THIANG THLARAU NIH AN TONG BAL MAW?

Minung tampi nih hin kan kaa in cun Thiang Thlarau timi biafang hi kan chim lengmang ko nain Thiang Thlarau he atak in hawikomhnak le tonnak, umṭinak taktak an ngeilo. Bawipa cungah le Thiang Thlarau cungah siseh Pa Pathian cungah siseh kaa lawmtukmi cu thlacam duhnak Thiang Thlarau nih a van ka pek i thlacamnak in ka van hngah i a ka tonmi le Amah he hawikomh athawtnak a ka hrawmhmi hi cu asunglawi tuk ee. Thiang Thlarau nih a van kan tongh ah hin cun minung hmurkaa in chimkhawh leng tiang in Pathian biak hi asunglawi i thlacamnak in Amah hngah hi ngolawk aṭha ti lo.. Zeithil paoh hi athawt na teh cangmi cu na ngol kho ti lai lo..

Tuzing zong zinglei 10:00Am hrawngin Thiang Thlarau nih thlacam duhnak a ka pek i 11:40Am hrawng tiang ka hngah hnu ah atak in a van ka tong cu ka pum dihlak nih Bawipa an thangṭhat ee. Amen. Halleluijah. Amen... Pathian nih hin Amah kan biak le kan zumh, anawl kan ngeih athawt chinnak dingah mah le caan te ah thlacam duhnak, rawlulh duhnak, Baibal rel duhnak, Thawngṭha ngeih duhnak a kan pek i a kan pek ning tein zulhpiak ahcun thawtnak le lunglawmhnak le lungriamhnak an hrin hna..

Thiang Thlarau nih Baibal rel duhnak an pek lio ah rel law Baibal thawt cu na theih bak ko lai.. Thiang Thlarau nih thlacam in Amah he hawikomh duhnak an pek ahcun lunglawm tein thlacamnak in Thiang Thlarau hngak law cu an ton lai i thlacam athawtnak muru taktak le Pathian athawtnak cem an hrawm lai. Fimmnak hmuh na duh ahcun thlacamnak in Thiang Thlarau he hawikomhnak chungah lut lengmang law fimnak taktak cu Thiang Thlarau nih an chapchin lengmang ko lai.. Thiang Thlarau nih na thinlung chungah le na pum chung hngalhnak an pek ning in Thiang Thlarau nawlngai law Amah he hawikomhnak le an tonghnak in mah le mah teikhawhnak na chungah an phanh lawng silo in taksa duhnak nih an ziamtak lai.. Biatak cu Thiang Thlarau he hawikomhnak chung na luh lengmang ko ahcun Thlarau in lung diriamhnak na hmuh lengmang caah taksa duhnak cu athi i aziam. Phundang in chim ahcun Thlarau in na khah deuhdeuh tikah taksa duhnak aziam i an tlau cuahmah tikah tuah duhnak nih an zamtak.. Taksa duhnak tampi kan tuahmi hi Thlarau in kan khahlo caan ah arak si. Thlarau in na khah ahcun taksa duhnak athi i Thlarau in na khahlo tikah taksa duhnak in na khat i Thlarau nih na pum duhning in a uk kho ve lo. Thlarau in khahnak cu Thiang Thlarau he thlacamnak in hawikomhnak le tonnak, umṭinak lawnglawng in asi.

Thiang Thlarau hi na pum in siseh na thinlung le ruahnak in siseh na thlarau in siseh na hngal taktak maw? Thiang Thlarau nih ka cungah arian aṭuanmi cungah kaa lawmtuk... Pa Pathian nih a kan dawttuk... Amen..