JESUH NIH KEIMAH KONG NAN CHIM LAI A KAN TI...

Nihin zumtu vialte le thawngtha chimtu vialte nih hin a ho kong dah kan chim i zei kong dah kan chim timi hi ruattti ding in kan sawm hna. Thawngtha chim fial kan si taktak mi hi zeidang kong si hrimhrim loin kan caah athi i atho tthanmi Fapa Jesuh Khrih kong hi Thawngtha nan chim lai tiah fialmi cu asi. Kan kenmi Thawngtha cio ah hin Bawipa Jesuh kong an si lengmang awk an si… 

• Jesuh Khrih vawlei a nun chungah a cawnpiak lengmang mi hna hi keimah cawnpiaknak si loin a ka thlahtu ka Pa sin in a rami cawnpiaknak asi a ti lengmang..
• Jesuh Khrih nih a kan chimhmi cu ka Pa nih a ka thlah bantukin Kei zong nih kan thlah ve hna tiah a ti, cu bantuk tthiamtthiam in Amah nih a kan thlah caah Amah sinin kan hmuhmi cawnpiaknak hin midang kan cawnpiak ve hna awk asi. Jesuh Khrih zong a Pa nih na chim lai timi te kha a chim i kannih zong Jesuh Khrih nih Keimah kong nan chim lai a ti bangin Amah kong kan chim awk le Thiang Thlarau nih a kan chimhmi le cawnpiakmi kha kan chim chin awk cu asi..
• Nihin cawnpiaktu kan dihlak nih hin ta zei cawnpiaknak dah chirhchan lakin mipi hi kan cawnpiak ve hna hnga? Kanmah fimnak, cawnnak le thiamnak in maw? Baibal relmi maw?
• Jesuh Khrih nih bia ka chim lengmang mi hi Keimah nawl in ka chim lo, a ka thlahtu ka Pa nih na chim lai tiah a ka fialmi tu hi ka chimmi asi ee tiah ati. Jesuh Khrih hmanh nih a Pa nawl a pekmi lawng a chim ahcun kannih chinchin cu a let tampi in kan chim dingmi hi Thiang Thlarau sinin tampi theih kan herh ve.. Thiang Thlarau sin in na chim lai a timi te hi kan chim awk te asi. Biatak cu kanmah duhnak le ruahnak chim hi ngol cang usihlaw a kan thlahtu Pa nih chim uh a timi te hi chim cio cang hna usih. Bawipa nih chim seh ti a ka duhmi cu zeitindah ka hngalh khawh lai tiah nangmah le nangmah naa ruat len lai nain biatak cu chim dingmi na hngalh lomi cungah an Uktu Pa sinah bawmhhal in a hmai na kun ko ahcun chim dingmi an chimh hrimhrim ko lai…
• Jesuh Khrih nih ka Pa sinin Bawmtu, BIATAK phuangtu Thiang Thlarau nan sinah ka rak thlah lai, Thiang Thlarau nih cun BIATAK chungah an luhpi hna lawng hmanh si loin BIATAK cu ahodah asi, BIATAK cu zeidah asi tiah an chimh hna lai i Keimah kong kha an chimhchin hna lai tiah ati. Thiang Thlarau nih hin Keimah kong kha an chimh hna lai i Keimah kha a ka thangtthat lai tiah Bawipa Jesuh nih a chim.
• Jesuh Khrih nih a zultu hna sinah a chimmi cu a hramthok tein Keimah sin ummi nan si caah nanmah zong nih Keimah kong nan chim ve lai ee tiah a ti hna. Cubangin nihin Jesuh Khrih zumhnak in khamhnak a co ve mi kan dihlak zong nih kan van zulh dingmi le chim dingmi cu Jesuh Khrih kong hi asi ve. Baibal kan relmi chung lawng si ti loin Jesuh Khrih zumhnak in kan chungah aummi Thiang Thlarau nih Jesuh Khrih kong a kan chimh chinmi kong hi kan chim cio awk asi. Biatak in Jesuh hi kawl ve law Thiang Thlarau na chung a um hi hngalh i zuam tuah. Na chung i Thiang Thlarau a um na hngalh lo ahcun na ngeih lo caah asi ko. Biatak cu na chungah Thiang Thlarau riantuannak na hngalh lo paoh ahcun Thlarau le Ti in hrin na si hrim rih lo tinak asi. Bawipa nih sunparnak co peng ko seh..

—-

JOHAN 7:16

Jesuh nih cun, "Kan cawnpiakmi hna hi keimah cawnpiakmi a si lo, a ka thlahtu ka Pa sinin a rami cawnpiaknak a si.

JOHAN 12:49

Zeicahtiah, keimah nawl in ka chim lo, ka chimmi cu a ka thlahtu ka Pa nih na chim lai tiah a ka fialmi kha an si.

JOHAN 15:26

"Ka Pa sinin a rami Bawmtu, biatak Phuangtu Thlarau cu a ra lai. Ka Pa sinin nan sinah ka rak thlah lai i keimah kong kha an chimh hna lai.

JOHAN 15:27

Cun nannih zong nih a hramthawk tein ka sin i a ummi nan si caah keimah kong kha nan chim ve lai.