THIANG THLARAU A DAWNMI CHUNGAH NAA TEL VE MAW?

Zumtu tampi nih hin Thiang Thlarau dawnh le ngeihchiatter hi a ho hmanh nih kan duh balmi asi lo nain kanmah nih kan i hngalh lomi kan tuahmi cung in kan ngeihchiatter in kan dawn tawm ve ko lo maw timi hi ka hmuhmi asi. Cucu zeidah asi ti ahcun Phungchim kha zei rel loin um hlah uh timi bia hin asi. Thawngtha chim ngeih na duh maw? Na rem maw? Na dawn maw? ti hi i hal ahcun a hohmanh nih pumhnak le thawngtha chimnak ngeih cu dawn le duhlo in kan um ngam hrimhrim lai lo. Sihmanhsehlaw Thawngtha chimtu hi minung an si ti hi kan van i fianchih a hau ve. Cucaah thawngtha chimtu minung asi caah Amah zoh in bia kan khiah tikah a chimmi Thawngtha ngeih kan huam ti lo i zei te ah kan rel ti lo tikah Phungchim zel rellomi ah kan van i cang ko lo maw? Phungchim zei rello ah kan i cang ahcun Thiang Thlarau dawntu ah kan i cang chih ti hi hngalhter kan duh vemi hna cu asi. Cubantuk tthiam in Thiang Thlarau kha don hlah uh a timi ah hin kan i tel ve sual maw ti hi ruah lo awk a tha lo mi asi. Asullam cu Thawngtha chim awnh asimi cu Hrintthannak a ngeimi kan si i Hrintthannak a comi cu Thiang Thlarau nih hruaimi kan si tinak asi, Thiang Thlarau nih hruaimi lawnglawng hi Pathian thawngtha a chim khomi cu kan si. Cucaah Thawngtha chim zei rel loin na umnak in Thiang Thlarau dawntu na si ko lo maw ti hi ka van in hngalhter du tthanhmi asi. 

                Minung tampi nih nan kan hal dingmi cu nihin Thawngtha chimtu an nun hi zoh ko law zei tindah an bia cu kan lak khawh in an thawngtha cu hmunhma kan pek khawh in kan cohlan khawh lai? Cun zei tindah Thiang Thlarau dawnlotu ah kan i tel khawh ne lai? tiah nan ka hal lai. Kan leh khawh dingmi hna Pathian duhnak Bia cu hi hi asi. Nan Khrihfabu chungah a ummi siseh hmundang in arami Thawngtha chimtu siseh rak dawn loin Thawngtha rak chimter ve law rak ngai ko. A chim hnu tu ahcun Pathian duh ning le tinh ning a chim maw? Chimlo? timi kha nangmah tein Pathian Bia na relmi he hneksak law Pathian biatak he aa ralkahmi vialte kha hlawnh ko. Pathian duh ning in a chimmi asi ahcun na nun ah i lak law Thlarau na tthannak ah hmang ko hna. Thiltthalo hrial fial kan si mi zong hi zeidang zeidang si loin Pathian duhning Thawngtha lengah taksa ca zalawng tukin chimmi bia hna hi an si i na nun an hrawktu phungchimnak poah cu hrial ko hna law nan nun an tthanter tu le an remhtu Thawngtha tu hi ei khawh le ngeih peng rak i zuam ko tiah sawm kan duh. Amen! 

            Thawngtha biatak a phuangtu nih an kenmi cu minung duhnak men sawhsawh in an chim lo i A Thlahtu hna Jesuh Khrih (Thiang Thlarau) hruaining in an chim caah nun rawhnak lei kalpi tu si loin nun remhnak le Thlarau na tthannak ah bawmtu le kalpitu an si zungzal lai i na diremhnak cu taksa bia ah si loin an chimmi Pathian biatak Thlarau Bia tu nih na Thlarau di a riamter lai. Amen! Cuccah sawm kan duhmi hna cu mi zei an si hmanh ah Thawngtha an chimmi zei rel loin um hlah, ngeih piak hna law Pathian nih an pekmi Thiang Thlarau tthawnnak tuin an chimmi cungah a ttha le tthalo kha hneksak ko hna. Pathian duh ning si loin Thawngtha a chimmi poah cu hrial ko hna. Na hrial khawhnak hna dingah cun an Thawngtha chimmi ngeih ta a hau ve..

                  Ataktak le ngaingai cu hihi asi: Thawngtha chimnak nawl a ngeitu hi Thiang Thlarau a ngeimi lawnglawng kan si timi hi asi. Thawngtha chimtu vialte nih hin Thiang Thlarau hruai ning taktak in chim zungzal rak siseh law vawlei hi Pathian biatak in a rum cang hnga i lawmhnak in a khat cang ko hnga. Jesuh nih a rak phurhmi le a kenmi Thawngtha cu keimah nih kan dawt hna bantukin pakhat le pakhat i daw uh ti hi asi. Amen! Jesuh nih a kan dawt ning cu keimah caah thihnak a in i harsatnak le ningzahnak a in bantukin Amah caah thih le teminnak ka ngamh ve maw? tihi asi i Amah caah hih kan ngamh ve nak kan langhter ve ning cu Jesuh Khrih min ruangah zeitlukin dah mi vialte cungah dawtnak ka langhter ve mi hin asi. Jesuh Khrih nih Amah le Mah hlawt in a kan dawt ning cu asi. Aneih bikmi na innchungkhar cungah teh Pathian duh ning taktak in dawtnak na ngei ve maw? Jesuh Khrih min put in sifakmi le retheimi, sualnak i a tlaumi lam ding hmuhnak dingah na tuahmi le na bawmhmi hna hi Jesuh Khrih cungah dawtnak na langhter ve mi le na tuahmi cu asi. Amen! Jesuh Khrih nih dawt fial kan si tikah hin mi nih kan cungah an tuahmi tthatlonak nan ngeihthiam hna lai ti asi bangin an sualnak an i hngalh khawhnak hnga an si ning tein Thawngtha na chimh ve hna lai ti hi fialchih kan si. Amen! Bawipa nih A Bia Amah sunparnak caah hmang zungzal ko seh.. Thawngtha chimtu vialte hi Thiang Thlarau a ngeimi lawngte rak si usih law cu Thawngtha biatak hi a karh tuk ko cang hnga i Thiang Thlarau dawntu sinak zong hi a rak um hrimhrim hnga lo.....

1 THESALON 5:19

Thiang Thlarau kha dawn hlah u;

1 THESALON 5:20

phungchim kha zeirello in um hlah u.

1 THESALON 5:21

Zeizong vialte kha hneksak dih hna u: a ṭhami kha i chiah u law

1 THESALON 5:22

thil ṭhalo paohpaoh kha hrial hna u.