THIANG THLARAU.... THIANG THLARAU.... NA NGEI CANG MAW?

Naihrawng khua ka ruahmi cu Thiang Thlarau nih hin aluanciami kan kong chim hi maw a lawmh deuh hnga? Ara laimi kong chim dah a lawmh deuh hnga tihi ka ruat. Biatak cu an pahnih in an herhnak a um veve ko lai cu ka zumh ko nain kan tuahciami tuanbia lawng chimh si ti loin ruahchannak tampi kan ngeih khawhnak hnga a ra lai dingmi a kan chimhnak tu nih hin raltthatnak le lawmhnak tling a kan pek hrimhrim lai. Amen. Nang na chungah aummi Thiang Thlarau hi mawh an phurhtu le na tuahciami tuanbia an hngalhter tthan lengmang tu lawng maw asi? Na hmailei kong an tinhpiakmi an chimtu dah asi ve? Biatak cu kan sining taktak le ahodah kan si ti kan i hngalhnak ding ahcun kan tuahciami hi van hngalhter tthan cu kan hau lengmang taktak. Cu thawng lawng cun a kan khamhtu Pa cungah zumhawktlak taktak in kan nung kho ve lai. Zeicah ti ahcun zeizat remruam dah ngaihthiam kan si ti kan i hngalhnak thawng lawnglawng in zumhawktlak sinak nun cu kan ngei lai. Amen. Biatak cu Thiang Thlarau nih hin na hmailei kong chimh le lam hmuhsah hi a duh bak... Thiang Thlarau kong hi kan chim cio lai nain Cathiang ah na hmuhmi Thiang Thlarau kong maw na chim? Thawngtha chimtu nih an hman lengmang caah dah Thiang Thlarau biafang hi na hman ve? Nangmah nih Thiang Thlarau na ton ve cangmi le na ngeih ve cangmi Thiang Thlarau dah na chim ve? Biatak cu nangmah nih tonmi le ngeihmi Thiang Thlarau lawnglawng nih hin hmailei kong an chimh khawh lai i zeizong vialte an cawnpiak khawh lai. Amen... 

Jesuh Khrih nih Thiang Thlarau kong a kan cawnpiakmi cu hihi asi: Atang i ka van langhtermi hna ah hin Thiang Thlarau lamhruainak na tong bal maw? Catlak cungah ttialmi rel in si loin atak in na thinlung ah le na nunnak chungah an tling bal ve maw tiah van rel ve hmanh.... Thiang Thlarau hi na hngalh taktak maw?

• Thiang Thlarau nih cun Jesuh (Keimah) sinin theihmi ara lai dingmi kong an chimh hna lai ati.. Thiang Thlarau nih cun ara lai dingmi an chim bal maw?
• Thiang Thlarau nih cun zungzal in an umpi hna lai tiah ati.. Thiang Thlarau nih cun zungzal in an umpinak na hngal maw?
• Jesuh Khrih hrimhrim zong nih zungzal in caan dongh tiang kan umpi ve hna lai tiah ati ve.... Jesuh nih an umpinak cu teh theihnak le relnak tiang lawng maw na si rih, atak in an umpinak na hngal ve cang maw?
• Thiang Thlarau cu Biatak phuangtu Thlarau asi tiah ati... Thiang Thlarau nih biatak cu hodah, zeidah asi tiah an phuang cang maw?
• Biatak phuangtu Thiang Thlarau nih cun biatak chungah an luhpi hna lai tiah ati... Thiang Thlarau nih cun biatak chungah an luhpi ve cang maw?
• Thiang Thlarau nih cun zeizong vialte an cawnpiak hna lai tiah ati.. Zeizong vialte cu cawnpiak na si cang maw?
• Thiang Thlarau nih cun Jesuh (Keimah) kan chimhmi vialte hna kha nan lung an pemhter hna lai tiah ati.. Thiang Thlarau nih cun Jesuh chimmi bia cu na lung an pemhter cang maw?
• Thiang Thlarau nih cun Jesuh (Keimah) kong an chimh hna lai tiah ati.. Thiang Thlarau nih Jesuh hi hodah asi tiah a kong an chim bal maw?
• Thiang Thlarau nih cun Keimah nawl tiin zeihmanh achim lai loh tiah ati... Thiang Thlarau nih cun keimah nawl ati maw? Nangmah nawl ati dah?
• Thiang Thlarau nih cun Jesuh (Keimah) sin in atheihmi kha an chimh hna lai tiah ti.. Thiang Thlarau nih an chimhmi hi Jesuh sin in atheihmi maw an chimh ve?
• Thiang Thlarau nih cun Jesuh (Keimah) nih ka rak in chimhmi hna chungin a lakmi kha an chimh hna lai tiah ati.. Thiang Thlarau nih an chimhmi hi Jesuh nih arak chimciami chung lakmi maw an chimh?
• Thiang Thlarau nih cun Jesuh (Keimah) kha a ka thangtthat lai tiah ati.. Na chungah ummi Thiang Thlarau nih cun Jesuh Khrih hi a thangtthat maw?
• Thiang Thlarau nih cun Jesuh (Keimah) pekmi aa lak lai i nannih cu an chimh hna lai tiah ati.. Thiang Thlarau nih cun Jesuh pekmi lak in an chimhmi asi ve maw?
• Thiang Thlarau cu ka chungah aum... Nang na chung ah teh a um ve maw?
• Thiang Thlarau cu kan chungah a nun caah ka sinah a um ti ka hngalh... Thaing Thlarau na sinah aum na hngal ve maw?
• Thiang Thlarau cu Pa Pathian nih Jesuh (Keimah) Min in a run thlahmi Bawmtu asi tiah ati...
• Thiang Thlarau cu Pa Pathian sinin arami Bawmtu, biatak phuangtu Thlarau asi tiah ati....
• Thiang Thlarau cu Jesuh nih Pathian sin in a van thlahmi Bawmtu asi...
• Thiang Thlarau cu Jesuh nih Pa Pathian sinah halmi Bawmtu pekmi asi..
• Thiang Thlarau cu vawlei nih a hmuhlo ca le a hngalhlo caah a cohlang lo...
• Jesuh nih Van akai lai nawn te ah azultu hna sinah achimmi cu "Thiang Thlarau" hmu ko uh tiah ati hna. Nang "Thiang Thlarau", na hmu ve cang maw?
• Jesuh Khrih hi vawlei cungah taksa in arak nun lio ah le thihnak in athawh hnu Lamkaltu ah athimmi hna azultu cu "Thiang Thlarau", thawngin arak cawnpiak hna...
• Jesuh Khrih nih azultu arak chimhmi hna cu "Jerusalem chuahtak hlah uh,ka Pa nih a rak in kamhmi hna laksawng kha hngak ko u tiah ati hna.
• Jesuh Khrih hrimhrim nih ka Pa nih bia aa kammi "Thiang Thlarau", kha nan cungah ka run thlah lai. Sihmanhsehlaw cunglei in ṭhawnnak "Thiang Thlarau",  kha nan cung i a tlun hlantiang khuapi chung hin hngak ko u," tiah a ti hna. 
• Jesuh Khrih nih Johan nih cun ti in tipilnak an pek hna sihmanhsehlaw Kei nih cun Thiang Thlarau le Mei in tipilnak kan pek hna lai tiah ati. Nang teh ti lawngin maw tipilnak pek hna si? Thiang Thlarau le Mei in dah tipilnak pek na si ve cang?
• Jesuh Khrih nih Thiang Thlarau na cungah atlun tikah tthawnnak in na khat lai tiah ati. Thiang Thlarau na cung i atlun cang caah tthawnnak cun na khat te ma? Zeibantuk tthawnnak in dah na khah? Mah le mah teinak tthawnnak tal na ngei maw?
• Jesuh Khrih nih Thiang Thlarau tthawnnak thawng cun vawlei cung dihlak ah ka tehte na si lai tiah ati. Bawipa Jesuh caah Thiang Thlarau tthawnnak cun tehte na si kho maw?
• Jesuh Khrih nih Lamkaltu hna sinah arak chim bantukin Pentecost ni ah azultu hna cu Pathian nih kamhmi Thiang Thlarau cu arak toih hna. Nang teh Pathian nih Jesuh Khrih sinah le kanmah caah kamhmi Thiang Thlarau cu toih na si ve cang maw?
• Petecost ni i thlacammi vialte cu Thiang Thlarau in an khat i Thlarau nih chim khawhnak a pek hna bantuk cio khan, holh dang in an holh. Nang teh Thiang Thlarau na chungah aum cang cu tehte pakhat tal na ngei maw? Holh dang te na ngei va cang? Thiang Thlarau kan chungah aum hi phunkhat cio in a lang ko lai, Nang teh zeitindah alangh ve?
• Peter nih Jesuh Khrih cu Pathian orhlei kamah khan ṭhutter a si i a Pa nih bia a kam bantuk khan Thiang Thlarau cu a Pa sin khan ahmuh; cun atu i nan hmuhmi le nan theihmi hi kannih a kan toihmi a laksawng "Thiang Thlarau" kha a si tiah khuaruahhar in Thiang Thlarau riantuannak alunghrinmi hna sinah kha achim.
• Pathian nih Jesuh Khrih sinah kamhmi Thiang Thlarau le Jesuh Khrih nih Thiang Thlarau lei Mei in tipilnak kan pek hna lai atimi cu Thiang Thlarau cu na hmu cang maw? Thiang Thlarau cu na ngei ve cang maw? Thiang Thlarau he nai tong ve cang maw? Thiang Thlarau na ngeih cang ahcun hawikomhnak teh nan ngei cang maw? 

----
JOHAN 14:16

Ka Pa kha ka hal lai i Bawmtu a dang, an pek hna lai i a zungzal in an umpi hna lai.

JOHAN 14:17

Amah cu biatak phuangtu thlarau a si; vawlei nih cun a hmuh lo ca le a hngalh lo caah a cohlang kho lo; sihmanhsehlaw amah cu nan sinah a um i nan chung i a nun caah nannih nih cun nan hngalh.

JOHAN 14:19

Hi hnu tlawmpal ah hin vawlei nih cun a ka hmu ti lai lo, sihmanhsehlaw nannih nih cun nan ka hmuh lai; cun keimah hi ka nun lai caah nannih zong nan nung ve lai.

JOHAN 20:20

Cu bia a chim dih cun a kut le a hnak kha a hmuhsak hna. Bawipa an hmuh ṭhan caah a zultu hna cu lunglawmhnak in an khat.

JOHAN 14:26

sihmanhsehlaw ka Pa nih ka min in a run thlah laimi Bawmtu, Thiang Thlarau nih cun zeizong vialte kha an cawnpiak hna lai i kan chimhmi vialte hna kha nan lung an pemter hna lai.

JOHAN 15:26

"Ka Pa sinin a rami Bawmtu, biatak Phuangtu Thlarau cu a ra lai. Ka Pa sinin nan sinah ka rak thlah lai i keimah kong kha an chimh hna lai.

JOHAN 16:7

Sihmanhsehlaw biatak kan chimh hna: ka kal hi nan caah a ṭha deuh, zeicahtiah keimah ka kal lo ahcun Bawmtu kha nan sinah a ra kho lai lo. Ka kal ahcun amah cu nan sinah ka ratter lai.

JOHAN 16:8

A rat tikah vawleicung mi kha sualnak an ruahning le zeidah a ding ti an ruahning le Pathian nih bia a kan ceih lai ti an ruahning i an palhnak kha fiang tein a hngalhter hna lai.

JOHAN 16:13

Asinain biatak phuangtu Thlarau cu a rat tikah biatak chungah cun an luhpi hna lai. 'Keimah nawl a si,' tiin zeihmanh a chim lai lo, a theihmi le a ra lai ding thil kong tu kha an chimh hna lai.

JOHAN 16:14

Keimah nih ka rak in chimhmi hna chung khan an chimhmi hna cu a lakmi a si lai caah keimah kha a ka thangṭhat lai.

JOHAN 16:15

Ka Pa ngeihmi vialte cu keimah ta an si ko, cucaah cun, 'Thlarau nih cun ka pekmi cu aa lak lai i nannih cu an chimh hna lai,' tiah ka rak in chimh hna kha a si," a ti.

JOHAN 20:22

Cu bia cu a chim dih in a thaw a chuahhnawh hna i, "Thiang Thlarau kha hmu ko u.

LAMKALTU 1:2

a tuahmi thil vialte le a cawnpiaknak vialte kha ka ṭial. Vancung i a kal hlanah khan a lamkaltu caah a thimmi hna kha Thiang Thlarau thawngin a cawnpiak hna.

LAMKALTU 1:4

Cun an sin i a um lioah khan hi nawlbia hi a pek hna i, "Jerusalem khua hi chuahtak hlah u, ka Pa nih a rak in kamhmi hna laksawng ka rak in chimhmi hna tu kha hngak ko u.

LAMKALTU 1:5

Johan nih cun ti in tipilnak a pek hna, sihmanhsehlaw kan hmailei ni tlawmte chungah hin Thiang Thlarau in tipilpek nan si lai," tiah a ti.

LAMKALTU 1:8

Asinain Thiang Thlarau nan cung i a tlun tikah cun, ṭhawnnak in nan khat lai i Jerusalem khua le Judea ram vialte le Samaria ram ah le vawlei cung khuazakip ah ka tehte nan si lai," tiah a ti hna.

LAMKALTU 2:2

Chikkhatte ah khin van in aw pakhat a rung i a thawng cu thlitu fak piin a hrangmi thawng bantuk a si i an ṭhutnak inn kha a khat dih.

LAMKALTU 2:3

Cun meizik he aa lomi leiṭe an hung chuah kha an hmuh hna i cuka i a ummi hna an dihlak cungah khan lei cu pakhat cio ah an i fu.

LAMKALTU 2:4

Annih cu Thiang Thlarau in an khat i Thlarau nih chim khawhnak a pek hna bantuk cio khan, holh dang in an holh.

LUKA 24:49

Cun keimah hrimhrim nih ka Pa nih bia aa kammi kha nan cungah ka run thlah lai. Sihmanhsehlaw cunglei in ṭhawnnak kha nan cung i a tlun hlantiang khuapi chung hin hngak ko u," tiah a ti hna.

LAMKALTU 2:33

Pathian orhlei kamah khan ṭhutter a si i a Pa nih bia a kam bantuk khan Thiang Thlarau cu a Pa sin khan a hmuh; cun atu i nan hmuhmi le nan theihmi hi kannih a kan toihmi a laksawng kha a si.