Jesuh Khrih thawngin unau taktak asimi ka unau sinah nihin ka tonmi lunglawmhnak tehte ka rak in hrawmh. Ka lunglawmhnak kan hrawmhmi na rel tikah hin lungthawhnak le ruahchannak tampi an pek lai I Thiang Thlarau he thlacamnak in hawikomh duhnak zong ahrin lai tiah zumhnak ka ngei. Nichiarte in naa ruahchannak anganbikmi hi zeidah asi? Zei tuah lai hi dah naa ngeihbikmi asi? Ka nunnak ah kaa lawmhbikmi le ka ruahchannak lakah anganbikmi cu Thiang Thlarau he thlacamnak in ton lengmang hi asi. Ka duhbikmi hi Jesuh asi i ka dawtbikmi hi Pathian asi i kaa ruahchan bikmi le ka herhbikmi cu Thiang Thlarau asi. Hngalhnak vialte lakah tling cikcek in hngalh ka duhmi hna cu Thiang Thlarau, Bawipa Jesuh le Pa Pathian hi an si.. Nangteh?
Nichiarte in Thiang Thlarau he hawikomh ding in thlacamnak he na hngak bal maw? Thlacamnak in na hngah tikah teh Thiang Thlarau nih an leng bal maw? Thiang Thlarau nih bia an ruah in Amah he hawikomh athawtnak an hrawmh bal maw? Pathian kan biaknak le kan zumhnak ah athawcem lai tiah ka ruahmi cu thlacamnak in Thiang Thlarau he hawikomhnak ngeiṭi hi asi. Thiang Thlarau he hawikomhnak ngeihṭi ka ti tikah thlacamnak tiang lawng si loin thlacamnak in Amah ka hngah i a ka tonnak le bia a ka ruahnak le Amah he umṭi athawtnak le lawmhnak atlinnak a ka hrawmhmi he hawikomhnak kan ngeihmi hi ka chim duhmi cu asi. Thlacamnak in Thiang Thlarau na hngah tik i an ton balmi na si ahcun ka chimmi hi na fian tuk ko lai. Na ton bal rihlo ahcun lihlo tein Thlacamnak he Thiang Thlarau rak hngak, an ton hrimhrim lai timi hi kan chimh ngam bakmi asi. Caan cu tampi na pek ahau ve lai nain asunghnak zeihmanh a um loh. Thiang Thlarau hi thlacamnak in hngak ka ti tiah biathuk ka chimmi aum loh, na duhmi herhmi, thla na cam i na chim dih hnu ah dai tein Thiang Thlarau, Nangmah kan hngak, keimah biachim ding adih cang i Nangmah nih bia ka ruah ve ti i hngak khi ka chim duhmi asi. Amen.
Pathian zumhtlak asinak vialte hi tampi a um ko lai nain keimah caah cun zeidang, zeidang chimlo in thlacamnak in ka hngah lio i Thiang Thlarau nih a kan tongh caan le a ka len can le Amah he hawikomh lawmhnak le bia a ka ruahmi nih hin Pathian zumhtlak asinak alanghter dih. Nihin zong zinglei 8:30Am hrawngin thlacamnak ah ka lut i holhdang in nazi cheu hrawng thla ka cam hnu ah Thiang Thlarau nih len a ka duh timi khi hngalhnak ka ngei. Mah hnu tlawmpal ka hngah hnu ah Thiang Thlarau cu ka cungah ahun phan, lawmhnak in ka khat i ka chunglei hin diriamhnak ka ngeihmi hi ka chim thiam leng tiang asi. Kaa lawm tuk i Bawipa tam deuh in na thawtnak le na lawmhnak ka hrawmh ko tiah ka nawl len.. Aw ava nuam taktak dah Thiang Thlarau he umṭi cu…Halleluijah. Amen…
Ka unau taktak asimi nangmah zong Pathian na biaknak le aduhnak zulh naa timhnak ah Thiang Thlarau he hawikomhnak in Amah hngalhnak ah na rumlo ahcun retheihnak le lungdonghnak nih an phanh caan voi tampi aum te lai. Sawm kan duhmi cu na tuah cemmi le caan na pek cemmi hi thlacamnak in Thiang Thlarau a hungṭum tiang hngak in Amah he hawikomhnak ngeihṭi hi asi. Thiang Thlarau he hawikomhnak tling na ngeih ahcun na hmailei kong vialte le na zulh dingmi vialte an cawmpiaktu le an hmuhsaktu cu Amah hrimhrim asi lai I zulhkhawhnak le tuahkhawhnak tiang zong an bawmtu cu Thiang Thlarau ṭhiamṭhiam asi ko lai. Amen. Thiang Thlarau na hngalhnak atling hlan chung cu Pathian nih umpi bakmi chung ahcun naa tel ve hrimhrim lai lo. Zeibantuk dirhmun na phanh hmanh ah nifate in Baibal hi na thlarau rawl rak si zungzal seh law Thiang Thlarau he thlacamnak in hawikomhnak hi na dinmi ti le na dawpmi thli rak si ko seh. Amen. Mah ca na sin I ka kuat hnawhchan cu Thiang Thlarau nih an ton tiang lungsau taktak in thlacamnak in na hngah venak ding ka duh caah asi. Thiang Thlarau he thlacamnak in hawikomh duhnak he na hngahnak nih Amah he tonnak achuahpimi tehte na ka khan ve te lai ti ruahchannak zong ka ngei ve. Thiang Thlarau nih Amah hngah duhnak leiah lungthawhnak inpe sehlaw atak in Thiang Thlarau he tonnak le athawtnak zong in hrawmh hram ko seh. Amen…
————-
FILIPI 2:1
Khrih chung i nan nunnak nih khan an ṭhawnter hna maw? A dawtnak nih khan nan hna an ngamter hna maw? Thlarau he hawikomhnak nan ngei maw? Pakhat le pakhat nan i daw in nan i zaangfah maw?
Comments
Post a Comment