Minung tampi nih hin awl tein Pathian riantuan ka duh kan ti cio ko lai nain temhinnak nih a kan den tikah cun kan kaa in kan chim lo hmanh ah kan thinlung te cun ingpuannak le Pathian sinah zainak kan ngei cio i kan lung a dong deng lengmang. Minung tampi nih kan theih khawhmi le kan duhbikmi cu Khamhnak, Khrih Vel hi asi. Mah hi cu nangmah tuah haumi le retheih naa pek haumi pakhat hmanh a um lo i lung lawm tein cohlannak in hmuh khawhmi le tingco khawhmi asi. Amen! Cucaah Khrih Vel kong Thawngtha chimtu nih an van chim ahcun mi zei poah hi kan i tlum dih ko nain Khrih caah temhinnak le zumh awktlak nun kong chim ahcun a ei kholomi kan tampi ko rih tihi hmuh chin lengmangmi asi. Khamhnak hi a tingcomi caah cun a lak tein pek kan si nain a ingtu Jesuh Khrih ca bel ah zeitlukin dah a hei fah in a har hnga? Pathian pei asi cu a fak lai lo ti zongah ruah a fawi nain minung sinak 100% aa hrawm bakmi asi i a rawl ttam in a thabatnak hna hi Baibal ah hmuh khawh asi. Cu nih a sawh duhmi cu fahnak a ing hrimhrim ko ti kha a langhter.
Riantuan kong he pehtlaiin taksa rian na ttuan tikah na tha a bat a hau i na re a theih deuhni a um bantukin na zang a dam deuh ni zong cu a um ve tthiamtthiam. Sihmanhsehlaw riantuan poahpoah cu a awlmi a um ballo i na thazang bat hlei ah na thluak tiang a bat caan a um a herh! Pathian riantuan tu si hi a fawi ve hrimhrim lo! Baibal nih a kan cawnpiakmi cu zeizong vialte hi Pathian lamkaltu an si a ti bangin nihin taksa rian kan tuanmi hna zong hi Pathian lamkaltu cu an si taktak ve. Mah vialte zong hi Khrih dawtnak thuk deuh in kan hngalh khawhnak ding caah an rak si ko. Taksa rian kan ttuan bantuk te hin Thlarau lei Thawngtha chim rian fial kan si ve tikah a zumh lei lawng si ti loin Khrih ca i temhinnak hmuh ve ding zong hi fial chih kan si. Amen! Pathian riantuan naa thawh tikah thluachuah pakhat ruahchannak le laksawng hmuh te lai ding he lawng cun sau kan kal kho hnga lo, sihmanhsehlaw temhinnak hmuh ding tu he naa thawh chih ahcun na hlawh a tling ziahmah ko hnga i naa ruahchanmi thluachuahnak hna le laksawng hna zong nih cun an van in zulh te hnga. Amen! Pathian rian kan tuan cionak ah hin zumh awktlak tein nung hna usih law kan duhbikmi hi a kan thlahtu Jesuh Khrih duhnak tuah le fialmi Thawngtha biatak chim rian lim hi si cio ko seh. Amen! Bawipa nih sunparnak co ko seh...
FILIPI 1:29
Khrih ca rianṭuan thiah nan si tikah, a zumh lei lawng hi si loin a ca i temhinnak hmuh ding zong hi a si chih.
Comments
Post a Comment