amen! Bawipa a Khamhtu cu thangthat si zungzal ko seh. Amen!
A tang Baibal chungah nai tel sual ahcun Hell ah na tla bak ko lai. Awl tukin Jesuh Khrih ka zumh le vanram ah ka kai lai, rak ti lengmang ti hlah! Nupi le va ngei law na nupi maw na va pa maw mi dang he it lengmang hna sehlaw na duh naisai bal lai lo cuh. Nangmah hmanh nih na duhlo ahcun Pathian chinchin nih cun afih tuk. Cucu zeitindah minung nih cun tthatnak le Pathian duhnak cu kan tuah peng khawh lai ka ti hlah, nangmah nih na tuah khawh fawm lo caah cun dawh nangmah sualnak vialte thenhpiak dingah le tuahpiak ding ahcun a fapa thisen cun an thlen i an ngeih thiam fawm cuh. A thawhtthannak tthawnnak cun dawh an thawhpi i an khamhnak thawng cun na tei khawh lomi le Pathian duhnak na tuah khawhnak ding ahcun Thiang Thlarau cu bawmtu ah pek na si fawm cuh! Amen!
BIATHLAM 21:8
Sihmanhsehlaw miralchia le mirawi hmang le fih awk lungthin a ngeimi le lainawngmi le horduhcuaimi le camh hmangmi le siasal biami le lihchimmi vialte hna an umnak ding cu, mei le kat in a alhmi tili, thih voi hnihnak kha a si," a ti.
1 KORIN 6:9
Miṭha lomi nih cun Pathian Pennak cu an co lai lo ti kha fiang tein nan hngalh ko. Nanmah le nanmah kha i hleng len hlah u; misual mi le siasal a biami le vacung pa duhmi le nu nih nu he sualnak, pa nih pa he sualnak a tuahmi le,
1 KORIN 6:10
mi thil a chutmi le hak a kaumi le zu a rimi le mi congoih a hmangmi le mifir a simi hna nih cun Pathian Pennak cu an co lai lo.
Ahlan ahcun a cung i Baibal hi kan rak tuah cio ko sihmanhsehlaw Jesuh Khrih kan zumhnak thawngin Mithar ah ser kan si i Pathian ta kan si cang caah kan nun ti hrim awk asi loh. Khrih zumhnak Thawnnak thawngin Nunhlun a tlau cang i nun thar ah kan nung cang. Amen! Jesuh Khrih ka chungah a nung i Khrih chungah ka nun caah a dongh tiang ka hmun lai. Amen!
1 KORIN 6:11
A cheu cu cu bantuk cu nan rak si. Asinain sualnak in thianh nan si cang; Pathian sinah pekchanh nan si cang; Bawipa Jesuh Khrih min le kan Pathian Thlarau thawngin Pathian he remter nan si cang.
Comments
Post a Comment