Naihrawng I khua ka ruah lengmang mi le ka lungthin ah fak ngaiin hmunhma ala i ka nunnak nih acohan thiam deuhlomi cu hihi asi. Kan miphun siseh miphun dang siseh Coronavirus ruangah Biakinn kan khar ciomi kong hi asi. Biakinn khar timi hi kan miphun ca bang ahcun aum baltuk lomi asi. Nangmah zong nih na rak rel tikah na khuaruahhar in na rak ka ruahpi ve ko lai dah. Nikhat khat ahcun nihin i ca kan kuatmi hi minung tampi nih an van rel ve can aphan lai I kan hnu ara dingmi caah zohchunhawk kan tlaknak le tlaklonak cu an van hmuh te ko lai. Mah ca ka ṭial ah hin alinhsat liopi asi i tuhnu kum 4,5 ahcun kan ipalh le palhlo le zohchunhawk kan tlak le tlaklo cu an hung lang te ko lai. Coronavirus timi cu flu kan timi bantukin avak vemi rai asi i tuluk ram in aithokmi asi anti. Coronavirus nih cun atu hi vawei cungpi hi lihninh in ahninh ko. Zumtu zong ahninh hna i zumlotu zong ahninh in ahninh ko hna. Hninhmi chungah naa tel ve dek maw?
Zumtu Pathian Biami na si ko nain kan pawngkam acangmi nih lihninh in an hninh ve ahcun Pathian he hawikomhnak cu na ngei ballo timi cu afiang bak. Phungdang in ka chim ahcun Khamhnak ka hmu cang na ti hmanh ah hrinṭhannak cu na phan baklo timi cu afiang ko. Baibal rel nih athawtmi le thlacam nih thawtmi le pumh nih thawt ngaingaimi cu na rak si lo caah asi ko. Pathian kan biakmi nih hin kan pawngkam acangmi nih hninh lengmang dingah le thirphang in ṭih lengmang dingah a kan khamh baklo si. Atu I na ṭihmi thihnak hi nikhat khat ahcun na ton ve te hrimhrim ko lai caah pumpak in siseh innchungkhar in siseh na ton ngam le na pah ngamnak dingah Jesuh Khrih rak ngei dingin kan sawm. Jesuh Khrih na ngeihlo ahcun atu I na ṭihmi hi na ton ve tikah na tuar in na pah kho te lai lo. Ahlankan in ralrin ding lakah ralrin cem dingmi cu Jesuh Khrih ngeih hmasa ding hi asi. Facang cawk le zawtnak hrial in ralrin na thiam bantukin Jesuh ngeih in ralrin thiam dingin kan sawm… Na innchungkhar nih Jesuh anngeih ko ahcun an thih zongah Bawipa sinah aidin timi hi anhnemtu lakah aṭhawngbik le na hnangamnak bik asi te ko lai…
Coronavirus nih vawlei minung vialte therphang dih le lihninh in ahninh bantukin ka Bawipa, Jesuh Khrih Thawngṭha nih hin vawlei cung minung vialte hi kan hnindih sehlaw ka hei duh hringhran dah. Biakinn Kharnak kong he pehtlaiin cozah nawlngaih cu aṭha timi biafang kan hmang cio lai nain cozah maw kan ṭih? Coronavirus dah kan ṭih? timi kan thinlung adih umek tiang a kan hngaltu cu ka Pathian asi ko. Cozah nawlngaih hi naa thim taktakmi asi ko ahcun zeitik caan paoh ah Khrihfabu ca lawngah si loin nangmah pumpak ca zongah cozah nawl rak ngai thai. Cucu na lungthin taktak asi ahcun kan Pathian nih hmailei na lamthluan ah cozah nawlngaih thiam lawng si loin Bawipa nawlngaih thiamnak zong in chapchin ko seh. Amah belte cozah nawlngaih min bunh in Coronavirus ṭih ruangah Biakinn khar duhmi na si ko ahcun Bawipa nih Keimah hngakin nangmah le nangmah naa daw deuh, na innchungkhar na dawt deuh hi ta timi bia an ceih ve te ko lai(Matthai 10:37, 16:24, Luka 9:23).
Cozah nih an tuahmi hi kanmah caah le minung dang vialte caah asi ko lai nain Cozah le minung kanmah le kanmah zawtnak in khamh khotu taktak cu kan Pathian lawnglawng asi. Bawipa duhnak asi ahcun nihin biakinnkip kan khar ciomi cungah le cozah nih ralrinnak in khua an khanmi kan zulhnak cungah hin thluachuah um hram ko seh. Minung kan nunnak ah hin abiapi cemmi hi Damnak asi loh, Nunnak tuhi abiapi cemmi asi. Nunnak hmanh ahcun Zungzal Nunnak tuhi abiapi cem(Luka9:25). Zungzal Nunnak hmuhnak lam cu Jesuh Khrih hi nunnak dihlak Uktu, Khamhtu le Bawipa sernak thawngin asi. Damnak aherhmi cu mithi si loin anungmi nih kan herhmi asi i Mithi nih anherh hmasami cu zungzal Nunnak(Jesuh ngeih) tuhi asi ve. Athimi nasi le Nunnak(Jesuh) rak fuh law Anungmi nasi ko ahcun Bawipa rak thangṭhaṭ ko. Bawipa tinhning asi ko ahcun innchung na um z0ngah na pum in cun na hrial kho hlei bal lai lo. Minung tampi nih kan ṭihmi le kan phanmi hi kan cungah atlinglo dingmi tam deuh an si….
Mah coronavirus hi zei ruangah dah arat timi hi teh na ruat bal maw? Minung tampi nih cun thla kan cam tikah dong cang seh tiah Bawipa zong kan nawl ko lai. Keimah nunnak le ka sining tein cun Coronavirus hi dong cang seh tiah cun thla ka cam rihlo. Aruang cu zeizong vialte hi Pathian tinhning le khuakhan ning in an kaldih ko caah asi (Efesa 1:11). Cuhmanh ah Pathian khuakhanmi le tinhmi lakah Jesuh thawngin Amah fa siding in khuakhannak le tinhnak arak ngeihmi hi asi. Halleluijah. Amen.. Ka Pathian cu thangṭhaṭ chin si zungzal ko seh. Ahlei in zeiruang ah dah Pathian nih mah zawtnak rungrul hi vawlei cungah avahter hnga timi tuhi thla ka cam fate ka hal lengmangmi asi. Pathian nih hin kanmah thlacamnak in daihter aduhmi zong cu aum lai i kanmah thlacamnak zong leh aitimhlomi zong aum ve ko lai timi hi hngalhter ṭhan kan duh. Nangmah ca hmanh ah Bawipa nih na thlacamnak an lehlo ahcun midang caah cun anlet rih lai lo. Aruang cu Bawipa nih dam seh ti aduhmi cu nangmah dam hmasa hi asi caah asi. Biatak cu Pathian duhnak le Pathian thinlung hi zeidah asi hnga ti hngalh izuam tuhi thluachuah nganbik cu asi.
Luka 9:23
Cun annih cu an dihlak in a thawh hna i: “Ahohmanh nih zulh nan ka duh ahcun mah zawnruahnak kha nan ngol lai i ni fa tein nan vailam kha nan i put lai i nan ka zulh lai. 24Zeicahtiah mah himnak lawng a ruatmi cu a nunnak kha a sung lai sihmanhsehlaw keimah ruangah a nunnak a sungmi cu khamhnak kha a hmu lai. 25Mi pakhatkhat nih vawlei hi a dihlak in co seh law amah cu lotlau ṭung seh law, asiloah rawkral ṭung seh law, zeital a miak hnga maw? Miak hlah.
Mathai 10:37
“Ahohmanh a nu siseh, a pa siseh, keimah nakin a daw deuhmi cu ka mi si awk aa tlak lo; ahohmanh a fapa siseh, a fanu siseh, keimah nakin a daw deuhmi cu ka mi si awk aa tlak lo.
Comments
Post a Comment