ZEI TINDAH SUAL THIANNAK KA THUAH LAI...

David Siangpahrang chan lio ah Israel ram chungah mangttam kumthum chung arak tlung i David nih Bawipa hmai a rak kawl. Bawipa nih achimmi cu Saul le a innchungkhar cungah thisen chuah mawhnak aum ruangah asi tiah arak leh. Zei ruangah ti ahcun Sual nih Israel le Judah mi ca i arak ttantuk caah Gibeon mi kha a rak dawi hna i arak thah hna. Gibeon mi hi Israel mi si loin Joshua chan ah kan in that hna lai lo tiah Bawipa ruahnak hal ta loin Bawipa min in biakamnak an rak sermi hna miphun an si. Joshua chan ah Bawipa min in kan in that hna lai lo tiah bia an i kammi kha Saul nih ramdang mi nan si ai tiin thahding ah le hrawhding ah Israel ram chungin a rak dawi hna i thah dingah arak kawl hna. Saul nih arak hngalh khawh lomi cu keimah le ka innchungkhar nih kan tuahmi ruangah hin thisen chuahmawhnak kan cungah a um lai i kan miphun tiang mangttam a tlung te lai timi hi arak ruat kho lo. Saul a thih hnu pi ah Israel ram ah kumthum chung mangtam a tlun tik ahcun David nih zei ruangah dah ka ram ah hin mangtam a tlung hnga tiin Bawipa hmai a kawl tikah Sual le a innchungkhar nih Gibeon mi an thah hna ruangah thisen chuahmawhnak aum caah mangttam atlunnak hi asi tiah a rak chimh. Nihin ah hin kan ram le kan miphun, kan khua chungah hin sualnak tampi kan tuahmi ruangah thisen chuah mawhnak, chiatserhnak, dantatnak, sifahnak, rawl vuilonak, pamnak, damlonak, zawtnak phunphun a um tining law zei nan ka ti ve hnga dek. Nan ka ti dingmi cu Jesuh Khrih nih kan sualnak vialte a kan ngaihthiam dih cang i champiak dih cang nan ti ko lai dah. Fak deuh in ruatti hna usihaw ti ka duhmi cu kan khua, kan ram, kan miphun hi a dam taktak ne maw tihi kan ruah ngaingai awk asi cang.

David Siangpahrang nih Saul le a innchungkhar nih an tuahmi thisen chuahnak ruangah thisen chuah mawhnak Israel ram chungah aummi hi zeitindah kan damter khawh lai tihi fakpi in aruat. David Siangpahrang nih atuahmi hi nihin zumtu nih cun kan tuah lai ka zum lemlo. Nihin zumtu hna nih kan tuah dingmi cu Saul le a innchungkhar caah sual phuanpiak le ngaihthiam halpiak in thlacamnak he kan can kan dihter ko lai tiah ka zumh. Nanmah zawn cio ah siseh law zeidah nan hei tuah cio hna hnga?

Zawtnak le sifahnak hi sualnak a chuahtertu si loin sualnak tuahmi nih a chuahtermi athlei tlaitu asi deuh. Minung tampi thinlung ahcun kan zawt ruangah le kan sifah ruangah kan fir i kan sual kan ti lai nain cucu asi hrimhrim lo. Sualnak ruangah kan zawt le kan sifah arak si deuh. Sualnak tuahnak i theitlai cu sifahnak le damlonak, harsatnak tuhi asi zungzal. sual... sualnak, sualnak theitlai hi ttih a va nung dah... Minung tampi nih hin sualnak theitlai hi fakpi rak ruat cio usihlaw kan sual lengmang bak hnga lo nain sualnak a thleitlai cu thihnak asi tihi kan ruah duhlo caah kan duh paoh in sualnak kan tuah ko. Sualnak kan tuah lengmang ruangah nihin kan sining hi kan si arak si. Na sifahmi le na damlomi le na harsatnak vialte le khuaawng na tonlomi vialte hi zei ruangah si loin nangmah sualnak theitlai te na ei ve ruangah asi ko lai.