Minung tampi nih hin kan kaa in cun Thiang Thlarau ti chim hi cu kan thiam ngaiin ka thei. Amah belte pumpak cio in Thiang Thlarau he tonnak le hawikomhnak tiang kan phan cio maw timi van i hal ahcun chim awk kan ngei cio hnga dek maw? Tu ni ah chim ka duhmi cu mi nih chimmi Thiang Thlarau si loin mah nih tonmi le hawikomhnak ngeih ve cangmi Thiang Thlarau tu hi rak chim ve cang law ti ka duh. Mi zei hmanh Pathian Fapa, Jesuh Khrih a zummi vialte cu Pathian nih a Fa sinak cohlannak ah Thiang Thlarau toih kan si timi cu kan theih cio lai dah. Theihnak lawng si ti loin Fa sinak taktak conak a langhtertu Thiang Thlarau toih na sinak tuin tette rak khang ve cang tiah kan sawm. Atang i ka van ttialmi hi Baibal ning tein ka van ttialmi asi i duhsah tein van rel law "Ka Pa, Ka Pa", tiah Pathian an autertu hi ahodah asi hnga?
Nangmah lungtho tein maw Pathian hi "Ka Pa, Ka Pa", tiah na auh, Thiang Thlarau nih an bawmh caah dah "Ka Pa, Ka Pa", tiah na auh, Pathian nih a vun thlahmi Fapa Thlarau, na chungah a ummi nih dah "Ka Pa, Ka Pa", tiah a au... Kanmah duhnak lawngin mah Pa taktak asi lomi khi "Ka Pa," tiah auh a ngah lo cu kan hngalh ciomi asi ko nain nihin zumtu tampi nih cun Pathian hi "Ka Pa", tiah kan auh dih cio nain aho theng te khi dek Pathian nih "hawi", tiah alehmi cu kan si hnga? Biatak cu a Fa taktak na si ko ahcun "Hawi", tiah an leh ve hrimhrim ko lai. Pathian hi " Ka Pa", tiin na auh tik i an lehlo ahcun na khuaruah rak har hlah, Fa na si rih lo caah asi kho men. Fa taktak sinak Ro, Thiang Thlarau, Khrih Thlarau na chungah a um ko ahcun "Ka Pa, Ka Pa", tiin Pathian na auh tikah "Hawi", tiin an leh ve hrimhrim lai. Amen... Pathian Fa asimi taktak nih "Ka Pa, Ka Pa", tiin kan auh ve tikah "Hawi", tiin leh lai ai ngaih tukmi cu kan Pathian pei asi cu... Ahodah fale nih ka pa an kan ti tikah lehlo in a um bal? Fa tak na si ahcun an leh ve hrimhrim ko lai... Pathian nih pekmi Thiang Thlarau cu Pathian Fa ah a kan sertu Thlarau asi i Jesuh nih a kan toihmi zong hi Thiang Thlarau asi, Pathian Fa kan si caah Khrih nih Amah Thlarau a kan toih.
Zumtu vialte hi Pathian nih kamh kan simi cu nan ka auh ahcun kan leh bak hna lai tiah a kan ti cio nain... Nangta kan Pathian na auh tikah an let ve maw? tihi hal kan duhmi asi. Nikhat cu Bawipa zangfahnak thawngin Vision pakhat chungah ka um i ka pawngkam ka zoh tikah a mui dih, khuazei ah dah ka kal lai timi hi ka theih hrimhrim lo. Cu lio ahcun ka lungthin dihlak tein ka zumhmi cu Pa pei ka ngeih kha bawmhnak hal tuah ning ka ti. Pathian ka Pa cu bawmhnak hal ding in ka au. Ka aumi zong tampi khi ka au loh, Ka aumi cu ka Pa.... timi te hi asi. Cu lio ahcun Pathian Ka Pa nih a ka lehmi cu hawi tihi asi. Ka fa na aw kan ngeihpiak ko. Na duhmi vialte chim law kan tuah piak lai tiah bia achim tthan kha ka theih. Cule cangka in raltthatnak in kakhat i ka duhmi le ka herhmi, ka thinlung chungah Thiang Thlarau nih a ka chiahpiakmi cu pakhat hnu pakhat in ka hal cuahmah i atak in kan Pa, Pathian nih cun ka cungah atlinter cuahmah. Ka Pa, ka Pathian hi Fapa Jesuh thawngin le Fa ah cohlang asi vemi Keimah nih ka upat i thangthatnak vialte ka pek zungzal. Nihin ah ka Thawngtha areltu vialte hna ka nunnak dihlak ka pekmi le ka dawtmi hi midang si loin ka Pathian asi zungzal timi hi keimah le keimah nih kachim lengmang ruangah si loin a ka hngalhpi tu Bawipa Jesuh Khrih le Ka Pathian, Thiang Thlarau an si zungzal caah an min lianngan chin ko seh. Nangmah hrimhrim zong na chuahka tein Pathian hi Jesuh Khrih thawngin a zummi na sinak tiang lawng si ti loin Pathian nih ka fa tiah an lehnak le an chawnhnak AW na theih ve hi a biapi tuk. Biatak cu Pathian nih ka fa timi AW na theih ve taktak lo ahcun na thih tikah na ral attha bal lai lai. Pathian kan Pa nih hin Fapa Jesuh thawngin Amah azummi vialte cu kan auh tikah leh dingin a kan hngah zungzal ko. Amen..
- Pathian nih pekmi Thlarau cu Thiang Thlarau asi..
- Pathian nih pekmi Thiang Thlarau nih cun sal ah a kan canter tthantu ding Thlarau asi loh..
- Pathian nih pekmi Thiang Thlarau nih cun ther lengmang le phang lengmang in kan rak nunning ah a kan kalpi tthantu ding Thlarau zong asi loh..
- Pathian nih pekmi Thiang Thlarau nih cun Pathian Fa ah a kan sertu Thlarau asi..
- Pathian nih pekmi Thiang Thlarau nih cun Pathian kha “ka Pa, ka Pa” tiah a kan auter khawhtu Thlarau asi...
- Pathian Fa kan si caah Pathian nih a Fapa Thlarau cu kan lung chungah a run thlah..
- Pathian nih a run thlahmi a Fapa Thlarau kan chungah aummi nih "Ka Pa, Ka Pa", tiin a au...
- Pathian Fa kan si caah Khrih nih Thiang Thlarau a kan toih...
- Jesuh Khrih nih Thiang Thlarau a kan toih caah biatak kha kan hngalh.
- Pathian Fa kan si caah Khrih nih Amah Thlarau a kan toih....
- Khrih Thlarau nih an umpi paoh ahcun ahohmanh cawnpiaktu kan herh hna lo...
- Khrih Thlarau nih cun zeizong vialte kha an cawnpiak lai...
- Khrih Thlarau nih a kan cawnpiakmi cu ahmaan lomi si loin, Biatak tu kha a kan cawnpiakmi cu asi...
- Khrih Thlarau cawnpianak hi zul zungzal ko usih...
- Khrih chungah um camcin ko hna usih....
——-
ROM 8:15
Pathian nih an pekmi hna Thlarau cu sal i an canter ṭhantu hna ding thlarau a si lo, ther lengmang le phang lengmang i nan rak nunning ah an kalpi ṭhantu hna ding zong a si fawn lo. Pathian fa ah a kan sertu ding tu kha a si i Amah nih cun Pathian kha, "Ka Pa, ka Pa," tiah a kan auhter khawh.
GALATI 4:6
Pathian fa nan si caah khan Pathian nih, a Fapa Thlarau cu nan lung chungah a run thlah i cu Thlarau nih cun, "Ka Pa, ka Pa," tiin a au.
1 JOHAN 2:20
Sihmanhsehlaw nannih cu Khrih nih Thiang Thlarau kha an toih hna caah nan dihlak in biatak kha nan hngalh.
1 JOHAN 2:27
Sihmanhsehlaw nannih cu Khrih nih a Thlarau kha an toih cang hna. A Thlarau nan chung i a um paoh ahcun ahohmanh cawnpiaktu nan herh hna lo. Zeicahtiah a Thlarau nih cun zeizong vialte kha an cawnpiak hna i an cawnpiakmi hna cu biatak a simi kha a si, ahmaan lomi a si lo. Cucaah Thlarau cawnpiaknak kha zul u law Khrih chungah cun um camcin ko u.
Comments
Post a Comment