AHODAH KA FIAL LAI? AHODAH KA LAMKAL ASI LAI? TIMI AW KA THEIH..

Nikhat cu thla ka cam lio ah Pathian Aw fiang tein ka theihmi aum. Pathian kan Pa nih a chimmi cu hihi asi: Ahodah ka fial lai? Ahodah ka lamkal asi lai ti i a chim thawng kha ka theih. Keinih ka thawh i Bawipa keimah ka kal lai, keimah ka thlah tuah tiah lunglawmnak mitthli he ka leh cawlh ve... Bawipa kan Pathian nih hin mizei paoh bia ruah le Amah riantuantu si cio a kan duh. Kanmah duh ningin arianttuan si loin Amah duhning in ariantuantu si hna seh tihi a kan duh cio. Pathian Thawngtha chim lawng hi si loin Pathian riantuantu sining phun tampi a um. Nihin zumtu tampi nih Pathian riantuan ti ah kan ruahmi cu Pastor ttuan, Evangelist kal, Thawngtha chim, Mission riantuan le Thlah hna hi a tam deuh nih kan ruah khawhmi asi. Sihmanhsehlaw Pathian nih kan rianttuantu tiah a auhmi hna cu Amah duhning in le Amah fialning in a riantuantu hna hi kan si. Pathian riantuan ding hi vawlei ah ttuan cawk lo an si ko nain kannih nih kan ruahmi cu Thawngtha chim tiang lawng kan ruah caah hin minung tampi caah hmunhma aum lo ah kan rel lengmang nak asi. Biatak cu zumtu vialte kan dihlak in Pathian riantuantu kan si dih ko tihi chim ka duhmi asi. Pathian nih na thinlung chungah mi bawmtu si duhnak an pek ahcun azulh dawizia te thiam law cucu Pathian nih Keimah fialning in ka riantuantu an ti hrimhrim ko lai.Biapi asimi cu Pathian nih zei rian dah a ka pek timi na hngalhnak hnga, Bawipa AW na theih tiang ahmai ah kun lengmang ve ko tiah kan nawl. Nangta, Bawipa nih in ti ve sehlaw zeitindah na leh ve hnga?

—
ISAIAH 6:8
Cun Bawipa nih, "Ahodah ka fial lai? Ahodah ka lamkal a si lai?" a ti kha ka theih. Kei nih, "Keimah ka kal lai! Ka thlah tuah," tiah ka leh.

Comments

“Pathian Pennak Sullam.”

Vawlei cung hmunzakip ah a ummi ka miphun vialte hna Bawipa nih nan umnak hmun cioah Amah dawtnak thukpi in intheihter chin hna sehlaw biathli in ruah cio ko hna seh. Atu i Thawngṭha ka ṭialmi Pathian Pennak chungah na lut cang maw? timi hi fak deuh in rak ka ruahpi ve tiah kan sawm. Pathian Pennak chungah na lut cang maw timi biahalnak hi va luh dingmi khi halduhmi cu asi nain a taktak le ngaingai ah cun kan thinlung chungah ngeih dingmi tu hi a rak si deuh. Biatak cu Pathian Pennak hi tuahṭuannak in le nunthiannak men in kan hmuhkhawhmi asi hrimlo ti hi voi tampi chim ka duh. Pathian Pennak kan luhkhawhnak dingah cun lamkhat lawng aum i cucu Jesuh Khrih zumhnak thawng lawng bak in asi ko. Pathian Fapa Jesuh Khrih kan zumhnak thawngin Ti le Thlarau in kan hrinṭhan lawnglawng ah Pathian Pennak chungah kan lut kho ti hi fakpi in chim ṭhan ve ka duhmi asi. Bawipa Jesuh nih a timi cu ka Pa nih tuah hna seh ti a duhmi a tuahmi lawnglawng an lut lai tiah a ti taktak. Cucu tuahnak biafan...

"NUNNAK."

JESUH CU NUNNAK ASI (John 14:6) Minung vialte nih kan herhbikmi hi “Nunnak”, asi. Tulio i kan kawl, kan ṭ uanmi tampi hna zong hi nun duh ah an rak si i Kan pum in dam kan duh lengmang mi zong hi nun kan duh caah asi. Thuk deuh in kan rak ruahlomi cu Nunnak maw abiapi deuh? Damnak dah abiapi deuh timi kong hi asi. Na dam ruangah na nun si loin na nun rih ruangah damnak na herh asi deuh. Damnak cu anungmi nih kan herhmi asi i athimi caah cun damnak aherhnak a um ti loh. Cubantuk in Khamhnak zong hi taksa in anung rihmi le Thlarau in athimi hna ca i sualnak thianhpiak, Sualman leiba champiak le sualnak chungin luatnak thawngin khamhnak kan hmuhnak ding caah Khamh kan herh arak si ve. Khamhnak kan ti lengmang mi cu sualnak ruangah Pathian thinhunnak in aluangmi dantatnak kan in dingmi chungin kan luat khawhnak ding caah Jesuh Khrih thisen in sual ngaihthiamnak kan hmuhnak ding caah tuahpiakmi le sualnak chungin luatternak thawngin sualnak sal kan si tinak hnga lo caah asi. Sualnak sal kan...

"BIATAK."

Biatak timi cu biachimmi biataknak le tuahnak i fakpi alangmi khi biatak asi ve ko nain chunglei ah hmuhkhawhlomi biatak kha lenglei kan tuahnak in a hunglangmi tu khi asi deuh. Tuahnak in a hunglangmi ka ti tikah tuahnak paoh khi biatak an si ka ti duhnak siloin na chunglei ah aummi biatak kha tuahnak in na langhter tikah na chunglei ah aummi biatak he aikhat in na tuahmi khi biatak ka timi cu asi. Biatak le dawtnak hi hmuhkhawhlomi chunglei ah aithupmi veve an si i an kalning le an sining ailo ngai. Dawtnak le biatak hi lenglei tuahnak cungah aihngatmi siloin dawtnak he chungleiin aithawkmi an si i lenglei langhtermi tuahnak tiangah dawtnak taktak le biatak in chunglei umning in rianlimtu khi an si. Biachim i biataknak le tuahnak i biataknak vialte hi biatak i theitlai tu an si deuh. Sihmanhsehlaw Kaa in biatak achimmi tampi kan um nain nun in ai biataklomi tampi kan um ve. Baibal nih biatak ati lengmang mi tu cu kaa le tuahnak hlan ah nunnak ah biatak ngeihtu hi biatak atimi cu asi....

Nunnak Petu Thawngṭha

Search This Blog