PATHIAN TINHMI LE FIALMI RIAN KA LIM TIANG...

Nihin ah mah ca na sin aphan tikah ahodah ka si timi langhternak caah ttialmi si loin ahodah na si ve timi le Pathian tinhmi le fialmi na rian hi lim naa tim ve maw tinak caah asi deuh. Ka thinlung taktak in a um ningin thlarau in unau taktak asimi nangmah sinah ca kan kuat. Unau sinak taktak ahcun nautatnak le upatnak i pek hleinak zong a um lo i thiam i cuh zong a um hlei lo. Na sin i thazang peknak a rak phak lengmangnak tu cu Pathian nih a kan tinhpiak ning in le fialning in kan rian hi lim cio hna usih ti saduh thahnak caah asi.

Nihin ni tiang i Bawipa duhnak zulh le fialmi rian limnak kan zuanhnawhnak cioah hin daithlaannak nih kan kaltak cio ko seh. Taksa in daithlaannak le thathutnak nih hin minung caah sifahnak le paamnak a chuahpi bantukin thlarau ram hi Bawipa duhnak le fialmi rian kan zuanhnawh cionak zong ah hin daithlaannak le thathutnak nih thlarau lei sifahnak le paamnak a chuahpi ve. Hihi Pathian cungah ai hngatmi si loin nangmah le keimah cungah thathut lonak le daithaanlonak cu ai hngatchan. Pathian nih kan chungah achiahmi Thiang Thlarau nih cun Pathian nih a kan fialmi rian kan lim khawh cio nakhnga lungthawhnak le tuah duhnak a kan pek. Lungthawhnak in tuah duhnak a kan pekmi cu nangmah le keimah nih kan tuah tikah Thiang Thlarau nih a kan bawmh i kan tuahlo ahcun bawmh khawhnak lam a um ve lo.. Thiang Thlarau nih hin tuah duhnak le lung thawhnak a kan pek cio nain tuah loin caan saupi kan um tikah Thiang Thlarau nih tuah duhnak le lung thawhnak a kan pek tawnmi kha angol. Thiang Thlarau nih tuah duhnak a kan pekmi  tuahlo in kan um lengmang ruangah nihin zumtu tampi kan tawlhnak asi. Lung thawhnak in tuah duhnak ka timi hi Pathian nih an fialmi rian tuah duhnak na ngeihmi khi chim duhmi si loin fialmi rian na lim khawhnak dingah an bawmtu bik Baibal relnak le relmi nunpinak, rawl ulhnak le thlacamnak in Thiang Thlarau he hawikomnak chungah luh duh lengmangnak tu hi ka chim duh deuhmi asi.

Biapi cem asimi cu Pathian nih an fialmi rian zeitindah ka lim lai timi zuanhnawh peng hnak in Bawipa he hawikomhnak in Amah he hngalhnak tling kan ngeih khawh cionak tu hi zuanhnawh cio usihlaw cu nih cun Pathian fialmi le tinhpiakmi rian kan lim khawhnak ah bawmtu tthabik asi hnga. Pathian fialmi le tinhpiakmi lim abiapi tluk hin alet tampi in kan Pathian he tling tein i hngalh hi biapi asi deuh. Pathian tling kan hngalh khawh chinchin nak ding ahcun Amah he thlacamnak in kan i hawikomhnak lawnglawng in asi lai. Biapi asimi cu thlacamnak in Bawipa he kan i hawikomh lengmang nak in hngalhnak tling chinchin kan ngeih tikah fialmi rian hngalhnak lawng si ti loin fialmi rian lim khawhnak zong achuahpi lai. Pathian duhnak le Pathian tinhpiakmi kan hngalh lawng hi si loin Pathian duhnak le tinhpiakmi rian kan lim khawhnak tu hin kan Pathian kan lawmhter deuh.
----

HEBRU 10:36

Pathian duhnak nan tuah khawh nakhnga le bia an kamhmi hna nan co khawh nakhnga lungsau thinfual in um u.

HEBRU 13:21

Cun Jesuh thihnak in a thawhtertu daihnak Pathian nih cun amah duhnak nan tuah khawhnak dingah a herhmi thil vialte cu in pe hna seh law Jesuh Khrih thawngin kan chungah a duhmi paoh cu tuah ko seh. Cun Khrih cungah zungzal in zungzal tiang sunparnak cu um ko seh. Amen.