Bawipa Ni a phanh lai ahcun Ttih a nungmi harnak a phunphun a phak lai i Ni a ceu ti lai lo, thlapa zong a vang ti lai loh, khi tikah mi vialte cu ttihnak le thinphannak in an khat lai, mah caan hmanh ah Jesuh min aumi le bawmh halmi cu khamhnak kan pek rih hna lai ti hi Bawipa biakam asi. Amen! Kan Pathian dawtnak hi zeitluk in dah a ngan, lungthin takin bawmh halnak he a aumi hna khamh cu ai fawih tuk. Amen! Lungthin takin kan auh lo ruang tu ah hin a kan bawm kho lo i asi. Nihin ah sawm kan duhmi cu Bawipa rat lai ni hngah hau loin pei pumpak na nunnak ah na thinlung cu a muih i ttihnak le thinphannak vialte nih an khuh ko kha, mah vialte chanchuahtu ah Jesuh Khrih hi na thinlung dihlak he bawmh rak hal law, an leh dingmi cu hi hi asi: Ka min auh in bawmh a halmi hna Khamhnak an hmuh khawhnak ding caah pei vawlei ah ka rat cu ti hi asi lai i a tu te lawng na rak kir hi a tlai hmanh na tlai tiah lung lawm tein na thinlung a muihnak vialte chungin an chuah lai i zungzal nunnak ruahchannak le lawmhnak tling in an thuamh lai. Amen! Pathian nih khamh a kan duhbikmi lak ah pakhatnak cu a kan hlengtu pa satan sin in khamh i zungzal Nunnak pek hi asi. Amen! Zungzal Nunnak cu a rawk kho ti lomi asi caah lawmhnak le ruahchannak nan ngeihmi vanram hi zohchih in i lawm ko uh a ti lengmang nak asi. Amen!
A tu i vawlei harnak vialte zong hin an chuah ve ko lai nain na nun chung poah cu vawlei nih harnak an pek peng ko rih lai, bawmh na hal lai i an chuah lai nain a dang harnak nih an phanh tthiamtthiam rih lai. Sihmanhsehlaw zei zong vialte hlanh ah Khamhnak, zungzal Nunnak na co ahcun nihin i na tonmi harnak vialte hi nangmah lawng si loin mi vialte nih tonmi asi i mah harnak in luattertu Jesuh na ngeihmi tthawnnak nih hnangamnak an pek lai i vawlei hi na caah thinlung in ttihnak le sunghnak si ti loin lung tthawnnak le teinak tu he kar na hlang cang lai. Amen! Cucu Thiang Thlarau nih umpi mi kan tthawnnak asi i kanmah tthawnnak si loin Dawtnak Pathian kan chungah a ummi cu a lung a dongh ballo bantukin kan thinlung chungah Amah a lung dongh ballonak tthawnnak a kan pek i kan sining cungah zoh in si loin kan i ruahchanmi Pathian tthawnnak le zungzal Nunnak tu nih inkhawhnak a kan pek. Amen! A taktak le ngaingai ahcun kan chungah pei a lung a dong ballomi Pathian a um cang cu. Amen! Harsatnak, sunghnak, ttihphannak le sualnak vialte na cungah a tlunmi hi zei ruangah si loin Bawipa nih a tthawnnak langhter in luatter le zungzal nunnak pek an duh caah asi. Amen! Cucaah cun mah vialte chungin luattertu le khamh khotu min dang kan ngei loh, Jesuh Min lawng hi Khamh khotu le luatter kohtu Min asi i Amin au in bawmhnak rak hal ve law luatnak le Khamhnak cu na chungah a tlinter ve lai. Amen! Kan Pathian a min thangthat si ko seh...
JOEL 2:31
A lian a ngan i ṭih a nungmi ni, Bawipa ni cu a phak hlanah, Ni cu a mui lai i thlapa cu thisen bantuk in a sen lai.
JOEL 2:32
Sihmanhsehlaw Bawipa kha bawmhnak a halmi paoh nih khamhnak an hmuh lai. Bawipa nih a chim bangin, Zion Tlang cungah le Jerusalem khuachung ka khatkhat ah, a luatmi hna cu an um lai. Bawipa nih a thimmi hna cu an nung lai."
Comments
Post a Comment