Vawlei cung hmunzakip ah a ummi ka miphun sinah anung taktakmi le atthawng taktakmi Nunnak Petu Thawngtha asimi Jesuh Khrih thawngtha kan hrawmh hna. Nai hrawng cu thawngtha tling kan hrawmh lonak hna asau ngai cang. Biatak cu ttial luaimainak hin teinak le miaknak kan hmuhnak rak si loin Bawipa he hawikomhnak thukpi kan ngeihnak lawnglawng hin teinak le miaknak in tthawnnak tling kan rak hmuhnak arak si deuh. Ka miphun sinah le Pathian ka daw ve ko atimi tampi nan sinah fakpi in chim le ttial ka duhmi cu Thiang Thlarau he hawikomhnak na ngei bal maw? tihi asi. Na ka leh dingmi cu thla cu ka cam lengmang ko, Baibal ka rel lengmang ko tiah na ka leh ko lai nain Biatak cu thlacamnak in Thiang Thlarau he hawikomhnak na ngeih ballo caah pei caan saupi thla na cam khawhlonak le Baibal saupi na rel khawh lonak kha asi cu tiah kan leh hnga. Pumh hmanh ah pei asau tuk na ti lengmang ko kha...
Kan miphun ah hin Pathian a dawmi le Pathian aduhnak zulh aithim duhmi tampi kan um lai nain kanmah lei tuahnak tiang lawng asi in ka hmu. Biatak cu kanmah lawng tuahnak in nau pawi khawh asi loh tihi chimh kan duhmi hna cu asi. Thiang Thlarau he umttinak le hawikomhnak taktak loin cun Pathian tinhmi le fialmi rian hi kan lim kho hrimhrim lai lo. Cucaah cun Pathian nih rian fialmi na si ve ko ahcun Thiang Thlarau he thlacamnak in hawikomhnak ngei ve dingin caan tampi rak pe ve tiah kan sawm. Zeitluk thuk in dah Thiang Thlarau hi ka hngalh cang ti theih na duh ahcun nikhat ah nazi pazeizat dah thla na cam khawh cang timi nih na sining te achim ko. Nikhat ah nazi pakhat hmanh thla na cam khawh rih lo le nazi pakhat hmanh Baibal na rel khawh rih lo ahcun ka hngakchia ko rih hita tiah rak i hngal ko. Nichiar te Baibal ka rel na ka ti lai nain Baibal relnak in thluachuah kan hmuh si loin kan relmi kha atak in kan i nunpinak tu hin thluachuahnak kan hmuh arak si deuh.. Pathian biatak nunpinak ding ahcun Baibal na rel lengmang le Thawngtha na theih lengmang cu a hau ve tthiamtthiam... Baibal relnak lawng in puitling sinak achuahpi lo, puitling sinak achuahpitu cu na relmi le na theihmi kha atak in naa nunpinak tuin puitling sinak na phak tiang na tthang lai. Baibal na relmi nih dawh thlacam an ti ko khah... Thlacam ti cu kanmah lawng si loin Thiang Thlarau he hawikomhnak, Pathian he biaruahnak, Jesuh he umttinak tuhi arak si deuh...
Tulio i ka thinlung ah Thiang Thlarau nih rian attuanmi Baibal cang hna cu atu i ka van ttialmi hna hi an si. Kan miphun chungah hin na hrinthan rihlo timi bia hi kan duh cio lai lo dah ti cu ka zumh ko. Kanmah chan lawngah si loin Paul nih Korin khuami hna sin i ca arak kuat hna zongah hin ka hrinthan cang ko ti ttung i duh paoh in anungmi an rak tamtuk ve caah atang i Baibal cang hna hi arak kuat hna. Cubangin ka miphun hawi sin zongah ralttha ngaiin biatak ka van ttial ve. Kan miphun dihlak hin kan hrintthan dih ko lai, kanmah le kanmah kan i ruahning zongah Pathian fa kan si, kan ti cio ko lai. Ahman ko lai, na hrintthan taktak ko lai. Biatak cu nangmah nih ka hrinthan timi hnakin Pathian tu nih hin Ti le Thlarau in kan hrin cang an ti awk deuh tu arak si. Hrinthannak taktak cu Ti le Thlarau in hrintthannak tu hi hrinthannak taktak cu asi. Paul nih atimi cu ka hrinthan cang, Pathian Fa ka si cang ati ttung i taksa duhnak, sualnak a tuahmi hna anmah tein Khrihfa ka si atimi hna he hin cun kawmh hmanh si loin rawl hmanh nan eitti lo awk asi tiah ati. Pathian Fa taktak na si cang le si cang lo cu atang i ka van langhtermi hna tahfung in rak i tah ve... Pakhat in pasarih chungah hin naa tel ve rih asi ahcun Pathian Fa ka si rihlo ti hi rak i hngal ko. Tthatlonak vialte na tuah ruangah na hrintthan lo si loin na hrintthan taktak rihlo ca tu ah tthatlonak vialte na tuah arak si diam...
1 KORIN 5:11
1 KORIN 5:11
ka rak in chimh duhmi hna cu, Khrihfa ka si ve aa ti ṭung i sualnak a tuahmi, a hak a kaumi, siasal a biami, mi congoih a hmangmi, zu a rimi, mifir a simi, hi hna he hin nan i kom lai lo ka ti duhnak a si; cu bantuk mi hna he cun rawl hmanh hmunkhat ah ei ṭi hlah u.
- Sualnak na tuah rih maw? Na tuah peng rih ko lai maw? Sualnak na tuahmi nih an thawt peng rih ko maw?
- Na hak akau rih maw? Nangmah ca lawng maw na ruah peng rih ko? Midang caah dah na nun ve cang lai?
- Siasal na bia rih maw? Zei hi dah na caah siasal an si hnga? Phaisa duh tuk zong hi siasal biak phunkhat asi tiah Baibal nih a kan cawnpiak.. Phaisa lawng hmanh si loin innttha le mawtor ttha, thilttha phunkip duh zong hi siasal biak phunkhat asi ve tho.
- Mi congoih le thangchiat na hmang peng rih maw? Mi dang remlomi le huatmi na ngei peng rih maw?
- Zu na ding rih ko maw? Khaini na hmawm ko rih maw? Kuak na zu rih ko maw? Kunza na khai rih ko maw? Ritnak phun paohpaoh na tuah rih ko maw?
- Na fir rih ko maw? Fir cu mi hngalh loin nangmah ta asi lomi na lakmi paoh kha fir asi ko..
- Tlangval le nungak nih Nu le pa sualnak nan tuah peng rih maw? Nu cung nu duhnak le pa cung pa duhnak na tuah rih maw? Nu le nu, Pa le pa sualnak na tuah rih maw? Nu le Pa Hmanthlak tthalo, Video tthalo na zoh peng rih maw? A cung i ka ttialmi chungah naa tel ve rih ahcun ka hrintthan cang na timi kha lih asi. Nangmah ruahnak in na rak hrintthan asi. Pathian nih Fa sinak in hngalhmi chung ahcun naa tel naisai rih lo. Nangmah te tuin Pathian ka hngalh tiah na rak i ruah tu asi i Pathian na hngalh si loin Thawngtha chimtu nih an chimmi Pathian kong na theih tu arak si. Minung tampi nih hin Pathian kong cu kan theih, Thiang Thlarau kong cu kan theih, Jesuh kong cu kan theih hna nain kanmah pumpak cio in cun kan rak hngal ngaingai hna loh. A hrintthan taktak mi nih cun mah pumpak in Pathian, Thiang Thlarau le Jesuh Khrih hi aton hna lai i a hngalh hna lai. Theihnak le hngalhnak hi tampi ai dang....
Biatak cu Pathian Pennak chung kan luh cang hnu ah le Pathian Fa ka si cang hnu ah misual kan si khawh tthan asi loh, Siasal kan biak khawh tthan asi loh. Nungak le tlangval lio ah nupa sualnak tuahmi, va cung pa duhmi le nu cung nu duhmi, nu nih nu he sualnak tuahmi, pa nih pa he sualnak an tuah hi Pathian pennak chung an rak luh rih lo ruang tu ah an rak tuah asi deuh. Hrintthannak tling acomi na si taktak ko ahcun mi thil chuttu, hak a kaumi, zu arimi, mi congoih hmangmi le mi fir cu na si bal ti lai lo. Jesuh na rak ngeih hlan ahcun thil tthalo vialte hi rak tuah hmanh law Ti le Thlarau in na hrintthan taktak ko ahcun Mi sualmi, siasal biami, va cung pa duhmi, nu cung nu duhmi, nu le nu sualnak atuahmi, pa le pa sualnak atuahmi, nungak lio le tlangval lioah a itttimi, mi thil achutmi, hak a kaumi, zu arimi, mi congoih hmangmi le a firmi chung ahcun naa tel hrimhrim ti lai lo. Aruang cu nangmah ruangah si loin nangmah le keimah ruangah a nunnak pe i athi cangmi le a nung tthan cangmi Jesuh Khrih nih sualnak chung kir tthan ding ahcun asianh in a kan sianh naisai ti lo caah asi. Amen. Amah belte a cung i ka ttialmi tthatlonak vialte a tuahmi chungah naa rel ve rih asi ko ahcun na rak hrintthan taktak ve rih lo ca tu ah na rak tuah lengmang mi asi kha thawng kan thanh. Biatak cu Hrinthannak in Pathian Pennak na luh lo ahcun vancung khua cu na caah ruahchan awk zeihmanh a um bal lai lo.. Bawipa duhnak tu kan cung cio ah tling ko seh.. Amen. Amen. Amen...
1 KORIN 6:9
Miṭha lomi nih cun Pathian Pennak cu an co lai lo ti kha fiang tein nan hngalh ko. Nanmah le nanmah kha i hleng len hlah u; misual mi le siasal a biami le vacung pa duhmi le nu nih nu he sualnak, pa nih pa he sualnak a tuahmi le,
1 KORIN 6:10
mi thil a chutmi le hak a kaumi le zu a rimi le mi congoih a hmangmi le mifir a simi hna nih cun Pathian Pennak cu an co lai lo.
Comments
Post a Comment